14 Jan 2016, 12:24
މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި 85 ސެލޯފިންކޮޅާ އެކު ކުޑަކުއްޖަކު ވިލިމާލެއިން ހައްޔަރުކޮށްފި އެވެ.
އެ މައްސަލާގައި ހައްޔަރު ކޮށްފައިވަނީ 15 އަހަރުގެ ފިރިހެން ކުއްޖެކެވެ.
ފުލުހުން ބުނީ، އެ ކުއްޖާ ހައްޔަރުކޮށްފައި ވަނީ، ވިލިމާލޭގައި މަސައްކަތް ކުރާ ފުލުހުންނަށް ލިބުނު މައުލޫމާތަކާއި ގުޅިގެން މިދިޔަ ހޯމަ ދުވަހު އެ ކުއްޖާ ދިރިއުޅޭ އެޕާޓުމަންޓުން ކަމަށެވެ.
އެ މައްސަލާގައި އެކުއްޖާ ދިރިއުޅޭ އެޕާޓުމަންޓް ބަލައި ފާސް ކުރި އިރު، އެ އެޕާޓުމަންޓުގެ ފާހާނާ ތަޅުންގަނޑު މަތިން މަސްތުވާތަކެތި ކަމަށް ޝައްކު ކުރެވޭ ހަތަރު ސެލޯފިން ކޮޅު ފެނިފައިވާ ކަމަށް ފުލުހުން ބުނެ އެވެ.
ހަމައެހެންމެ، އެ އެޕާޓުމަންޓުގެ ސިޓިންގުރޫމްގައި ހުރި ޓީވީ ރެކް ކައިރިން ފެނުނު ސިނގިރޭޓު ފޮށްޓެއްގެ ތެރެއިން މަސްތުވާތަކެތި ކަމަށް ޝައްކުކުރެވޭ ހަތް ސެލޯފިންކޮޅު ފެނިފައިވާ އިރު، ބަދިގޭގައި ހުރި އައިސް އަލަމާރި ދަށުން ވެސް ފެނުނު ސިނގިރޭޓު ފޮށްޓެއްގެ ތެރެއިން މަސްތުވާތަކެތި ކަމަށް ޝައްކު ކުރެވޭ އެއްޗެއް ހުރި 74 ސެލޯފިންކޮޅު ފެނިފައިވާ ކަމަށް ފުލުހުން ބުނެ އެވެ.
ފުލުހުން ބުނީ، އެ ކުއްޖާގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރިކުރުމުން، ހޯމް މިނިސްޓްރީން ކަނޑައަޅާ ތަނެއްގައި ބަހައްޓައިގެން ތަހުގީގު ކުރުމަށް ހަތް ދުވަހުގެ މުއްދަތެއް ދީފައިވާ ކަމަށެވެ.
އެ މައްސަލަ ވިލިމާލޭ ޕޮލިސް ސްޓޭޝަނުން އަންނަނީ ތަހުގީގު ކުރަމުންނެވެ.