13 Jan 2016, 12:49
މުދަލާއި ހިދުމަތުން ނަގާޓެކްސް ކަމަށްވާ ޖީއެސްޓީގެ ގޮތުގައި މިދިޔަ އަހަރު ލިބުނު އާމްދަނީ 24.5 ޕަސެންޓް އިތުރުވެއްޖެ އެވެ.
އިންލެންޑް ރެވެނިއު އޮތޯރިޓީ(މީރާ) އިން އާމްކޮށްފައިވާ ތަފާސް ހިސާބުތަކަށް މިދިޔަ އަހަރު ދައުލަތަށް ލިބުނު 13 ބިލިއަން ރުފިޔާ ލިބިފައިވާ އިރު އޭގެ ތެރެއިން ހަ ބިލިއަން ރުފިޔާ ލިބިފައި ވަނީ ޖީއެސްޓީގެ ގޮތުގަ އެވެ. އެއީ ލިބުނު އާމްދަނީގެ 46.2 ޕަސެންޓް އެވެ. ދެ ހާސް ސާދަ ވަނަ އަހަރު ޖީއެސްޓީގެ ގޮތުގައި ލިބިފައި ވަނީ ހަތަރު ބިލިއަން ރުފިޔާ އެވެ.
މީރާގެ ތަފާސް ހިސާބުތައް ދައްކާ ގޮތުން މިދިޔަ އަހަރު ދެ ވަނައަށް އެންމެ ބޮޑު އާމްދަނީއެއް ލިބިފައި ވަނީ ވިޔަފާރި ފައިދާ އިން ނަގާ ޓެކްސްއިންނެވެ. އެއީ ދެ ބިލިއަން ރުފިޔާ އެވެ. ލިބުނު އާމްދަނީގެ 20.5 ޕަސެންޓެވެ. އަދި ޓޫރިޒަމް ބިމު ކުލީގެ ގޮތުގައި ވަނީ އެއް ބިލިއަން ރުފިޔާ ލިބިފަ އެވެ.
މިދިޔަ އަހަރު ޖުމުލަ 13 ބިލިއަން ރުފިޔާ ލިބިފައިވާ އިރު 2014 އަހަރު އާމްދަނީގެ ގޮތުގައި ލިބިފައި ވަނީ 11 ބިލިއަން ރުފިޔާ އެވެ.
މިދިޔަ އަހަރު ލިބުނު އާމްދަނީ އިތުރުވި ނަމަވެސް މިދިޔަ ޑިސެމްބަރު މަހު ލިބުނު އާމްދަނީ ވަނީ 2014 ވަނަ އަހަރުގެ ޑިސެމްބަރު މަހާ އަޅާބަލާއިރު 2.4 ޕަސެންޓް ދަށްވެފަ އެވެ. އެމަހު ލިބުނު 976 އާމްދަނީ އަކީ އަންދާޒާ ކުރިވަރަށް ވުރެ 9.7 ޕަސެންޓް ދަށް އަދަދެކެވެ.