13 Jan 2016, 10:51
އަންނަ މަހު އިންޑިއާގައި ބޭއްވުމަށް ހަމަޖެހިފައިވާ ސައުތު އޭޝިއަން ގޭމްސްގައި ވާދަކުރާ ގައުމީ ބާސްކެޓްބޯޅަ ޓީމް އިއުލާން ކޮށްފި އެވެ.
ސައުތު އޭޝިއަން ގޭމްސްގައި ބައިވެރިވާ ޓީމްތަކުގެ ތެރެއިން އެންމެ ފުރަތަމަ ފަރިތަކުރުންތައް ފެށި ޓީމުތަކުގެ ތެރެއިން ގައުމީ ފިރިހެން ބާސްކެޓްބޯޅަ ޓީމުގެ 14 ކުޅުންތެރިންގެ ސްކޮޑް 12 ކުޅުންތެރިންނަށް ތިރިކޮށް މޯލްޑިވިސް ބާސްކެޓް ބޯލް އެސޯސިއޭޝަން (އެމްބީއޭ) އިން މިއަދު ވަނީ އިއުލާން ކޮށްފި އެވެ.
ބާސްކެޓް ބޯޅައިގެ މުބާރާތްތައް މިދިޔަ އަހަރުގެ އޮކްޓޯބަރު މަހު ފަހު ކޮޅު ނިމުނު އިރު އެމްބީއޭ އިން ވަނީ 35 ކުޅުންތެރިންގެ ބޮޑު ސްކޮޑަކާއެކީ ސައުތު އޭޝިއަން ގޭމްސް ތައްޔާރުވުމުގެ ގޮތުން ފަރިތަކުރުންތައް ފަށާފަ އެވެ.
އަންނަ މަހުގެ 6 އިން 16 އަށް އިންޑިއާގެ އިރުމަތީގެ އާސާމްގެ ގުވާހަޓީ އަދި ޝިލޮންގައި ބާއްވަން ނިންމައިފިވާ ސައުތު އޭޝިއަން ގޭމްސްގައި ބައިވެރިވާ ގައުމީ ބާސްކެޓް ބޯޅަ ޓީމްގެ ފައިނަލް ސްކޮޑް އިއުލާން ކޮށްފައިވާ އިރު އެ ޓީމުގެ ކޯޗަކަށް ހަމަޖައްސާފައި ވަނީ ތަޖުރިބާކާރު ކޯޗު އަހުމްދު ފަޔާޒް އެވެ.
ބާސްކެޓްބޯޅަ ޓީމުގެ ތައްޔާރީތަކާ ގުޅޭ ގޮތުން 'ސަން' އާ ވާހަކަ ދައްކަމުން ފަޔާޒު ބުނީ ވޭތުވެ ދިޔަ ދެ މަސް ތެރޭގައި ގިނަ ކުޅުންތެރިންތަކަކާ އެކު ފަރިތަކޮށް ފައިނަލް ސްކޮޑް ނަގާފައިވާ އިރު ކުޅުންތެރިން ވެސް ވަރަށް ބޮޑު އިސްކަމެއް ދީގެން ފަރުތަކުރުންތަކުގައި ބައިވެރި ވަމުން އަންނަ ކަމަށެވެ.
"ކުޅުންތެރިން ވަރަށް ބުރަކޮށް ފަރިތަކުރުންތަށް ގެންގޮސްފައި ވަނީ. މި ދިޔަ ދެ މަސް ތެރޭގައި ކޮންމެ ދުވަހަކު ދެ އިރު ކުޅުންތެރިންނާ އެކީ ފަރިތަކުރަމުން މިދަނީ. ޓީމު އޮތީ ވަރަށް ރަނގަޅަށް ތައްޔާރުވެފައި،" ފަޔާޒް ބުންޏެވެ.
އޭނާ ބުނީ ޓީމާ ދޭތެރޭގައި ކުރެވޭ އުންމީދު ވަރަށް ބޮޑު ކަމަށާއި މި ފަހަރުގެ މުބާރާތަށް ޓީމު ނުކުންނަ އިރު އަމާޒަކީ މެޑަލެއް ހޯދުން ކަމަށެވެ.
ސައުތު އޭޝިއަން ގޭމްސްގައި ބައިވެރިވާ ގައުމީ ފިރިހެން ބާސްކެޓްބޯޅަ ޓީމް
ޓީރެކްސް ބާސްކެޓް ބޯލް ކުލަބް
އަހްމަދު ޒަބީރު
- އިބްރާހިމް ރަޝްވާން
- ޒަކަރިއްޔާ އަބްދުލް ލަތީފް
- އިސްމާއިލް ވިލްދާން
- އިލިޔާސް އިބްރާހިމް
ހަރިކޭން ބާސްކެޓް ބޯލް ކުލަބް
އަހުމަދު އިފްސާހް
- އަހުމަދު އަދުހަމް
ރެޑްލައިން ކްލަބް
މުހައްމަދު ޒިލާލް
- އަހުމަދު ފިރާޝް
- ހުސެއިން ހަލީމް
- އަލީ ފަޒްލީ
ޔުނައިޓެޑް ނެޓްވޯކް އޮފް ފްރެންޑްސް
އަބްދުﷲ އަމްޒަރު
ޓީމުގެ ކޯޗު ފަޔާޒްގެ އިތުރުން އެސިސްޓެންޓް ކޯޗަކީ މުހައްމަދު ވަހީދު އެވެ. ޓީމުގެ މެނޭޖަރަކަށް އާތިފް އަލީ ހަމަޖައްސައި އެސިސްޓެންޓް މެނޭޖަރަކަށް އަސްއަދު މުހައްމަދު އެމްބީއޭ އިން ވަނީ އައްޔަނު ކޮށްފަ އެވެ.