13 Jan 2016, 10:05
ކްރިމިނަލް ކޯޓުގެ ފަނޑިޔާރުން ދޫނިދުއަށް ގޮސް އެތަނުގައި ޝަރީއަތް ހިންގޭނެ ކޯޓު ރޫމެއް ހެދުމުގެ މަސައްކަތް ފަށައިފި އެވެ.
ފުލުހުންގެ އިންފޮމޭޝަން އޮފިސަރު އިސްމާއީލް އަލީ މިއަދު ސަން އަށް ވިދާޅުވީ ދޫނިދޫގައި ހުރި ފުލުހުންގެ އިމާރާތެއްގައި އެ ކޯޓު ރޫމް ހެދުމުގެ މަސައްކަތް މީގެ ދުވަސްކޮޅެއް ކުރިން ފެށިގެން ކުރިއަށްދާ ކަމަށެވެ.
އިސްމާއީލް ވިދާޅުވީ އެ ކޯޓު ރޫމް ހަދަނީ ކްރިމިނަލް ކޯޓުން ބޭނުންވާގޮތަށް ކަމަށެވެ.
އޭނާ ވިދާޅުވީ އެ ކޯޓު ރޫމް ހެދުމުން ކުށްވެރިން މާލެ ނުގެނެސް ދޫނިދޫގައި ޝަރީއަތް ކުރެވޭނެ ކަމަށެވެ. އެކަމުގެ ސަބަބުން ކުށްވެރިން މާލެގެނެސްގެން ޝަރީއަތް ކުރުމަށް ކުރަން ޖެހޭ ހޭދަ ސަލާމަތް ކުރެވޭނެ ކަމަށް އިސްމާއީލް ވިދާޅުވި އެވެ.
ބައެއް ފަހަރު ކުށްވެރިން މާލެގެނެސްގެން ޝަރީއަތް ހިންގުމަކީ ސަލާމަތީގޮތުން ރައްކާތެރި ކަމެއް ނޫން ކަމަށް ވެސް އޭނާ ވިދާޅުވި އެވެ.
މީގެ ކުރިން ދޫނިދޫގައި ހަދަމުންދިޔައީ ފަނޑިޔާރުން ކްރިމިނަލް ކޯޓުގައި ތިބެގެން ދޫނިދޫގައި ހުންނަ ކޯޓުރޫމާ ވީޑިއޯ ކޮންފަރެންސްކޮށްގެން ކުށްވެރިން މާލެ ނުގެނެސް ޝަރީއަތް ހިންގޭނެ ފަދަ ކޯޓު ރޫމެކެވެ.
ކުރީގެ ނައިބު ރައީސް އަހްމަދު އަދީބު އަބްދުލް ޣަފޫރާއި އެމްއެމްއެމްޕީއާރްސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތުގެ ޝަރީއަތުގެ ފުރަތަމަ އަޑުއެހުން ވަނީ އެގޮތަށް ބާއްވައިފަ އެވެ. ނަމަވެސް ޕީޖީ އޮފީހުން ވަނީ އެގޮތަށް ޝަރީއަތް ހިންގުމަށް ދެކޮޅު ހަދައިފަ އެވެ.
ދޫނިދޫ ޖަލުގައި ކޯޓް ރޫމް ހެދުމުން އަދި އެ ތަނުގައި ޝަރީއަތްތައް ބާއްވަން ފެއްޓުމުން އެ ޝަރީއަތްތައް އަޑުއެހުމަށް އާންމުންނާއި ނޫސްވެރިންނަށް އޮންނާނީ ކޮން ފުރުސަތުތަކެއްތޯ އާއި އަދި އޭރުން އެއީ ހުޅުވާލެވިގެން ބާއްވާ ޝަރީއަތުގެ މަޖިލީހަކަށްވާނެތޯ ދެންނެވުމުން ފުލުހުންގެ މީޑިއާ އޮފިޝަލް ވިދާޅުވީ "ތިޔަ ފަދަ މައުލޫމާތު ދެއްވާނީ ކޯޓުން" ކަމަށެވެ. ނަމަވެސް ފަނޑިޔާރުން ދޫނިދުއަށް ގޮސް ހިންގަން ކަނޑައަޅާ ޝަރީއަތްތަކާ ބެހޭ ގޮތުން ކްރިމިނަލް ކޯޓުން ވަކި އެއްޗެއް ނުބުނެ އެވެ.