12 Jan 2016, 16:13
މިދިޔަ އަހަރު ދުނިޔޭގެ އެންމެ މޮޅުކުޅުންތެރިޔާގެ އެވޯޑް އާޖެންޓީނާގެ ލިއޮނަލް މެސީއަށް ހައްގުވާކަން، އެވޯޑްގައި އޭނާއާ ވާދަކުރި ޕޯޗްގަލްގެ ކްރިސްޓިއާނޯ ރޮނާލްޑޯވެސް އެއްބަސް ވެއްޖެއެވެ.
މޮޅުކުޅުންތެރިޔާ ހޮވުމަށް ފީފާގެ މެންބަރު 109 ގައުމުގެ ގައުމީ ޓީމް ކެޕްޓަނުންނާއި ކޯޗުންގެ ވޯޓުގެ 41.33 ޕަސެންޓް ލިބިގެން ބެލަންޑޯ އެވޯޑް މެސީ ހޯދިއިރު ރޮނާލްޑޯއަށް ލިބިފައިވަނީ ވޯޓުގެ 27.76 ޕަސެންޓެވެ.
ރޮނާލްޑޯ ބުނީ، ބެލަންޑޯ އެވޯޑް މެސީއަށް ލިބުމުގައި ފުރުސަތު ބޮޑުވާ ކަންކަން އެބަހުރި ކަމަށާއި އެއީ މިދިޔަ އަހަރު މެސީ ޓީމާއެކު ތަށިތަކެއް ހޯދާފައިވުމުން ކަމަށެވެ.
އާޖެންޓީނާގެ ކެޕްޓަންކަންވެސް ކުރަމުން ގެންދާ މެސީ ވަނީ މިދިޔަ އަހަރު ފަސް މެޑަލެއް ހޯދައިފައެވެ. އެއީ ބާސާއާއެކު ސްޕެނިޝް ލީގާއި ކޮޕަޑެލްރޭއާއި ޔޫއެފާ ޗެމްޕިއަންސް ލީގް ހޯދުމާއި ޔޫރަޕިއަން ސުޕަކަޕާއި ކުލަބު ވޯލްޑް ކަޕް ހޯދުމުގެ އިތުރުން އާޖެންޓީނާއާއެކު ކޮޕާއެމެރިކާގެ ރިހި މެޑަލް ހޯދުމެވެ.
ރޮނާލްޑޯއަށް އެންމެ މޮޅު ދެ ވަނަ ކުޅުންތެރިޔާގެ އެވޯޑް ލިބުނު އިރު ތިންވަނަ ލިބިފައިވަނީ ވޯޓްގެ 7.86 ޕަސެންޓް ލިބުނު ބްރަޒިލުގެ ނޭމާ ޑަސިލްވާއަށެވެ.
ވޭތުވެދިޔަ އަށް އަހަރު މޮޅު ކުޅުންތެރިޔާގެ އެވޯޑް ހޯދާފައިވަނީ ރޮނާލްޑޯއާއި މެސީއެވެ. އެގޮތުން ރޮނާލްޑޯ ތިން ފަހަރަށް އެވޯޑް ހޯދާފައިވާއިރު މެސީ ވަނީ ފަސް ފަހަރަށް އެވޯޑް ހޯދައިފައެވެ.