12 Jan 2016, 15:20
އަންނަ މަހު ބޭއްވުމަށް ހަމަޖެހިފައިވާ ސައުތު އޭޝިއަން ގޭމްސްގައި ވާދަކުރުމަށް ފަރިތަކުރުންތައް ހުއްޓާނުލައި ކުރިއަށް ގެންދާ ކަމަށާއި އަދިވެސް މިތިބީ ވަކި ގޮތެއް ހަމަޖެހި ގޭމްސްއަށް ދެވޭނެ ކަމުގެ އުންމިދުގައި ކަމަށް ހޭންޑްބޯލް މޯލްޑިވްސްއިން ބުނެފިއެވެ.
ސައުތު އޭޝިއަން ގޭމްސްއަށް ސަރުކާރުގެ ޚަރަދުގައި ގެންދަން ހަމަޖެހިފައިވާ ޓީމުތަކުގެ ތެރޭގައި ހޭންޑްބޯލްގެ އެއްވެސް ޓީމެއް ކުޅިވަރުގެ ގައުމީ މަޖިލީހުން ހިމަނާފައެއް ނުވެއެވެ.
ސަންއާ ވާހަކަ ދައްކަމުން ހޭންޑްބޯލް އެސޯސިއޭޝްންގެ ޓެކްނިކަލް ޑައިރެކްޓަރު މުހާއްމަދު ޝާން ވިދާޅުވީ، ބަނގުލަދޭޝްގެ ގައުމީ ހޭންޑްބޯލް ސީނިއާ ޓީމުގެ ކޯޗުގެ ބެލުމުގެ ދަށުން އަންހެން ޓީމާއި ފިރިހެން ޓީމުވެސް ގޭމްސްއަށް ޕްރެކްޓިސް ކުރަމުން ގެންދާކަމަށެވެ.
ޝާން ވިދާޅުވީ، އަންހެން ޓީމާއި ފިރިހެން ޓީމުވެސް ގޭމްސްއަށް ދިއުމަށް އޮލިމްޕިކް ކޮމިޓީއާއެކު މަސައްކަތް ކުރަމުންދާ ކަމަށެވެ.
"ސަރުކާރުގެ ނިންމުގެ ސަބަބުން އަޅުގަނޑުމެންނަށް ގޭމްސްގައި ވާދަ ކުރުމުގެ ފުރުސަތު ނުލިބުނަސް، އަދިވެސް އަޅުގަނޑުމެން އުންމީދު ކުރަނީ މުބާރާރުގައި ވާދަކޮށް ރަނގަޅު ފައިޓެއް ދެވޭނެ ކަމަށް،" ޝާން ވިދާޅުވި އެވެ.
އޭނާ ވިދާޅުވީ، އިންޑިއަން އޯޝަންއައިލެންޑް ގޭމްސްއަށް ފަހު ސައުތު އޭޝިއަން ގޭމްސްއަށް ފަރަިަތަކުރުންތައް ހޭންޑްބޯލް ޓީމުން ފަށާފައިވާ ކަމަށާއި މިހާ ކުރިން ތައްޔާރުވަމުން އައިސް މުބާރާތުގައި ދެވޭނެ ކަމުގެ ޔަގީންކަން ނުލިބުމަކީ ކަންބޮޑުވާ ކަމެއް ކަމަށެވެ.
"އިންޑިއަން އޯޝަން އައިލެންޑް ގޭމްސްއަށް ފަހު ދެ ޓީމަށްވެސް އަޅުގަނޑުމެން ދިނީ ދެ ހަފުތާގެ ރަސްޓެއް. އެއަށްފަހު ދެޓީމުންވެސް ސައުތުއޭޝިއަން ގޭމްސްއަށް ތައްޔާރުވުމަށް ބަނގުލަދޭޝް ސީނިއާ ޓީމުގެ ކޯޗްގެ ބެލުމުގެ ދަށުން ވަނީ ޕްރެކްޓިސް ފަށާފައި" ޝާން ވިދާޅުވިއެވެ.