11 Jan 2016, 12:13
އިސްލާމްއާބާދު (ޖެނުއަރީ 11): ޓެރަރިޒަމްއާ ދެކޮޅަށް ހަނގުރާމަ ކުރުމަށް ސައުދީ އަރަބިއާ އިން އިސްވެ އޮވެ ހަދާފައިވާ އިސްލާމީ ގައުމުތަކުގެ ކޯލިޝަންއަށް ޕާކިސްތާނުން ތާއިދުކުރާ ކަމަށް ޕާކިސްތާނުގެ ބޮޑު ވަޒީރު ނަވާޒް ޝަރީފް އިއްޔެ ވިދާޅުވެއްޖެ އެވެ.
ޕާކިސްތާނުގެ ބޮޑުވަޒީރު އެހެން ވިދާޅުވީ އިއްޔެ ޕާކިސްތާނުގެ ވެރިރަށް އިސްލާމްއާބާދުގައި ސައުދީ އަރަބިއާގެ ދިފާއީ ވަޒީރު، ޕްރިންސް މުހައްމަދު ބިން ސަލްމާން އަލް ސައުދުއާ ބައްދަލުކުރެއްވުމަށް ފަހު އެވެ. ޕްރިންސް ސަލްމާން ޕާކިސްތާނަށް ދަތުރުކުރެއްވީ 30 އަށް ވުރެ ގިނަ އިސްލާމީ ގައުމުތަކުން ބައިވެރިވާ އެލަޔަންސުގައި ޕާކިސްތާނުން ބައިވެރިވާކަން ރަސްމީކޮށް ޔަގީން ކުރެއްވުމަށް ޓަކަ އެވެ.
މީގެ ކުރިން ޕާކިސްތާނުން ބުނެފައި ވަނީ އިސްލާމީ ގައުމުތަކުގެ ކޯލިޝަންގައި ބައިވެރި ވާނީ އެލަޔަންސްއާ ބެހޭ ގޮތުން އިތުރު ތަފްސީލު ލިބުމުން ކަމަށެވެ.
"ޓެރަރިޒަމްއާއި ހަތިޔާރުއެޅިފަރާތްތަކާ ދެކޮޅަށް ސައުދީ އަރަބިއާ އިން އިސްނަގައިގެން ހަދާފައިވާ ކޯލިޝަނަށް ބޮޑު ވަޒީރު މަރުހަބާ ވިދާޅުވި. އަދި ޓެރަރިޒަމްއާއި ހައްދުފަހަނައަޅާފައިވާ ފަރާތްތަކާ ދެކޮޅަށް ސައުދީން ކުރަމުންދާ މަސައްކަތަށް ޕާކިސްތާނުން ތާއިދު ކުރާ ކަމަށް ބޮޑު ވަޒީރު ވިދާޅުވި،" ޕްރިންސް ސަލްމާންއާއި ބޮޑު ވަޒީރު ނަވާޒް ޝަރީޕްގެ ބައްދަލުވުމަށް ފަހު ޕާކިސްތާނުގެ ބޮޑުވަޒީރުގެ އޮފީހުން ނެރުނު ބަޔާނެއްގައިވެ އެވެ.
އަދި ދެ ގައުމުގެ މެދުގައި އޮންނަ ގުޅުންތައް އިތުރަށް ވަރުގަދަކުރުމާ ބެހޭ ގޮތުން ވެސް ދެ ބޭފުޅުން މަޝްވަރާކުރެއްވި ކަމަށް އެ ބަޔާނުގައިވެ އެވެ.
ޕާކިސްތާނުގެ ބޮޑުވަޒީރު ނަވާޒް ޝަރީފް ވަނީ ސައުދީ އަރަބިއާ އަށް އަންނަ ކޮންމެ ނުރައްކަލަކާ ދެކޮޅަށް ޕާކިސްތާނުގެ ރައްޔިތުން ތެދުވާނެ ކަމުގެ ޔަގީންކަން ސައުދީ ރައްޔިތުންނަށް ދެއްވައިފާ އެވެ. (އޭޕީ)