09 Jan 2016, 16:01
ވިލީމާލޭ ފެރީ ޓާމިނަލް ޒަމާނީ ފެންވަރަށް ތަރައްގީކޮށް އިމާރާތްކުރުމުގެ މަސައްކަތް މިއަހަރު ފަށާނެ ކަމަށް އެމްޓީސީސީގެ ސީއީއޯ އިބްރާހިމް އަބްދުއްރައްޒާގު ހަލީމް ވިދާޅުވެއްޖެ އެވެ.
ސަރުކާރުން އެމްޓީސީސީއާ ގުޅިގެން އިމާރާތްކުރަން ނިންމާފައިވާ އެ ޓާމިނަލްއާ ބެހޭގޮތުން ހަލީމް 'ސަން' އަށް ވިދާޅުވީ އަލަށް އިމާރާތްކުރުމަށް ނިންމާފައިވާ ވިލިމާލޭ ފެރީ ޓާމިނަލް ދެ ފޭސްއަކަށް ބަހާލައިގެން ކުރިއަށް ގެންދަން ހަމަޖެހިފައިވާ ކަމަށެވެ. އެގޮތުން ފުރަތަމަ ފޭސްގައި އިމާރާތްކުރަން ނިންމާފައިވަނީ މިހާރު ޓާމިނަލް ހުރި ސަރަހައްދު ކަމަށް ހަލީމް ވިދާޅުވި އެވެ.
ޓާމިނަލްގެ މަސައްކަތް ފެށުމުގެ ކުރިން ދަތުރުފަތުރުތަކަށް ބޭނުންވާނެ ޒަމާނީ ޓާމިނަލް ހެދުމަށް މިހާރު މަޝްވަރާކުރަމުންދާ ކަމަށް ހަލީމް ވަނީ ވިދާޅުވެފަ އެވެ.
ވިލީމާލޭ ފެރީ ޓާމިނަލް ޒަމާނި ފެންވަރަށް ތަރައްގީކޮށް ނިމޭއިރު ހުއްނާނެގޮތް ދައްކުވައދޭ ޑިޖިޓަލް އާޓު --
"ދަތުރުފަތުރުގެ ހިދުމަތް މެދު ނުކެނޑޭނެ ގޮތަށް ވަގުތީ ޓާމިނަލް ހެދުމަށް ސަރުކާރާ އެކު ދަނީ މަޝްވަރާކުރެވެމުން. ވަގުތީ ޓާމިނަލް އެޅުމަށް މަޝްވަރާ ކުރެވެމުން ދަނީ މިހާރު ސައިކަލުތައް ޕާކު ކުރާ ސަރަހައްދުގައި" ހަލީމްް ވިދާޅުވި އެވެ.
ފެރީ ޓާމިނަލް ހުންނަ އިމާރާތް 12 ބުރިއަށް ނަގަން ނިންމާފައިވާއިރު ހަލީމް ވިދާޅުވިގޮތުން އެ އިމާރާތުގައި ޒުވާނުން ކުޅިވަރު ކުޅޭނެ ތަނެއްގެ އިތުރުން ކެފޭ ރެސްޓޯރެންޓްތައްވެސް ހިންގޭނެ އެވެ. އަދި އިމާރާތުގެ ހަތަރު ފްލޯ ހަމައެކަނި ޕާކިން އަށް ހަމަޖެހިގެންދާނެ ކަމަށް ހަލީމް ވިދާޅުވި އެވެ.
މިހާރު ޓާމިނަލް އިމާރާތް ކުރުމަށް ކޮންޓްރެކްޓް ހަދާ ނިމިފައިވާއިރު މިއަހަރުގެ މާޗު ހިސާބުގައި ވަގުތީ ޓާމިނަލް އަޅަން ފަށާނެ ކަމަށާއި ކުރިއަށް އޮތް ހަމަސްދުވަހުގެ ތެރޭގައި ޒަމާނީ ޓާމިނަލް އަޅަން ފެށުމުގެ މަސައްކަތް ފެށުމަށް އެމްޓީސީސީއިން ދަނީ މަސައްކަތް ކުރަމުން ކަމަށް ވެސް އޭނާ ވިދާޅުވިއެވެ.