09 Jan 2016, 12:39
ބޮލީވުޑް މަޝްހޫރު ތަރި ސަލްމާން ހާން، މިހާރު ޝޫޓު ކުރަމުން އަންނަ ފިލްމު "ސުލްތާން"ގައި ބަތަލާގެ ރޯލު ކުޅޭނެ ތަރިއަކާ މެދު މީގެ ކުރިން ތަފާތު ވާހަކަތައް ދެކެވުނެވެ.
"ސުލްތާން"ގެ ބަތަލާގެ ރޯލުން ފެނިގެންދާނީ ދީޕިކާ ޕަދުކޯން އޭ އެއްބަޔަކު ބުނަމުން ދިޔަ އިރު އަނެއް ބަޔަކު ބުނަމުން ދިޔައީ އެ ފިލްމުގައި ސަލްމާން އާ އެކު ފެނިގެންދާނީ ޕަރިނީތީ ޗޯޕްރާ ކަމަށެވެ.
އަދި އެ ފިލްމުން ދެ ބަތަލާއިން ފެނިގެންދާނެ ކަމަށް ވެސް ބައެއް ފަރާތްތަކުން ބުނަމުން ދިޔަ އެވެ.
ކޮންމެ އަކަސް އިންޑިއާގެ އެންމެ ފަހުގެ ހަބަރުތައް ބުނާ ގޮތުން "ސުލްތާން"ގައި ބަތަލާއެއްގެ ރޯލު ކުޅޭނީ ބޮލީވުޑްގެ ތަރި އަނުޝްކާ ޝަރުމާ އެވެ.
ދާދި ފަހުން އަނުޝްކާ ވަނީ ސަލްމާން އާ އެކު ނަގާފައިވާ ފޮޓޯއެއް ޓުވީޓުކޮށްފަ އެވެ. އެ ޓުވީޓުގައި ފިލްމުގެ ނަން "ސުލްތާން" މިހެން ލިޔެފައި އޮތެވެ.
"ސުލްތާން"ގެ ބަތަލާ އަކީ އަނުޝްކާ ކަމަށްވާ ނަމަ، އެއީ އޭނާ ސަލްމާން އާއެކު ކުޅޭ ފުރަތަމަ ފިލްމެވެ.
އަނުޝްކާ ވަނީ މީގެ ކުރިން ވެސް ހާން އާއިލާގެ މަޝްހޫރު ތަރިންނާ އެކު ކާމިޔާބު ފިލްމުތަކެއް ކުޅެފަ އެވެ.
އެގޮތުން އޭނާ ޝާރުކް ހާން އާއެކު ކުޅުނު "ޖަބްތަކް ހެ ޖާން" އަދި އާމިރް ހާން އާ އެކު ކުޅުނު "ޕީކޭ" އަށް ވަރަށް ބޮޑު ކާމިޔާބީއެެއް ލިބިފައިވެ އެވެ.
އަލީ އައްބާސް ޒަފަރު ޑައިރެކްޓު ކުރާ "ސުލްތާން" ރިލީޒު ކުރަން ހަމަޖެހިފައި ވަނީ މިއަހަރުގެ އީދު ހާ ތާނގަ އެވެ.