07 Jan 2016, 11:25
ބަންގްލަދޭޝްގައި އޮންނަ ބަންގްބަންދު ގޯލްޑް ކަޕްގައި ރާއްޖޭގެ ފަރާތުން ގެންދާނީ ޒުވާން ޓީމެއް ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނެފި އެވެ.
އެފްއޭއެމްގެ ވެބްސައިޓަށް ދިން އިންޓަވިއު އެއްގައި މިވަގުތު ރާއްޖޭން ބޭރުގައި ހުންނެވި އެ އިދާރާގެ ޖެނަރަލް ސެކްރެޓަރީ ބައްސާމް އާދިލް ޖަލީލް ވިދާޅުވީ ކުރިއަށް އޮތް ގޯލްޑް ކަޕްގައި ރާއްޖޭގެ ފަރާތުން ބައިވެރިވާ ޓީމަކީ ޒުވާން ޓީމެއް ކަމަށާއި މީގެ ދެ ތިން ދުވަސް ކުރިން އެ ގޮތަށް ނިންމާފައިވާ ކަމަށެވެ.
"މި އީ މާކުރިން ވެސް ނިންމާފައިވާ ނިންމުމެއް. ޒުވާން ޓީމެއް އެ މުބާރާތަށް ގެންދަން މި ނިންމީ ކުރިއަށް މި އޮތް ސާފް ގޭމްސް އަށް ތައްޔާރުވުމުގެ ގޮތުން،" ބައްސާމް ވިދާޅުވި އެވެ.
ބާއްސާމް އެހެން ވިދާޅުވެފައިވާ އިރު ގައުމީ ޓީމުގެ ސީނިއާ ފަސް ކުޅުންތެރިއަކު މިހާރު ވަނީ ގޯލްޑް ކަޕަށް ޓީމާ އެކީ ނުދާން ނިންމައިފަ އެވެ. އެފްއޭއެމްގެ އޮފިޝަލެއް 'ސަން' އާ ވާހަކަ ދައްކަމުން ވިދާޅުވީ އެ މުބާރާތަށް ޒުވާން ޓީމެއް ގެންދިއުމަށް ގައުމީ ކޯޗު ރިކީ ހާބަޓް ވަނީ މީގެ ކުރިން ނިންމާފައި ކަމަށާއި އެހެން ކަމުން ސީނިއާ ބައެއް ކުޅުންތެރިން އެކަމާ މެދު ކޯޗާ މަޝްވަރާކޮށް ގައުމީ ޓީމާ އެކު ނުދާން ނިންމި ކަމަށެވެ.
އޭނާ ވިދާޅުވީ ކޯޗާއި ކުޅުންތެރިންނާ ދެމެދު އެއްވެސް މައްސަލައެއް އުފެދިފައިނުވާ ކަމަށާއި ކޯޗު ނެގި ޒުވާން ޓީމާ އެކު އިއްޔެ ހަވީރު ޕްރެކްޓިސް ފަށާފައިވާ އިރު މިމަހު 8-18 އަށް ޑާކާގައި އޮންނަ އެ މުބާރަތަށް ދިއުމަށް ގައުމީ ޓީމް މި މަހު ނުވަ ވަނަ ދުވަހު ފުރުމަށް ތައްޔާރު ވަމުން އަންނަ ކަމަށެވެ.
ގައުމީ ޓީމްގެ ޕްރެކްޓިސް އިއްޔެ ފަށާފައިވާ އިރު ޓީމުގެ ބައެއް ކޯޗިން ސްޓާފުންނާއި ކޯޗާއި ދޭތެރޭގައި ވަނީ މައްސަލް ގޯސްވެ ބައެއް އޮފިޝަލުން ޓީމުން އިސްތިއުފާ ވެސް ދީފަ އެވެ. އެގޮތުން ގައިމީ ޓީމްގެ އެއް އެސިސްޓެންޓް ކޯޗް ކަމުގައިވާ އަސްއަދު އަބްދުލް ޣަނީ އާއި ގޯލް ކީޕަރު ޓްރެއިނަރު އަސްލަމް އަބްދުއްރަހީމް ވަނީ ގައުމީ ޓީމުގައި ނަމެއްގައި އެ މީހުން ތިބެން ބޭނުން ނުވާ ކަމަށް ބުނެ ކޯޗަށް ވަރަށް ބޮޑަށް ފާޑުކިޔައި، އިއްޔެ އިސްތިއުފާ ދީފަ އެވެ.
ގޯލްޑް ކަޕްގައި ގްރޫޕް ބީގައި ރާއްޖެ އިތުރުން ދެން ހިމެނެނީ ކެމްބޯޑިއާ އާއި ބަޚްރޭންގެ އިތުރުން ބަނގްލަދޭޝްގެ 23 އަހަރުން ދަށުގެ ޓީމެވެ. އެ މުބާރާތުގައި ރާއްޖެ ކުޅޭ ފުރަތަމަ މެޗްގައި ހޯމަ ދުވަހު ނިކުންނާނީ ކެމްބޯޑިއާ ދެކޮޅަށެވެ.