07 Jan 2016, 13:35
ސައުދީ އިސްވެ އޮވެ ޔަމަނަށް ދެމުންދާ ވައިގެ ހަމަލާއެއް ޔަމަނުގެ ވެރިރަށް ސަނާގައި ހުންނަ ލޯފަން ކުދިންގެ މަރުކަޒަކަށް އަމާޒުވެއްޖެ އެވެ.
ލޯފަން ކުދިންނަށް އަޅާލުމަށް ހަދާފައިވާ "ނޫރު" ނަމަކަށް ކިޔާ އެ ސެންޓަރު ކައިރީގައި އުޅޭ އާއްމު ރައްޔިތުންނާ ހަވާލާދީ ރޮއިޓާސްގައި ރިޕޯޓްކޮށްފައިވާ ގޮތުގައި، ޔަމަނުގައި ހަރަކާތްތެރިވާ ހޫތީ ބާޢީންނަށް އަމާޒުކޮށް އެ ވައިގެ ހަމަލާދީފައިވަނީ މިދިޔަ އަންގާރަ ދުވަހު އެވެ.
ހަމަލާގައި އެ އިމާރާތުގެ ބޮޑުބައެއް ހަލާކުވެފައިވާއިރު، އެއްވެސް މީހަކު މަރުވެފައެއް ނުވެއެވެ. ނަމަވެސް ތިން މީހަކަށް ޒަހަމްވެފައިވާ ކަމަށް މީޑިއާ ރިޕޯޓްތައް ބުނެއެވެ.
ލޯފަން ކުދިންނަށް އަޅާލުމަށް ހަދާފައިވާ އެ ސެންޓަރަކީ ވޯލްޑް ބޭންކުން ހަރަދުކޮށްގެން ޔަމަނުގައި ހިންގާ ޕްރޮޖެކްޓެއްގެ ދަށުން އަޅާފައިވާ ސެންޓަރެކެވެ.
ސައުދީ ކޯލިޝަނުން ދިން އެ ހަމަލާއަށްފަހު ސެންޓަރުގެ ޑެޕިއުޓީ މެނޭޖަރު މުހައްމަދު ޑޭލަމީ ވަނީ، ސައުދީ އަރަބިއްޔާއާ އެ ގައުމަށް ބައިތު ހިފާ ގައުމުތަކުން ހަނގުރާމައެއްގެ އެއްވެސް ގަވާއިދެއް ނޭނގޭ ކަމަށް ވިދާޅުވެފައެވެ.
"ސެންޓަރުގައި އުޅޭ ހާއްސަ އެހީއަށް ބޭނުންވާ ކުދިން ކުރީ ކޮން ކަމެއް އެކުދިން ކިޔަވާ ސެންޓަރަށް ވައިގެ ހަމަލާއެއްދޭން. ކޮބާތަ އަމިއްލަ ޖަމިއްޔާތައް؟ ކޮބާާތަ ޔޫއެން،" ސަބާ ނޫސް އެޖެންސީއަށް އިންޓަވިއުދެއްވަމުން ޑޭލަމީ ވިދާޅުވެފައިވެ އެވެ.
ޔަމަނުގެ ރައީސް އަބްދުއްރައްބޫހް މަންސޫރު ހާދީ އަށް ތާއިދު ކުރުމުގެ ގޮތުން ސައުދީ ކޯލީޝަނުން ޔަމަނުގެ ހޫތީ ބާޣީންނާ ދެކޮޅަށް މިދިޔަ އަހަރުގެ މާޗް މަހުން ފެށިގެން ކުރަމުންދާ ހަނގުރާމައިގާ މިހާތަނަށް 6،000 މީހުން ވަނީ މަރުވެފައެވެ. އޭގެ ތެރެއިން ދެބައިކުޅަ އެއްބައި މީހުންނަކީ ކުށެއް ނެތް އާއްމުންނެވެ.