06 Jan 2016, 15:12
ކުރީގެ ރައީސް މުހައްމަދު ނަޝީދުގެ މައްޗަށް ކޮށްފައިވާ 13 އަހަރުގެ ޖަލު ހުކުމް، ގެއަށް ބަދަލުކުރި ކަމަށް ބުނާ ލިޔުން އެމަނިކުފާނާ ހަވާލު ކުރި ކަރެކްޝަންގެ އޮފިސަރު ކަމަށް ބުނާ މީހާއާ ގުޅޭ ގޮތުން ނަޝީދުގެ ބޭބޭފުޅު ޑރ. އިބްރާހިމް ނާޝިދުއާ ފުލުހުން ސުވާލުކޮށްފި އެވެ.
މިއަދު މެންދުރު ނާޝިދު ފުލުހުންގެ އިދާރާއަށް ހާޒިރުކޮށް އެ މީހާއާ ގުޅޭގޮތުން ސުވާލުކޮށްފައި ވާއިރު، އިއްޔެ ވަަނީ ނަޝީދުގެ ގާނޫނީ ވަކީލް ހަސަން ލަތީފު ވެސް ފުލުހުންގެ އިދާރާއަށް ހާޒިރުކޮށް އެ މީހާ އާ ގުޅޭގޮތުން ސުވާލުކޮށްފަ އެވެ.
ހަސަން ލަތީފް ވިދާޅުވީ އެ މީހާ އެނގޭތޯ ފުލުހުން ސުވާލު ކުރި ކަމަށާއި، ނަމަވެސް އެއީ ސިޓީ ހަވާލު ކުރި ދުވަހުގެ ކުރިން އަދި އޭގެ ފަހުން ވެސް ފެނިފައިވާ މީހެއް ނޫން ކަމަށާއި، އެހެންކަމުން ކަނޑައެޅިގެން އެއީ ވަކި މީހެއް ކަން ބުނަން ނޭނގޭ ކަމަށެވެ.
ނަމަވެސް ފުލުހުން ދެއްކި ފޮޓޯތަކުގެ ތެރެއިން ސިޓީ ހިފައިގެން އައި މީހާއާ އެންމެ ވައްތަރު ފޮޓޯ ފުލުހުންނަށް ދެއްކި ކަމަށާއި، ފުލުހުންނަށް ބަޔާނެއް ދީފައިވާ ކަމަށް ހަސަން ލަތީފް ވަނީ ވިދާޅުވެފަ އެވެ.
ފުލުހުންގެ އިދާރާއިން ނުކުމެވަޑައިގެން ނާޝިދު ވިދާޅުވީ ނަޝީދާ ސިޓީ ހަވާލު ކުރަން ދިޔަ މީހާއާއި ގުޅޭ ގޮތުން ފުލުހުން ސުވާލުކުރި ކަމަށެވެ. ނަމަވެސް އިތުރު ތަފްސީލެއް ނުދެއްވަ އެވެ.
ރައީސް ނަޝީދު ގޭ ބަންދުގައި ހުންނަވަނިކޮށް ދާއީމީކޮށް ގޭ ބަންދަށް ބަދަލުކޮށްފައިވާ ކަމަށް ބުނެ ކަރެކްޝަނަލް ސާވިސް އިން އެމަނިކުފާނަށް ލިޔުން ހަވާލުކޮށްފައި ވަނީ މިދިޔަ ޖުލައި މަހުގެ 19 ވަނަ ދުވަހު އެވެ.
ނަޝީދަށް ކަރެކްޝަންގެ ފަރާތުން ދިން ލިއުމަކީ ސައްހަ އެއްޗެއްތޯ ބެލުމަށް ކަރެކްޝަންގެ ފަރާތުން ފުލުހުންނަށް ހުށަހަޅާފައި ވަނީ މިދިޔަ އޮގަސްޓް މަހުގެ 24 ގަ އެވެ. އެދުވަހުން ފެށިގެން މިހާތަނަށް ދިޔައިރު ތަހުގީގު ކުރިއަށް ގޮސްފައިވާ ހިސާބެއް ފުލުހުން ހާމަކޮށްފައެއް ނުވެ އެވެ.
އޭރު ފުލުހުން ވިދާޅުވީ "އެ ލިޔުމުގެ ސައްހަކަން ބެލުމަށް މިހާރު ތަހުގީގު ފަށާފައިވާ" ކަމަށެވެ.
އޭގެ އިތުރުން ނަޝީދުގެ މައްޗަށް ކޮށްފައިވާ 13 އަހަރު ދުވަހުގެ ޖަލު ހުކުމް އެއްކޮށް "މައާފު" ކޮށްފައިވާ ކަމަށް ބުނާ ލިޔުމުގެ މައްސަލަ ވެސް ފުލުހުން އަންނަނީ ބަލަމުންނެވެ.