06 Jan 2016, 11:11
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ މެމްބަޝިޕް ފޯމްގައި ކުރީގެ ރައީސް މުޙައްމަދު ނަޝީދުގެ ފިންގަޕްރިންޓް ޖައްސަވައިފި އެވެ.
ރައީސް ނަޝީދުގެ ގާނޫނީ ޓީމްގައި ހިމެނިވަޑައިގަންނަވާ، އެމްޑީޕީގެ ވެރިކަމުގައި ޔޫތު މިނިސްޓަރުކަން ކުރެއްވި، ޙަސަން ލަތީފު މިއަދު ސަންއަށް ވިދާޅުވީ ރައީސް ނަޝީދުގެ ފިންގާޕްރިންޓް ފޯމްގައި ޖައްސަވާފައި ވަނީ މިދިޔަ ހޯމަ ދުވަހު ކަމަށެވެ. އެފޯމްގައި ނަޝީދުގެ ފިންގާޕްރިންޓް ޖެއްސެވީ މާފުށީ ޖަލަށް ފޯމް ގެންގޮސްގެން ކަމަށް އޭނާ ވިދާޅުވި އެވެ.
ރައީސް ނަޝީދު ފިންގާޕްރިންޓް ޖައްސަވަން ޕާޓީގެ ފޯމް ޖަލަށް ގެންދިއުމަށް ކަރެކްޝަނަލް ސާވިސް އަށް ހުއްދަދީފައި ވަނީ ހޯމް މިނިސްޓްރީންނެވެ. އެކަމަށް ހޯމް މިނިސްޓްރީން ހުއްދަ ދީފައި ވަނީ އެ މައްސަލާގައި ސަރުކާރާއި އެމްޑީޕީއާ ދެމެދު ޒުވާބުތަކެއް ހިނގި ފަހުންނެވެ.
އެމްޑީޕީގެ މެމްބަޝިޕް ފޯމްގައި ނަޝީދުގެ ފިންގާޕްރިންޓް ނުޖެހިގެން އެމްޑީޕީން އެކަމާ ޝަކުވާ ކުރަނިކޮށް މިދިޔަ ހޮނިހިރު ދުވަހު ހޯމް މިނިސްޓަރު އުމަރު ނަސީރު ވިދާޅުވީ ނަޝީދުގެ ވަކީލުން މެދުވެރިކޮށް އެމަނިކުފާނުގެ ފިންގަޕްރިންޓް ހޯދޭނެ ކަމަށެވެ.
އުމަރު ކުރެއްވި ޓުވީޓެއްގައި ވިދާޅުވެފައި ވަނީ ވަކީލުން މެދުވެރިކޮށް އެކަން ކުރަން އެމްޑީޕީ އަށް އަންގާފައިވާ ކަމަށެވެ. ކޮންމެ ދުވަހަކު ވެސް ނަޝީދުގެ ވަކީލުން ތިން ގަޑިއިރަށް އެމަނިކުފާނާ ބައްދަލުކުރައްވައި އެކި ލިއުންތަކުގައި ސޮއިކުރައްވައި ފިންގާ ޕްރިންޓް ހޯއްދަވާ ކަމަށެވެ.