04 Jan 2016, 11:01
ޓުރިވެންޑްރަމް، އިންޑިއާ (4 ޖެނުއަރީ) -ޓީމަކަށް ކާމިޔާބު ލިބޭ ހިނދު ކުޅުންތެރިން ދެއްކި ކުޅުމާމެދު ތައުރީފް ކުރެވޭ ފަދައިން ކޯޗުންގެ ރޭވުންތެރިކަމާއި ގޭމް ޓެކްޓިކްސްގެ މޮޅު ވާހަކަ ދައްކައި ކޯޗުންނަށް ތައުރީފް އޮއްސަ އެވެ. ޓީމު ފަހަތުން އަރައި މޮޅުވުމުގައި ކޯޗުގެ ޓެކްނިކު މުހިންމު ދައުރެއް ކުޅުނު ވާހަކަ އެވެ.
ހަމައެޔާއެކު ބަލިވެއްޖެ ނަމަ ކުޅުންތެރިންނަށާއި ކޯޗުންނަށް ވެސް ފާޑު ކިޔަ އެވެ. އިންޑިއާގެ ޓުރިވަންޑުރަމުގައި ކުރިއަށްދިޔަ ސާފް ސުޒުކީ ކަޕަކީ ހުނަރުވެރި މޮޅު ކޯޗުން ފެނުނު މުބާރާތެކެވެ. ސާފް ޗެމްޕިއަންޝިޕްގެ ތާރީޚްގައި ވެސް ކޯޗުންގެ ތަޖުރިބާއާއި ރޭވުންތެރިކަމަށް ބަލާ އިރު މިއަށް ވުރެ ވަކި މުއްސަނދި މުބާރާތެއް ނެތެވެ.
ނަމަވެސް މިއުޅެނީ ކޯޗުންގެ ހުނަރުވެރިކަމުގެ ވާހަކަ ދައްކާކަށް ނޫނެވެ. މިފަހަރުގެ މުބާރާތުން ފެނުނު ކޯޗުންގެ މިޒާޖާއި ސްޓައިލްއާއި އެ ކޯޗުންގެ ހުރި ކެރެކްޓާގެ ވާހަކަ ގެނެސްދިނުމަށެވެ.
ޕެމާ ޑޯޖީ: ބޫޓާން
ޑޯޖީއަކީ ސާފް ޗެމްޕިއަންޝީޕްގެ ތާރީޚްގައި ފެނުނު އެންމެ ޒުވާން ކޯޗެވެ. ބޫޓާންގެ ކޯޗު ކަމުން ޖަޕާނުގެ ނޫރިއޯ ޓްސްކިއޭޓް އިސްތިއުފާ ދިނުމުން ޓީމާ ހަވާލުވި ޑޯޖީ ސާފްޗެމްޕިއަންޝިޕަށް އައިިއިރު އޭނާގެ އުމުރުން 30 އަހަރެވެ.
ޑޯޖީއަކީ ކުރިން ބޫޓާންގެ ގައުމީ ޓީމަށް ކުޅެފައިވާ ކުޅުންތެރިޔެކެވެ. އޭނާގެ މިޒާޖުގައި އެންމެ ފާހަގަ ކުރެވޭ އެއްކަމަކީ މަޑުމައިތިރިކަމާއި ޑިސިޕްލިން އެވެ. ކޯޗަކަށް ވުރެ ޑޯޖީގެ މިޒާޖުގައި އަދިވެސް ހުރީ ކުޅުންތެރިޔެއްގެ ޠަަބީއަތެވެ. މީޑިއާގެ ކުރިމައްޗަށް ނިކުންނަ އިރު ޑޯޖީއަކީ ބަސްމަދު މީހެކެވެ. ކުރި ސުވާލަކަށް ނޫނީ އޭނާ ޖަވާބެއް ނުދެ އެވެ. ކުޅުންތެރިންތަކެއް ގޮވައިގެން ޓީމު މެނޭޖު ކުރުމުގެ ކޮލިޓީ ޑޯޖީގެ ސިކުޑީގައި އަދި މަދެވެ.
މައުރޫފުލް ހައްޤު – ބަނގުލަދޭޝް
މައުރޫފުލްހައްޤަކީ މިމުބާރާތަށް އައި ސަރަހައްދަށް ނިސްބަތްވާ ތިން ކޯޗުންގެ ތެރެއިން އެއް ކޯޗެވެ. އެހެންވެ އޭނާ ފާހަގަ ކުރެވެނީ ސަރަހައްދީ ފުޓްބޯޅަ ރަނގަޅަށް އެނގޭ މިހެއް ކަމުގަ އެވެ.
މައުރޫފްއަކީ ވަރަށް ގިނައިން ވާހަކަ ދައްކަން ބޭނުންވާ މީހެއްކަން އޭނާގެ މިޒާޖުން ފާހަގަ ކުރެވެ އެވެ. ނަމަވެސް އޭނާއަކީ ވާހަކަ ދައްކަން އެހާ ފަރިތަ މީހެއް ނޫނެވެ. ނަމަވެސް އޭނާއަކީ ޚިޔާލު ތަނަވަސް ކަންކަމަށް ހައްލު ހޯދައިދޭނެގޮތް ދެނެގަންނަން އެނގޭ މީހެއްކަން އޭނާ ދައްކާ ވާހަކައިންނާއި ޕްރެކްޓިސް ސެޝަންތަކުން އެނގެ އެވެ. އަދި އޭނާއަކީ ދިރިއުޅުމުގައި ހަރުދަނާ ގޮތްތަކެއް ގެންގުޅޭ މީހެއްކަން ވެސް އޭނާގެ ބައެއް ކަންކަމުން ތަރުޖަމާ ކުރެވެ އެވެ.
ސްޓެފަން ކޮންސްޓެޓެއިން – އިންޑިއާ
ސްޓެފަން ކޮންސްޓެއިންއަކީ އިންޑިއާއަށް އާ ކޯޗެއް ނޫނެވެ. މީގެ ކުރިން ވެސް އޭނާ ވަނީ އިންޑިއާއަށް ކޯޗުކޮށްދީފަ އެވެ.
އިންގްލެންޑަށް ނިސްބަތްވާ ސްޓެފަންގެ މިޒާޖުން ދޭހަކޮށްދޭ އެއް ކަމަކީ އޭނާގެ ކިބައިގައި ފާޑު ކިޔުމުގެ ކޮލިޓީ ހުރިކަމެވެ. އަދި އެހެންމީހުން އޭނާއަށް ފާޑު ކިޔުމަަށް ފުރުސަތު ދޭކަށް އޭނާ ބޭނުމެއް ނުވެ އެވެ. އެހެންވެ އޭނާ މަސައްކަތް ކުރަނީ އެހެން މީހުންނަށް ފާޑު ކިޔުމަށް ފުރުސަތު ނުދީ، އޭނާގެ މަސައްކަތް ވީއެންމެ ފުރިހަމަކޮށް ނިންމުމަށެވެ.
ރޮބިންސިންހު ޓީމަށް ނެގުމުން، ކޮންސްޓެޓެއިންއަށް ފާޑުކިޔުންތައް އަމާޒުވި އެވެ. ނަމަވެސް އޭނާގެ ނިންމުން ރަނގަޅު ނޫންކަމަށް ބުނި މީހުންނަށް ދެ ވަނަ ފަހަރަށް ފާޑުކިޔަން ފުރުސަތު ނުދޭނެކަން އޭނާ ހާމަކޮށްދޭން ބޭނުންވިކަން އެނގުނީ ލަންކާއާ ދެކޮޅަށް ކުޅުނު މެޗަށް ފަހު ބޭއްވި ޕޯސްޓް މެޗު ޕްރެސްކޮންފަރެންސްގައި އޭނާ އެކަމަށް އިޝާރާތް ކޮށްފައިވުމުންނެވެ.
އޭނާގެ މިޒާޖުން ފާހަގަ ކުރެވޭ އަނެއް ކަމަކީ އޭނާއަކީ ވަރަށް ތޫނު ފިލި މީހެއްކަމެވެ. އަދި ކަމެއްގައި ހުރި އުނިކަން ދެނެގަނެ ފަސޭހައިން ހައްލު ހޯދަން އެނގޭ މީހެއްކަން އެނގެނީ މެޗްތަކުގައި އޭނާ ގޭމް ޕްލޭންއަށް ގެންނަ ކުދިކުދި ބަދަލުތަކުގެ ސަބަބުން މުޅި މެޗް ހޭންޑަލް ކުރެވޭތީ އެވެ.
ޕެޓްރިކް އޮސަމުސް –ނޭޕާލް
އޮސަމުސްއަކީ ކްލަބު ކެރިއާގައި ކާމިޔާބު ކޯޗެކެވެ. ކޯޗެއްގެ ގޮތުގައި އޭނާ ވަނީ ޔޫރަޕާއި އެފްރިކާއާއި އޭޝިއާގައިވެސް މަސައްކަތްކޮށްފަ އެވެ. އަދި އޭނާ ވަނީ ކްލަބު ކެރިއާގައި ކާމިޔާބު ތަކެއް ވެސް ހާސިލުކޮށްފަ އެވެ.
އޮސަމުސްގެ މިޒާޖަށް ބަލާއިރު އޭނާއަކީ ވަރަށް އަނގަ ގަދަ މީހެކެވެ. މިއީ ޕްރެކްޓިސް ސެޝަންތަކާއި ޕްރެސްކޮންފަރެންސްގައި އޭނާ ފެންނައިރު އޭނާގެ މިޒާޖާއި ބެހޭ ގޮތުން ބުނެވެން އޮތް ވާހަކަ އެވެ. އަދި އޭނާއަކީ ކުރިމަތިވާ ހިތްހަމަނުޖެހުންތައް ވަރަށް އަވަހަށް ބަންޑުންކޮށްލާ މީހެއްކަން އެނގެނީ މުބާރާތުގެ އިންތިޒާމުތަކާ މެދު އޭނާ ހިތްހަމަނުޖެހުން ފާޅުކޮށްފައިވާލެއް ބޮޑުކަމުންނެވެ.
ނަމަވެސް އޭނާއަކީ ވަރަށް ރަނގަޅަށް އެއްޗިހި ބުނެދޭ މީހެކޭ ދެންނެވިދާނެ އެވެ. އަދި އޭނާ ކިޔައިދޭ ކޮންމެ ވާހަކައެއް ވެސް ވަރަށް ތަފްސީލުކޮށް ސާފުކޮށް ކިޔައިދޭ މީހެކެވެ. އަނގަ ގަދަޔަސް އޭނާއަކީ އޭނާ ބުނާގޮތަށް މަސައްކަތް ކުރުމުން އޭގެ އަގުވަޒަން ކުރާ މީހެއްކަން އެނގެނީ ޕްރެކްޓިސް ޝެޝަންތަކުގައި އޭނާ ބޭނުންވާ ގޮތަކަށް ކުޅުންތެރިން ނަތީޖާ ނެރޭ ނަމަ ތަކުރާރުކޮށް އެކަން ފާހަގަ ކުރާތީ އެވެ. އަދި އެކަމަކީ ކިތަންމެ ކުޑަ ކަމެއް ނަމަވެސް ޓީމަށް އެކަމުން ފައިދާވާ ނަމަ އޭނާ އެކަން ރަނގަޅުކަމަށް ބުނާނެ އެވެ.
ސަމްޕަތު ޕެރޭރާ – ސްރީ ލަންކާ
ސަމްޕަތު ޕެރޭރާ ފެނުމުން އޭނާގެ މިޒާޖުން ފާހަގަ ކުރެވޭ އެންމެ މުހިންމު ކަމަކީ އޭނާއަކީ އެންމެންގެ ވާހަކަ ވެސް އަޑު އަހާ މީހެއް ކަމެވެ. އަދި އޭނާއަކީ މާގިނަ ވަގުތު އަރާމު ކުރަން ބޭނުންނުވެ އަބަދުވެސް ކުރަން އޮތް މަސައްކަތަކަށް އިންތިޒާރު ކުރާ މީހެއްކަން އޭނާގެ ވާހަކަތަކުން ދޭހަވެ އެވެ.
އަދި އޭނާއަކީ ގިނަ ވާހަކަ ދައްކަން ބޭނުންވާ މީހެއް ނޫނެވެ. އެހެންވެ އޭނާ ބަލަނީ އޭނާގެ ވަގުތުތައް މަސައްކަތަށް ހުސްކޮށް ނަތީޖާޔަކާ ހަމަޔަށްދާން މަސައްކަތް ކުރާ މީހެއް ގޮތަށެވެ.
ސާފް ސުޒުކީ ކަޕްގައި އޭނާގެ ޕޯސްޓް މެޗް ޕްރެސްކޮންފަރެންސެއް ނުބޭއްވި ނޫސްވެރިންނަށް ވަނީ ފުރުސަތު ގެއްލިފަ އެވެ. އެއީ ސުވާލު ކުރަން ހުޅުވާލުމުން ނޫސްވެރިޔަކު ސުވާލު ނުކުރުމުންނެވެ. މިފުރުސަތުގައި އޭނާ ވެސް އަމިއްލައަށް ކޮމެންޓެއް ކުރި ނަމަ އެދުވަހުގެ މެޗާ ބެހޭ ގޮތުން އިތުރު ތަފުސީލު ނޫސްވެރިންނަށް ދެވުނީހެވެ.
އެހެންވެ މިމުބާރާތުން ފެނުނު ޕެރޭރާއަކީ ވަރަށް ބުރަކޮށް މަސައްކަތް ކުރަން ބޭނުންވާ މީހެއްކަން ހާމަވި އެވެ. އަދި އޭނާގެ މިޒާޖުގައި ކަންކަން ކޮންޓްރޯލް ކޮށްގެން ހުރުމުގެ ހިތްވަރު ހުރިކަން ސާބިތުވެ އެވެ.
ޕީޓާ ސާގެޓް - އަފުޣާނިސްތާން
މިއީ މުބާރާތުން ފެނުނު އެންމެ ތަފާތު ކޯޗެވެ. ބައެއް ނޫސްވެރިން ސިއްރުން ނަމަވެސް ބުނެލަ އެވެ. ސާގެޓަކީ ވަރަށް ފޮނި ދެއްކުންތެރިކަން ބޮޑު މީހެކެވެ. އެހެން އެބުނަނީ ސަބަބުތަކެއް ނެތިއެއް ނޫނެވެ. ކެމެރާ ކުރިމަތީގައި ވަރަށް ސްމާޓްކޮށް ހުރެވޭތޯ އޭނާ އަބަދުވެސް ބަލަ އެވެ. އަދި އޭނާގެ ވާހަކައިގައި ފޮނިގޮތްތަކެއް ހުރެ އެވެ. މިއީ އެނާގެ މިޒާޖުގެ ސަލްބީ ސިފަތަކެވެ. ނުވަތަ ނެގެޓިވް ސިފަތަކެވެ.
ދެން އޮތީ އޭނާގެ އަޖައިބު ނުވަތަ ޕޮސެޓިވް ސިފަތަކެވެ. އޭނާއަކީ އުނދަގުލުގައި އުޅެން ޖެހުނަސް އެކަން ފާހަގަ ނުކޮށް ކުރިއަށްދާ ރަނގަޅު މީހެކެވެ. އޭނާގެ މިޒާޖު ހުރި ގޮތުން އެއްވެސް މީހެއްގެ ނުރަނގަޅު ކަމެއްގެ ވާހަކަ އޭނާ ދައްކާކަށް ބޭނުމެއް ނުވެ އެވެ.
ވަކި ކުޅުންތެރިޔެއްގެ ނެގެޓިވް ވާހަކަ އޭނާގެ ކުރިމަތީގައި ދެއްކި ނަމަވެސް އޭނާ އެވާހަކަ ޕޮސެޓިވް ކުރެ އެވެ. އެވެނި ޓީމެއްގެ ހުރި ނުވަތަ އެވެނި ކުޅުންތެރިޔެއްގެ ހުރި ޕޮސެޓިވް ވާހަކައަކުންނެވެ. އަދި އޭނާގެ ކުޅުންތެރިންނަށް އަބަދު ވެސް އޭނާ ވިސްނައިދެނީ ޕޮސެޓިވްކޮށް ވިސްނުމަށެވެ.
ރިކީ ހާބަޓް – ދިވެހިރާއްޖެ
ހާބަޓަކީ ސާފް ސުޒުކީ ކަޕުން ފެނުނު އެންމެ ތަޖުރިބާކާރު އެއްކޯޗެވެ. ނިއުޒިލެންޑަށް ވޯލްޑްކަޕް ކުޅެ އެޓީމު އެމުބާރާތަށް ކޮލިފައިކޮށްދީ 2010ގެ މުބާރާތުގައި އެ ޓީމަށް ކޯޗްކޮށްދިން ހާބަޓަކީ ރާއްޖޭގެ ފުޓްބޯޅައިގެ ހަޔާތުގައި ވެސް ފެނުނު އެންމެ ތަޖުރިބާ ކާރު ކޯޗެވެ.
އޭނާއާ އަމާޒުވާ ސުވާލަކީ އެސުވާލުގެ ޖަވާބަށް ކިތަންމެ ކުރު ޖަވާބެއް އޮތް ނަމަވެސް، ހާބަޓްގެ ވާހަކަ ފަށަނީ ތަފްސީލީ ޖަވާބަކުންނެވެ. އެހެންވެ ތަފްސީލުކޮށްދޭން ހަދައިގެން ޖަވާބު ދިގުވެގެންދެ އެވެ.
ނަމަވެސް ހަބަޓަކީ ވަރަށް ކެތްތެރި މިޒާޖުގެ ފާޑު ހުރި މީހެއްކަން އޭނާގެ ޠަބީއަތުން ފާހަގަވެ އެވެ. ރާއްޖޭގެ ގައުމީ ޓީމަށް ގެންނަން ބޭނުންވާ ބަދަލުތައް އޭނާ ހާމަ ކުރަމުންދަނީ ކެތްތެރިކަމާއެކު އެވެ.
އަދި މަސައްކަތުގެ ބުރަކަމުން އޭނާއަކީ ވަރުބަލިވެގެން ހުއްޓާލާނެ މީހެއް ނޫންކަންވެސް އޭނާގެ ޠަބީއަތުން ހާމަވެ އެވެ.
މިއީ މިފަހަރު ސާފް ސުޒުކީ ކަޕުން ފާހަގަ ކުރެވުނު ކޯޗުންގެ ބޭރުފުށުގެ މިޒާޖާއި ޠަބީއަތުން ފާހަގަ ކުރެވުނު ކަންކަމެވެ. މިހުރިހާ ކޯޗުންނާ ވެސް އަޅުގަނޑުމެން ވަނީ ބައްދަލުވެފަ އެވެ. ވާހަކަ ދައްކާ ގޮތާއި ޕްރެކްޓިސް ސެޝަންތަކުގައި އެކޯޗެއްގެ ކެރެކްޓާ ހުންނަ ގޮތް އެ ބައްދަލުވުމުން އެނގުނެ އެވެ. މިޒާޖާއި ޠަބީއަތުން ތަރުޖަމާކޮށްފައިވާ މާނަތަކެވެ.