03 Jan 2016, 14:57
ސްރީލަންކާގެ ނުވަރައެލިޔާގައި ހުންނަ މެކްވުޑްސް ސައި ފެކްޓަރީގައި ނަގާފައި ހުރި ދިވެހި ދިދަ އެކޮޅު ކޮޅުން ހުރުމުން، ދިދަ ރަނގަޅު ކޮށްދިނުމަށް ދިވެހީންތަކެއް މެކްވުޑްސްގައި އެދިއްޖެ އެވެ.
މިއަދު ހެނދުނު މެކްވުޑްސް ސައި ފެކްޓަރީއަށް ޒިޔާރަތް ކުރި ދިވެހީންގެ ގްރޫޕެއްގައި ހިމެނުނު ޒުވާނަކު ބުނީ، އެތަނުގައި ނަގާފައި ހުރި އެކި އެކި ގައުމުތަކުގެ ދިދަތަކުގެ ތެރޭގައި ދިވެހި ރާއްޖޭގެ ދިދަ ވެސް ހުރިތޯ ބެލެވުނު ކަމަށާއި، ނަމަވެސް އެ ދިދަ ނަގާފައި ހުރީ ނުބައި ކޮޅަށް ކަމަށެވެ.
"ދިވެހި ދިދަ އެތަނުގައި ހުރުމުން ވަރަށް އުފާވި. އެކަމަކު ދެން ވިސްނުނީ ދިދަ އިނީ ނުބައިކޮށް ކަން. ދިދައިގެ ހަނދުފަޅި އިނީ ދިދަ ދަނޑިއާ ދިމާލަށް. އަސްލު ދިދައިގައި ދަނޑިއާ ދިމާލަކަށް ނޫން ހަނދުފަޅި އިންނާނީ،" ސަންއާ ވާހަކަ ދައްކަމުން، މެކްވުޑްސްއަށް މިއަދު ދިޔަ ދިވެހި ޒުވާނަކު ބުންޏެވެ.
އެހެންކަމުން ވަގުތުން މެކްވުޑްސް ސައި ފެކްޓަރީގެ މުވައްޒަފުންގެ ސަމާލުކަމަށް އެކަން ގެނެސް، ދިދަ ތިރިކުރުމަށް ފަހު ބެލި ބެލުމުން ހާމަވީ، ދިދަ ދަނޑިއަށް ލައްވާ ބައި ފަހާފައި ވަނީ ދިދައިގެ ނުބައި ކޮޅުގައި ކަމަށް އެ ޒުވާނާ ބުންޏެވެ.
،މެކްވުޑްސްއަށް މިއަދު ދިޔަ ދިވެހީންގެ މި ގްރޫޕުން ވަނީ އެތަނުގެ އިސް މެނޭޖްމެންޓާ ބައްދަލުކޮށް އެމީހުންގެ ސަމާލުކަމަށް މިކަން ގެނެސްފަ އެވެ. އަދި ދިވެހި ދިދަ އަސްލު އިންނަން ޖެހޭ ގޮތް ވެސް ވަނީ އެފަރާތަށް ކިޔައިދެވިފަ އެވެ.
ފަހާފައިވާ އެ ދިދަ ވަގުތުން ރަނގަޅު ކުރެވެން ނެތް ކަމުން، އެ ދިދަ ވީހާ ވެސް އަވަހަކަށް ރަނގަޅު ކޮށްދިނުމަށް އެތަނަށް ޒިޔާރަތް ކުރި ދިވެހީން މިއަދު ވަނީ އެތަނުގައި އެދިފަ އެވެ. އެ ދިވެހި ދިދަ މިހާރު ވަނީ މެކްވުޑްސްއިން ވަގުތީ ގޮތުން ނަގައިފަ އެވެ.
ނުވަރައެލިޔާގައި ހުންނަ މެކްވުޑްސް ސައި ފެކްޓަރީއަށް ގިނަ އަދަދެއްގެ ދިވެހީން އަބަދުވެސް ޒިޔާރަތް ކުރާ އިރު، ދިވެހި ރާއްޖޭގެ ޤައުމީ ދިދަ އެތަނުގައި ނަގާފައި ވަނީ ނުބައިކޮށް ކަމެއް މީގެ ކުރިން އެއްވެސް ދިވެއްސަކު ފާހަގަ ކޮށްފައި ނުވާކަމަށް މެކްވުޑްސްއިން ބުނެ އެވެ.