01 Jan 2016, 11:06
މިދިޔަ ނޮވެމްބަރު މަހުގެ ނިޔަލަށް ރާއްޖޭގެ ރަސްމީ ރިޒާވް 566.7 މިލިއަން ޑޮލަރަށް އަރާފައިވާ ކަމަށް ހިސާބުތަކުން ދައްކައިފި އެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އާންމުކޮށްފައިވާ އިގްތިސާދީ ރިވިއުއިން ދައްކާ ގޮތުން މިދިޔަ ނޮވެމްބަރު މަހުގެ ރާއްޖޭގެ ރަސްމީ ރިޒާވް 566.7 މިލިއަން ޑޮލަރަށް އަރާ އިރު އެއީ މިދިޔަ އަހަރުގެ އެ މުއްދަތާ އަޅައިބަލާ އިރު ހަތަރު ޕަސެންޓް އިތުރު އަދަދެކެވެ. ނަމަވެސް އެއީ އޮކްޓޫބަރު މަހާއި އަޅާބަލާއިރު އެއް ޕަސެންޓް ދަށް އަދަދެކެވެ.
ނޮވެމްބަރު މަހުގެ ނިޔަލަށް ރަސްމީ ރިޒާވްގެ ޔޫޒަބަލް ރިޒާވްގެ ގޮތުގައި 197.6 މިލިއަން ޑޮލަރު ހުރި އިރު އެއީ މަހުން މަހަށް ބަލާ އިރު ދަށްވި ނަމަވެސް އަހަރުން އަހަރަށް ބަލާއިރު 14 ޕަސެންޓް އިތުރު އަދަދެކެވެ.
އެމްއެމްއޭ އިން ބުނާ ގޮތުގައި މިދިޔަ ޖުލައި މަސް ނިމުނު އިރު ރަސްމީ ރިޒާވްގައި ހުރި މިންވަރަކީ 3.6 މަހުގެ އިމްޕޯޓް އެވެ.