31 Dec 2015, 00:04
ފަތުރުވެރިކަމަކީ ރާއްޖޭގެ އިގްތިސާދުގެ އެންމެ ބޮޑު ހިއްސާއެއް އޮންނަ ސިނާއަތް ކަމަށާއި ފަތުރުވެރިކަން ނުވަތަ ޓޫރިޒަމް ސެކްޓާ ނެތިގޮސްފި ނަމަ ރާއްޖެއަށް އެއްވެސް ރޮނގަކުން ކުރިއެރުމެއް ލިބުމަކީ ނާދިރުކަމެއް ކަމަށް އެމްޑީއޭގެ ލީޑަރު މީދޫ ދާއިރާގެ މެންބަރު އަހުމަދު ސިޔާމް މުހައްމަދު ވިދަޅުވެއްޖެ އެވެ.
ވިޒިޓް މޯލްޑިވްސް ފެސްޓިވަލް 2016 އިފްތިތާހުކުރުމަށް މިރޭ ދަރުބާރުގޭގައި ކުރިއަށްގެންދިޔަ ރަސްމިއްޔާތުގައި ވާހަކަފުޅު ދައްކަވަމުން ސިޔާމް ވިދާޅުވީ، ފަތުރުވެރިކަމަކީ ރާއްޖޭގެ އިގްތިސާދު ކުރިއަރަމުން އަންނަ މައި އެއް ސަބަބަށްވާ އިރު، އެ ސިނާއަތް ކުރިއެރުވުމަށް ރައީސް ޔާމީން ބުރަ މަސައްކަތްތަކެއް ކުރައްވަމުން އަންނަ ކަމަށެވެ.
"ފަތުރުވެރިކަމުގެ އިންޑަސްޓްރީ ހަލާކުކޮށްލައިފި ނަމަ ދިވެހިރާއްޖޭގައި އެއްވެސް ކަމެއް ނުކުރެވޭނެ. ތައުލީމެއްވެސް ނުލިބޭނެ. ބަނދަރެއް ވެސް ނުހެދޭނެ. ސިއްހަތެއް ވެސް ނުލިބޭނެ. އާސަންދައިން ބޭހެއްވެސް ނުކުރެވޭނެ. އަދި އެހެން ކަމެއްވެސް ނުކުރެވޭނެ. އެހެން ވެއްޖެއްޔާ އަޅުގަނޑުމެން ތިބޭނީ ފަގީރުވެ ނިކަމެތިވެ ވަރަށް ދެރަ ހާލެއްގައި ޖެހިފައި،" ސިޔާމް ވިދާޅުވި އެވެ.
ފަތުރުވެރިކަމުގެ އިންޑަސްޓްރީ އަބަދުވެސް ބަރޯސާވާނީ ދިވެހިރާއްޖޭގެ ސުލްހަ މަސްލަހަތަށް ކަމަށާއި ނަމަވެސް ފަތުރުވެރިކަން ނެތިކޮށްލަން ނުވަތަ ފަތުރުވެރިން ރާއްޖެއަށް އަޔަސް ނުދިނުމަށް "ބައެއް ފަރާތްތަކުން" ގިނަ ކަންތައްތަކެއް މިހާރުވެސް ކުރަމުން އަންނަ ކަމަށް ސިޔާމް ވިދާޅުވި އެވެ. ސިޔާމް ވިދާޅުވީ އެއީ ރައްޔިތުންނަށް ހެޔޮއެދޭ ބައެއް ނޫން ކަމަށާއި މި ސަރުކާރުން އެފަދަ ފަރާތްތަކުގެ މަސައްކަތް ކާމިޔާބު ވިޔަ ނުދޭނެ ކަމަށެވެ.
ސަރުކާރާއެކު ކޯލިޝަނެއްގައި ދެމިއޮތް ހަމައެކަނި ޕާޓީގެ ރައީސް ސިޔާމް ވިދާޅުވީ ވޭތުވެދިޔަ ހަވަރަކަށް އަހަރު ރާއްޖޭގެ ފަތުރުވެރިކަމުގެ ސިނާއަތަށް އެއްވެސް ރިސޯޓެއް އިތުރުނުވެ އޮތީ އޭރުގައި އޮތް ސަރުކާރުގެ "ދޯހަޅިކަމުން" ކަމަށެވެ. ނަމަވެސް ރައީސް ޔާމީން ވެރިކަމަށް ވަޑައިގެން ދިވެހިރާއްޖޭގެ "ވަޅުޖެހިފައިވާ ފަތުރުވެރިކަން" ނަގައި ކޮޅަށް ޖަހާފައިވާ ކަމަށާއި އެގޮތުން މިހާރު ގާތްގަނޑަކަށް 25 ވަރަކަށް ރިސޯޓްގެ ކޮންސްޓްރަކްޝަން މަސައްކަތްތައް ވެސް މިހާރު ހިނގަމުން އަންނަ ކަމަށެވެ.
"މިކަން މިހެން ވާން ޖެހުނީ އޭރުގައި ރިސޯޓް ހަދަން ބޭނުންވާ ތަކެތި އިމްޕޯޓް ކުރަން އުނދަގޫވުމާ ޑިއުޓީފީ ބޮޑުވުމާ ރިސޯޓް އިންވެސްޓް ކުރުމުގެ އަގު އެތައް ގުނައަކަށް މައްޗަށް ދިއުމުން. އެހެން ނަމަވެސް މިދިޔަ އަހަރު ތެރޭގައި ރިސޯޓް ހެދުމަށްޓަކައި ރާއްޖެ އެތެރެކުރާ ހުރިހާ އެއްޗަކުން އެމަނިކުފާނު އެވަނީ ޑިއުޓީ މާފުކޮށްދެއްވާފައި. އެކަމުގެ ސަބަބުން ނުހެދިހުރި އެތައް ރިސޯޓެއް މިއަދު އެދަނީ ހަދަމުން،" ސިޔާމް ވިދާޅުވި އެވެ.
ވިޒިޓް މޯލްޑިވްސް އިއާ ގެ ގޮތުގައި މިފެށޭ 2016 ވަނަ އަހަރު ކަނޑއަޅާފައިވާ އިރު، ސަރުކާރުގެ އަމާޒަކީ އަންނަ އަހަރު 1.5 މިލިއަން ޓޫރިސްޓުން ރާއްޖެއަށް ގެނައުމެވެ.