30 Dec 2015, 09:52
ސޯލް (ޑިސެމްބަރ 30): ދެކޮރެއާ ދެމެދުގައި އޮންނަ ގުޅުން ރަނގަޅު ކުރުމަށް އިސް ދައުރެއް އަދަކުރެއްވި އަދި ނޯތް ކޮރެއާގެ ލީޑަރު ކިމް ޖޮންގް އުންގެ ގާތް ފަރާތެއް ކަމަށްވާ ކިމް ޔަންގް ގޮން ކާރު އެކްސިޑެންޓެއްގައި މިއަދު މަރުވެއްޖެ ކަމަށް އެގައުމުގެ ރަސްމީ މީޑިއާ އިން ބުނެފި އެވެ.
ނޯތް ކޮރެއާގެ ސްޓޭޓޭ ނިއުސް އޭޖެންސީ، ކޭސީއެންއޭ އިން ރިޕޯޓުކުރި ގޮތުގައި ކިމް ޔަންގް ގޮން އަކީ އެގައުމުގެ "ވޯކާސް ޕާޓީ"ގެ ސެކްރެޓަރީ އެވެ. އަދި ދެކޮރެއާ ދެމެދުގައި އޮންނަ ގުޅުންތައް ބެލެހެއްޓުމަށް އެޕާޓީގައި އެކުލަވާލާފައި އޮންނަ ޔުނައިޓެޑް ފްރޮންޓް ޑިޕާޓްމެންޓްގެ އިސް ފަރާތެވެ.
އޮގަސްޓް މަހު ނޯތް ކޮރެއާއާއި ސައުތް ކޮރެއާއާ ދެމެދު ދެކެވުނު ސުލްހައިގެ ވާހަކަތަކުގައި ކިމް ޔަންގް ގޮން ބައިވެރިވެ ވަޑައިގެންފައިވެ އެވެ. އެބައްދަލުވުމަށް ފަހު ދެގައުމުގެ މެދުގައި އޮންނަ ގުޅުންތައް ވަރުގަދަ ކުރުމަށް އިތުރަށް ވާހަކަދެއްކުމަށް އެއްބަސްވެވުނެވެ.
ފަހުގެ ދުވަސްތަކުގައި ކިމް ޔަންގް ގޮން ވަނީ ނޯތް ކޮރެއާގެ ލީޑަރު ކިމް ޖޮންގް އުންގެ ވަރަށް ގާތް ފަރާތްތަކަށްވެ ވަޑައިގެންފަ އެވެ. އެގޮތުން ކިމް ޖޮން އުން ފާމްތަކަށާއި ފެކްޓަރީތަކަށް ޒިޔާރަތް ކުރައްވާ އިރާއި ބައްދަލުވުންތަކަށް ވަޑައިގަންނަވާއިރު ކިމް ޔަންގް ގޮން ވެސް އެދަތުރުފުޅުތަކުގައި ގިނަގިނައިން ބައިވެރިވަޑައިގެންފައިވެ އެވެ.
ކިމް ޔަންގް ގޮން މަރުވުމާ ގުޅިގެން ސައުތު ކޮރެއާގެ ޔުނިފިކޭޝަން މިނިސްޓަރު ވަނީ ނޯތް ކޮރެއާގެ ލީޑަރަށް ތައުޒިޔާ ވިދާޅުވެފަ އެވެ. (ރޮއިޓާސް)