28 Dec 2015, 05:30
ދުނިޔޭގެ އެންމެ މަޝްހޫރު އެއް މެސެޖިން ސާވިސް ކަމަށްވާ "ވަޓްސްއެޕް" އިން ވީޑިއޯ ކޯލިންގެ ހިދުމަތް ތައާރަފު ކުރަން އުޅޭ ކަމަށް ރިޕޯޓުތަކުން ބުނެފިއެވެ.
ކުންފުނީގެ އިންޓާނަލް ލީކްއަކުން ލިބިފައިވާ ސްކްރީންޝޮޓްތަކެއްގައި ދައްކާގޮތުގައި ވަޓްސްއެޕްގެ ވީޑިއޯ ކޯލު ކުރުމުގެ ހިދުމަތަކީ ބޭނުން ކުރަން ފަސޭހަ ވާނެ ހިދުމަތެއްކަން ގިނަ ބަޔަކު ބުނެއެވެ.
ވަޓްސްއެޕް ކުންފުނިން އެ ލީކްތަކަކަށް ދެކޮޅު ހަދާފައެއް ނުވެއެވެ. ނަމަވެސް ލީކުތަކުން ހާމަވެފައިވާ ގޮތުގައި އެ ވަޓްސްއެޕްއަށް ވީޑިއޯ ކޯލު ކުރުމުގެ ހިދުމަތް ގެނައުމަށް ހަމަޖެހިފައިވަނީ އަންނަ މަހުގައި ކަމަށެވެ.
ލީކް އިން ހާމަވާގޮތުގައި މިހާރު ކުރިއަށް ދަނީ ވީޑިއޯ ކޯލް ކުރުމުގެ ބީޓާ ޓެސްޓިންގެ މަސައްކަތްތައް ކަމަށް އޮންލައިން ނޫހެއް ކަމަށްވާ "ފޯބްސް" އިން ވަނީ ބުނެފައެވެ.
ވަޓްސްއެޕް ތައާރަފު ކުރުމާއެކު ބޮޑެތި ކުންފުނިތަކުގެ ވީޑިއޯ ކޯލު ކުރުމުގެ ހިދުމަަތައް ގެއްލުންވާނެ ކަމަށް ގިނަ ބަޔަކު ވަނީ ބުނެފައެވެ. އެގޮތުން މައިކްރޮސޮފްޓްގެ "ސްކައިޕް" އާއި ގޫގަލްގެ "ހޭންގްއައުޓް" އަދި އެޕަލްގެ "ފޭސްޓައިމް" އަށް ގެއްލުންތަކެއް ވާނެއެވެ. ސަބަބަކީ ވަޓްއެޕްގެ ޔޫޒަރުންގެ އަދަދު އެ ހުރިހާ ޕްލެޓްފޯމަކަށްވުރެ ގިނަ ވުމުންނެވެ.
ވަޓްސްއެޕް އިން ހާމަ ކުރިގޮތުގައި އެ ކުންފުނީގެ މެސެޖިން ސާވިސްގައި މިހާރު 900 މިލިއަން އަށްވުރެ ގިނަ އެކްޓިވް ޔޫޒަރުން އެބަތިއްބެވެ.