27 Dec 2015, 15:04
ބ. ކަމަދޫ އެއްގަމުގައި ހުރި ދޯންޏެއްގައި އަލިފާން ރޯވެއްޖެ އެވެ.
ދޯނީގައި އަލިފާން ރޯވެފައިވާކަން ފުލުހުން ކަށަވަރުކޮށްދީފައިވާ އިރު، ފުލުހުން ބުނީ މިހާރު އަލިފާން ގަނޑު ކޮންޓްރޯލް ކުރެވިފައިވާ ކަމަށެވެ.
ފުލުހުން މިހާރު އެ ސަރަހައްދަށް ދަތުރު ކުރަމުންދާ އިރު، އެ ރަށާއި ކައިރީގައި އޮންނަ ފޯ ސީޒަން ރިސޯޓުގެ ފަޔަމަަނުން އަންނަނީ މިހާރު އަލިފާން ނިއްވުމުގެ މަސައްކަތް ކުރަމުންނެވެ.
ބ. ކަމަދޫ ކައުންސިލްގެ ރައީސް އަލީ އިސްމާއިލް ސަން އަށް ވިދާޅުވީ މިއަދު އަލިފާން ރޯވެފައި ވަނީ ބޭނުން ނުކުރާތާ ގާތްގަނޑަކަށް އަށް ވަރަކަށް އަހަރު ވެފައިވާ ދޯންޏެއްގައި ކަމަށެވެ.
ގާތްގަނޑަކަށް 90 ފޫޓުގެ ދޯނީގައި ރޯވި އަލިފާންގަނޑު މިހާރު ކޮންޓްރޯލް ކުރެވިފައިވީ ނަމަވެސް، ދޯނި ވަނީ އެއްކޮށް އަނދައިފަ އެވެ.
"ވަރަށް ނުރައްކާތެރި ހާދިސާއެއް މިއީ. ސަރަހައްދަކީ ވަރަށް ގިނަ ދޯނި އެހެލާފައި ހުންނަ ސަރަހައްދެއް. އެހެންވީމަ އަލިފާންގަނޑު ފެތުރި އިތުރަށް ނުރައްކާވީސް،" އިސްމާއިލް ވިދާޅުވި އެވެ.
ނަމަވެސް އެ ރަށުގެ އާންމު ރައްޔިތުންނާއި ފޯ ސީޒަންސްގެ ފަޔަމަނުން ކުރި މަސައްކަތުން ކައިރީގައި ހުރި ދޯނިތަކަށް ގެއްލުމެއް ނުލިބި ސަލާމަތް ކުރެވިފައިވާ ކަމަށް ކައުންސިލުން މައުލޫމާތުދެ އެވެ.
އެ ހާދިސާގައި އެ ސަރަހައްދުގައި ހުރި ގަސްތައް އެކީގައި އަނދާފައިވީ ނަމަވެސް އެއްވެސް މީހަކަށް ގެއްލުމެއް ލިބިފައެއް ނުވެ އެވެ.
ހާދިސާ ހިނގާފައި ވަނީ އާންމުން ދިރިއުޅޭ ހިސާބާ 100 ވަރަކަށް ފޫޓު ދުރުގައި ކަމަށް ކައުންސިލުން ބުނެ އެވެ.
ފުލުހުން އަންނަނީ މިހާރު އެސަރަހައްދުގައި ތަހުގީގު ކުރަމުންނެވެ.