27 Dec 2015, 12:09
ފުލުހުންގެ ބަންދުގައި ހުރި ކުރީގެ ނައިބު ރައީސް އަހްމަދު އަދީބު އަބްދުލް ޣަފޫރުގެ އާއިލާއަށް އެމަނިކުފާނާ ބައްދަލު ކުރުމަށް ހަމަހަމަ ފުރުސަތު ނުދޭކަމަށް ބުނެ އެ މައްސަލަ ސިވިލް ކޯޓަށް ހުށަހަޅައިފިއެވެ.
އަދީބުގެ ގާނޫނީ ވަކީލުން ސިވިލް ކޯޓަށް މައްސަލަ ހުށަހަޅާފައި ވަނީ ބަންދުގައި ތިބޭ އެހެން މީހުންނާ ޚިލާފަށް، އާއިލީ ބައްދަލުވުމުން ދިނުމުގައި ފުލުހުން ހަރުކަށިކޮށް، ތަފާތުކުރަމުން ގެންދާ ކަމަށް ބުނެއެވެ.
އަދީބުގެ ގާނޫނީ ވަކީލް ހުސައިން ޝަމީމް މިއަދު ނެރުއްވި ބަޔާނެއްގައި ވިދާޅުވެފައި ވަނީ އާއިލީ ބައްދަލުވުން ދިނުމުގައި ފުލުހުން ތަފާތު ކުރަމުން ގެންދަނީ ގާނޫނު އަސާސީގެ އެއް ވަނަ މާއްދާ އާއި 81 ވަނަ މާއްދާއާއި، ފުލުހުންގެ ޢާންމު ގަވާއިދުގެ 43 ވަނަ މާއްދާގެ (ވ) އާއި، (ނ) UDHR ގެ އެއް ވަނަ އާޓިކަލާއި ICCPR ގެ 14 ވަނަ އާޓިކަލްގެ އެއް ވަނަ ނަންބަރުގެ ދަށުން ޚަޞްމުންގެ މެދުގައި ހަމަހަމަކަން ލިބިދެވުމުގެ ހައްގާ ޚިލާފަށް ކަމަށެވެ.
އެހެންކަމުން ކުށުގެ ތުހުމަތުގައި ތިބޭ ސިޔާސީ ފަރާތްތަކަށް މޯލްޑިވްސް ޕޮލިސް ސާވިސްއިން އިންތިޒާމުކޮށް ދެމުން ގެންދިޔަ އިނާޔަތްތައް ތަފާތުކުރުމެއްނެތި އަދީބަށް ލިބިދިނުމަށާއި، އާއިލީ ބައްދަލުވުން ހަމަޖެއްސުމުގައި ތަފާތު ނުކުރުމަށް މޯލްޑިވްސް ޕޮލިސް ސަރވިސްގެ މައްޗަށް އަމުރުކޮށްދެއްވުމަށް އެ މައްސަލާގައި އެދިފައިވާނެ ކަމަށް ޝަމީމް ވިދާޅުވިއެވެ.
އޭގެ އިތުރުން އަދީބާ މެދު ސަރުކާރުން ޤާނޫނާ ޚިލާފު އަމަލުތަކެއް ހިންގަމުން ގެންދާ ކަަމަށާއި އެކަންކަން ދައުލަތުގެ ކަމާބެހޭ މުއައްސަސާތަކުން، ބައްލަވައި، އެކަމާބެހޭ ގޮތުން ފިޔަވަޅު އަޅުއްވައި ދެއްވުމަށް އެމަނިކުފާނު އެދިވަޑައިގަންނަވާ ކަމަށް ޝަމީމް ވިދާޅުވިއެވެ.
އަދީބު ބަންދުކޮށްފައި ވާއިރު، އެމަނިކުފާނުގެ މައްޗަށް ރަސްމީ ހައިސިއްޔަތު ނަހަމަގޮތުގައި ބޭނުންކުރުމުގެ ދައުވާ ދައުލަތުން ވަނީ އުފުލާފައެވެ.
އެ ދައުވާ އަދީބުގެ މައްޗަށް އުފުލީ ޓޫރިސްޓު ރިސޯޓެއް ތަރައްގީކުރުމަށް މާލެ އަތޮޅުގެ ފަޅެއް ކޮރަޕްޝަނަށް މަގުފަހިވާގޮތަށް ރާއްޖެއިން ބޭރުގެ ބަޔަކަށް ދޫކުރުމަށްފަހު ލިބުނު ފައިސާ ނަހަމަގޮތުގައި ބޭނުންކުރި ކަމަށް ތުހުމަތު ކުރެވޭ މައްސަލައާ ގުޅިގެން ކަމަށެވެ.
މައްސަލައިގެ ޝަރީއަތް ފެށައި ވަކީލަކު ހަމަޖެއްސުމަށް އަދީބަށް ފުރުސަތު ދީފައި ވާއިރު އެމަނިކުފާނު ފިސްތޯލަ ގެންގުޅުނު ކަމަށް ތުހުމަތު ކުރެވޭ މައްސަލައިގައި ޓެރަރިޒަމްގެ ދައުވާ ވަނީ އުފުލާފައެވެ.
ހަމައެންމެ އަދީބު ފުލުހުންނަށް ރިޝްވަތު ދިންކަމަށް ތުހުމަތު ކުރެވޭ މައްސަލައެއް ވަނީ ޕީޖީ އޮފީހަށް ފޮނުވާފައެވެ.