27 Dec 2015, 11:13
ރައީސުލްޖުމްހޫރިއްޔާ އަބްދުﷲ ޔާމީން ދަތުރު ކުރެއްވި ފިނިފެންމާ ލޯންޗުގައި އެއްޗެއް ގޮވުމާ ގުޅިގެން ކުރީގެ ނައިބު ރައީސް އަޙްމަދު އަދީބުގެ މައްޗަށް ތުހުމަތުކުރާ ކަންކަމަކީ ކަނޑައެޅިގެން ޙަގީގަތާ ޚިލާފު ތުހުމަތުތަކެއްކަން ސާބިތުވެފައިވާ ކަމަށް އަދީބުގެ ވަކީލް ހުސައިން ޝަމީމް ވިދާޅުވެއްޖެ އެވެ.
އަޙްމަދު އަދީބުގެ މައްޗަށް ތުހުމަތު ކުރެވޭ ކަންކަމަކީ އެއްވެސް ޙަގީގަތެއް ނެތް، ހަދައިގެން ދައްކާ ވާހަކަތަކެއްކަން ކަށަވަރު ވެއްޖެ ކަމަށް ބުނެ ޝަމީމް މިއަދު ނެރުއްވި ބަޔާނެއްގައި ވިދާޅުވެފައި ވަނީ އަދީބު އެންމެ ފުރަތަމަ ހައްޔަރު ކުރީ، ފިނިފެންމާ ލޯންޗުގައި އެއްޗެއް ގޮއްވާލިކަމުގެ ތުހުމަތުގައި ކަމަށެވެ.
ނަމަވެސް ލޯންޗުކޮޅުގައި އެއްޗެއް ގޮއްވާލިކަމުގެ ތުހުމަތުގައި އެންމެ ފުރަތަމަ ދުވަހު ފުލުހުންގެ ތަހުގީގުގައި ކޮށްލި "ދެތިން ސުވާލެއް ފިޔަވައި، އިތުރު އެއްވެސް ސުވާލެއް" ކޮށްފައި ނުވާ ކަމަށް އޭނާ ވިދާޅުވި އެވެ.
އެހެންކަމުން ޝަމީމް ވިދާޅުވީ އަދީބުގެ މައްޗަށް މިހާރު ތުހުމަތު ކުރެވެނީ، ހަމައެކަނި އެމްއެމްޕީއާރުސީގެ މައްސަލައެއް ކަމަށް ފުލުހުން ބުނެފައިވާ ކަމަށެވެ.
"އެއީ، އަޙްމަދު އަދީބު އެންމެ ފުރަތަމަ ހައްޔަރު ކުރެވުނު (ފިނިފެންމާ ލޯންޗުގައި ގޮވުމެއް ގޮއްވާލިކަމުގެ) ތުހުމަތުން ވީއްލި، އެބަންދުން މިހާރު އަޙްމަދު އަދީބު ދޫކޮށްލާފައިވާ ކަމަށް ފުލުހުން ޔަގިންކޮށްދީފައިވާތީ އެވެ. ފުލުހުން މަޢްލޫމާތު ދެއްވި ގޮތުގައި އަޙްމަދު އަދީބުގެ މައްޗަށް މިހާރު ތުހުމަތު ކުރެވެނީ، ހަމައެކަނި އެމްއެމްޕީއާރުސީގެ މައްސަލައެކެވެ." ޝަމީމްގެ ބަޔާނުގައިވެ އެވެ.
އެ ކަމާ ގުޅިގެން ފުލުހުންގެ ބަހެއް އަދި ވަނީ ލިބޭގޮތް ނުވެފަ އެވެ.
ޝަމީމް ވިދާޅުވީ ރިޔާސީ ލޯންޗުކޮޅުގައި "ބޮމެއް ގޮއްވާލައި އެންމެ ބޮޑު ޚިޔާނާތްވި ކަމަށް ސަރުކާރުން ދެއްކި ވާހަކަތަކަކީ" އަދީބުގެ ސިޔާސީ ޙަޔާތާ މެދު ޙަސަދަވެރިވެފައިވާ ބަޔަކު، އިސްވެތިބެ، އެއްވެސް ހެއްކެއް ނެތި ސިޔާސީ ބޭނުމެއްގައި ދައްކާފައިވާ ވާހަކަތަކެއްކަން މިހާރު ކަށަވަރުވާ ކަމަށެވެ.
އަދީބުގެ މައްޗަށް ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ދައުވާ އުފުލީ ޓޫރިޒަމް މިނިސްޓްރީ ހިންގުމާ ހަވާލުވެ ހުރެ، އެމްއެމްޕީއާރްސީ މެދުވެރިކޮށް ސެޕްޓެމްބަރު 30، 2015،ގައި އެބޮނީ ޕްރައިވެޓް ލިމިޑެޓް ނަމަކަށް ކިޔާ ކުންފުންޏަކަށް، 50 އަހަރަށް މާލެ އަތޮޅުގެ ފަޅެއް ކުންޔަށް ދޫ ކުރި މައްސަލާގަ އެވެ.
އަދީބުގެ މައްޗަށް އެ ދައުވާ އުފުލާފައި ވަނީ ގާނޫނުލް އުގޫބާތުގެ 513 ވަނަ މާއްދާގެ (ށ) އާ ހަވާލާދީ އެ މާއްދާގެ (ނ) ގެ ދަށުންނެވެ.
އެ މައްސަލަ އާ ގުޅިގެން ޝަމީމް ވިދާޅުވީ އެމްއެމްޕީއާރުސީއަކީ ދައުލަތުގެ ކުންފުންޏެއް ކަމަށާއި އެކުންފުނީގެ ޙަރަކާތްތަކަށް ޒިންމާވާނީ ކޮން ބައެއްކަން ކުންފުންޏާ ބެހޭ ގާނޫނުގައި ބަޔާންކޮށްފައި އޮންނާނެ ކަމަށެވެ.
އޭގެ އިތުރުން އަދީބުއާ މިއަދުގެ ސަރުކާރުން މަސައްކަތް ހަވާލުކުރީއްސުރެ، އަދީބު ހައްޔަރުކުރުމާ ހަމައަށް، އެއްވެސް ނިންމުމެއް، ސީދާ ރައީސް ޢަބްދުالله ޔާމީން ޢަބްދުލްގައްޔޫމަށް ނާންގަވައި ނުވަތަ ނުއަންގައި ނިންމާފައި ނުވާނެ ކަމުގެ ޔަގީންކަން އަދީބު ދެއްވާ އިރު، އެ ނިންމެވުންތަކަކީ ގާނޫނާއި ގަވާއިދުތަކުގެ ތެރެއިން، ޚުދު ރައީސް އެކަމަށް ތާއީދުކުރައްވާފައިވާ، ރައީސަށް ފުރިހަމަށް މަޢްލޫމާތު ލިބިވަޑައިގެންފައިވާ ނިންމުންތަކެއް ކަމަށް ވެސް ޝަމީމް ގެ ބަޔާނުގައިވެ އެވެ.
އެ މައްސަލައިގެ ޝަރީއަތް މިހާރު ފަށާފައިވާ އިރު ވަކީލަކު ހަމަޖެއްސުމަށް އަދީބަށް ވަނީ 30 ދުވަހުގެ މުއްދަތެއް ދީފަ އެވެ.