26 Dec 2015, 22:17
އިނގިރޭސި ޕްރިމިއަ ލީގްގައި މިރޭ ސްޓޯކް ސިޓީ އަތުން 0-2ގެ ނަތީޖާ އަކުން މެންޗަސްޓާ ޔުނައިޓެޑް ބަލިވެ އެ ޓީމުގެ ކޯޗު ލުއިސް ވެން ހާލް އަށް އިތުރު ޕްރެޝަރުތަކެއް ކުރިމަތި ވެއްޖެ އެވެ.
ސްޓޯކް ސިޓީގެ އަމިއްލަ ދަނޑުގައި މިރޭ ކުޅުނު އެ މެޗުގައި އެ ޓީމުގެ ދެ ގޯލް ވެސް ފެނިގެން ދިޔައީ ފުރަތަމަ ހާފުގަ އެވެ. އެ ގޮތުން ފުރަތަމަ ލަނޑު 19 ވަނަ މިނެޓްގައި ގުލެން ޖޯންސަން ތަނަވަސް ކޮށްދިން ފުރުސަތަކުން ޔުނައިޓެޑްގެ އޭރިއާ މެދުގައި ހުރި ބޯޖަން ވަނީ ގޯލްގެ ތެރެއަށް ވައްދާލައި ސްޓޯކް ސިޓީއަށް ލީޑް ނަގައިދީފަ އެވެ.
އިނގިރޭސި ޕްރިމިއަ ލީގްގައި މިރޭ ސްޓޯކް ސިޓީ އާއި މެންޗަސްޓާ ޔުނައިޓެޑް ކުޅުނު މެޗުގައި ސްޓީކް ސިޓީގެ ލަނޑު ޖެހުމަށް ފަހު އެ ޓީމުގެ ކުޅުންތެރިން އުފާފާޅު ކުރަނީ --- ފޮޓޯ:އޭޕީ
ފުރަތަމަ ލަނޑަށް ފަހު ވެސް ރަނގަޅަށް ކުޅެ ސްޓޯކް ސިޓީއިން ދިޔައީ ޔުނައޮޓެޑްގެ ގޯލަށް ނުރައްކާ ކުރަމުންނެވެ. އެގޮތުން ފުރަތަމަ ލަނޑުޖެހިތާ ހަ މިނެޓް ފަހުން ސްޓޯކް ސިޓީ އިން ވަނީ އިތުރު ގޯލެއް ކާމިޔާބުކޮށް ޔުނައިޓެޑް ހާސްކޮށްލާފަ އެވެ. އެ ގޯލް 26 ވަނަ މިނެޓްގައި އެ ޓީމަށް ކާމިޔާބް ކޮށްދިނީ މާކޯ އާނައުޓޮވިކް އެވެ.
ފުރަތަމަ ހާފް އެ ނަތީޖާގައި އޮވެ ނިމުނު އިރު ދެވަނަ ހާފްގައި ޔުނައިޓެޑުން އެ މީހުންގެ ކުޅުން ރަނގަޅުކޮށް ސްޓޯކް ސިޓީގެ ގޯލަށް ނުރައްކާތެރި ގިނަ ހަމަލާތަކެއް ފޮނުވާލިނަމަވެސް މެޗުގެ ފުރިހަމަ ވަގުތު ހަމަވެގެން ދިޔައީ އެ ނަތީޖާގައި އޮވެގެންނެވެ.
މިރޭގެ މެޗުން ޔުނައިޓެޑް ބަލި ވުމުން ލީގްގައި އެންމެ ފަހުން ކުޅުނު ފަސް މެޗުން ވެސް އެ ޓީމަށް ވަނީ މޮޅުވެވޭގޮތް ނުވެވި އިތުރު ހާސް ކަމަކާއި ކުރިމަތި ލާން ޖެހިފަ އެވެ.
އިނގިރޭސި ޕްރިމިއަ ލީގްގައި މިރޭ ސްޓޯކް ސިޓީ އާއި މެންޗަސްޓާ ޔުނައިޓެޑް ކުޅުނު މެޗުގައި ސްޓީކް ސިޓީގެ ލަނޑު ޖެހުމަށް ފަހު އެ ޓީމުގެ ކުޅުންތެރިން އުފާފާޅު ކުރަނީ --- ފޮޓޯ:އޭޕީ
މެޗަށް ފަހު ވާހަކަ ދައްކަމުން ޔުނައިޓެޑްގެ ކޯޗް ވެން ހާލް ބުނީ މިރޭގެ މެޗުން ޔަނައިޓެޑް ބަލިވުމުން އޭނާގެ ކުރިމަގާއި މެދު ވެސް ސުވާލު އުފެދިފައިވާ ކަމަށާއި ކްލަބުގެ ބޯޑުން އޭނާ އިތުރަށް ބަހައްޓާނެ ކަމާއި މެދު ސުވާލު އުފެދިފއިވާ ކަމަށެވެ.
"އަހަރެންނަށް ވަގުތު ވެސް ލިބިއްޖެ ނަމަވެސް އެންމެ ފަހުން ކުޅުނު ހަތަރު މެޗުން ވެސް ބަލި މިވީ. އެހެން ކަމުން އަހަރެން ކުރިން ހުރި ހާލަތެއްގަ އެއް ނޫން މިހާރު މި ހުރީ. އަހަރެންނަށް ކުލަބުގެ ބޯޑުންނާއި ކުޅުނެތެރިންގެ ފަރާތުން ވެސް އެއްބާރުލުން ލިބޭ. ގިނަ މެޗުތަކަކުން ބަލިވުމުން ސަޕޯޓަރުން ވެސް މާޔޫސް ވެފައި ތިބީ،" ވެން ހާލް ބުންޏެވެ.
މިރޭގެ މެޗުން ބަލިވުމުން ޔުނައިޓެޑް ވަނީ ކުޅުނު 16 މެޗުން 29 ޕޮއިންޓް ލިބިގެން ހަ ވަނަ އަށް ވެއްޓިފަ އެވެ. މިރޭ މޮޅުވި ސްޓޯކް ސިޓީ ވަނީ 16 މެޗުން 26 ޕޮއިންޓް ހޯދައިގެން އަށް ވަނަ އަށް ކުރި އަށް ޖެހިލާފަ އެވެ.