Last Updated: 10 year 11 month ago
ޓްރިވެންޑްރަމުން އަހްމަދު މުޖްތަބާ، ހުސައިން ހަބީބު
ސާފް ސުޒުކީ ކަޕްގައި ރާއްޖެއާއި ބަނގުލަދޭޝް ބައްދަލުކުރާ މެޗުގެ ލައިވް ކަވަރޭޖަށް މަރުހަބާ. ސާފް ސުޒުކީ ކަޕް ނުވަތަ ސާފް ޗެމްޕިއަންޝިޕްގައި މި ދެ ޓީމު މިހާތަނަށް ހަތަރު ފަހަރު ބައްދަލުކޮށްފައިވޭ. މި މުބާރާތުގައި ރާއްޖެއަށް ބަންގްލަދޭޝް ބަލިކުރެވުނީ އެންމެ ފަހަކު. އެއީ 2011 ވަނަ އަހަރު ބޭއްވި ސާފު ޗެމްޕިއަންޝިޕްގައި.
ރާއްޖ
16:58
ފަހު ހާފުގައި ގެނައި ބަދަލުތަކާއެކު ބަނގުލަދޭޝް އަތުން 3-1 ލަނޑުން މޮޅުވެ ސާފް ސުޒުކީ ކަޕްގެ ސެމީ ފައިނަލުގެ ޖާގައެއް ކަށަވަރުކުރުމާ ގާތަށް ރާއްޖެ ޖެހިލައިފިއެވެ.
މިއަދު ރާއްޖޭ ޓީމުން ޖެހި ތިން ލަނޑުގެ ތެރޭން ދެ ލަނޑު ކާމިޔާބުކުރީ މެޗުގެ ފަހުހާފުގައި ބަދަލު ކުޅުންތެރީންގެ ގޮތުގައި ކުޅެން އެރި، އަހްމަދު ނާއިޒުއާއި ނާއިޒް ހަސަން އެވެ.
ޓްރިވެންޑްރަމް އިންޓަނޭޝަނަލް ސްޓޭޑިއަމްގައި ރާއްޖެ ކުޅުނު މެޗުގެ ފުރަތަމަ ލަނޑު ރާއްޖެއަށް ލިބުނު ޕެނަލްޓީއަކުން މެޗުގެ 41 ވަނަ މިނިޓްގައި ކާމިޔާބުކޮށްދިނީ ކެޕްޓަން އަލީ އަޝްފާގު (ދަގަނޑޭ)އެެވެ. ރާއްޖެއަށް ޕެނަލްޓީ ލިބުނީ، އަހްމަދު އިމާޒް (އާއްކޮ) ބަންގާޅު ގޯލަށް އަމާޒުކޮށް ފޮނުވާލި ބޯޯޅަ، ޕެނަލްޓީ އޭރިޔާ ތެރޭގައި ހުރި އެޓީމުގެ ޑިފެންސިވް މިޑްފީލްޑަރު ވާލީ ފައިސަލްގެ އަތުގައި ޖެހުމުންނެވެ. ދަގަނޑޭ ގޯލްގެ ވާތްފަރާތު އަރިމައްޗަށް ފޮނުވާލި ބޯޅަ ގޯލްތެރެއަށް ވަނީ ކީޕަރު ސާހިދުލް އަލަމްގެ އަތުގައި ޖެހިފައެވެ.
ރާއްޖޭ ޓީމުން މެޗުގެ ލީޑު ނެގުމުގެ ކުރީން ބަންގާޅު ޓީމުން ވަނީ، ރާއްޖޭގެ ގޯލަށް ދެތިން ފަހަރެއްގެ މަތީން ނުރައްކާކޮށްފައެވެ. އެހެން ނަމަވެސް އެއިން އެއްފަހަރުވެސް ނަތީޖާ ބަދަލުކޮށްލެވޭގޮތެއް ނުވިއެވެ.
ބަންގާޅު ޓީމުން މެޗުގެ ނަތީޖާ ހަމަހަމަކުރީ، މެޗުގެ 86 ވަނަ މިނިޓްގައެވެ. އެޓީމުގެ ހެމޮންޓާ ވިންސެންޓް ބިސްވާ ރާއްޖޭ ޕެނަލްޓީ އޭރިޔާގެ ބޭރުން ފޮނުވާލި ބޯޅަ ޑިފްލެކްޓްވެގެން ދިޔަވަގުތު ކީޕަރު އިމްރާނަށް ބޯޅަ މަތަނުކުރެވުމުން ބޯޅަ ގޯލްގެރެއަށް ވަނީއެވެ.
މި ނަތީޖާއާއެކު ރާއްޖޭ ޓީމުގެ ކޯޗު ރިކީ ހާބަޓް ވަނީ ޓިމަށް ބަދަލެއް ގެނައެވެ. އެގޮތުން އަސަދުﷲ އަބްދުﷲގެ ބަދަލުގައި ޒުވާން ފޯވާޑް ނާއިޒް ހަސަން ކުޅެން އެރުވިއެވެ. އެ ބަދަލާއެކު ރާއްޖޭ ޓީމުން އުފެއްދި ފުރަތަމަ ހަމަލާގައި ބައިވެރިވެ ނާއިޒު ވަނީ ވަރަށް ފުރިހަމަ ލަނޑަކާއެކު ރާއްޖެއަށް ދެ ވަނަ ފަހަރަށް މެޗުގެ ކުރި ހޯދައިދީފައެވެ.
ރާއްޖޭގެ ފަހު ލަނޑަކީ، ބަންގާޅު ހާފްތެރޭން ދަގަނޑޭ ވަރަށް ރީތިކޮށް އެޓީމުގެ ޕެނަލްޓީ އޭރިޔާ ކުރިމަތިން އިސްމާއިލް އީސަ (މެސީ)އަށް ޖައްސާލި ބޯޅަ މެސީ ނާޓޭއަށް ދިނުމުން ނާޓޭ ހަމަ އެހާރީތިކޮށް ބޯޅަ ގޯލް ތެރެއަށް ފޮނުވާލި ބޯޅައެކެވެ.
ރާއްޖެއާ ބަންގާޅު މިއަދު ކުޅު މެޗުގެ ނަތީޖާއާއެކު ރާއްޖެއަށް ވަނީ، ކުޅުނު ދެމެޗުން 6 ޕޮއިންޓާއެކު ގްރޫގެ އެއްވަނައަށް ޖެހިލައި ސެމީގެ ޖާގައަކާ ކައިރިއަށް ޖެހިލައިފައެވެ. އެހެން ނަމަވެސް، ރާއްޖެއަށް ސެމީގެ ޖާގައެއް ކަށަވަރު ވާނީ، ގްރޫޕް ބީގައި މިއަދު ހަވީރު ބޫޓާނާއި އަފްޣާން ކުޅޭ މެޗުން އަފްޣާން މޮޅުވެއްޖެ ނަމަަ ނުވަތަ މެޗު އެއްވަރު ވެއްޖެ ނަމައެވެ.
ގްރޫޕް ސްޓޭޖްގައި ކުޅުނު ދެމެޗުން ބަންގާޅު ބަލިވި ނަމަވެސް، މިއަދު އަފްޣާން އަތުން ބޫޓާން މޮޅުވެއްޖެ ނަމަ، އެއްވެސް ޓީމަކަށް ދެވަނަ ބުރުގެ ފުރުސަތު އަދި ނުގެއްލޭނެއެވެ.
ބަންގާޅު ޓީމުން ބަދަލެއް. ވާލީ ފައިސަލުގެ ބަދަލުގައި ކުޅެން އެރީ ސޮހޭލް ރަނާ.
ބަންގާޅު ޓީމުން ބަދަލެއް. ޖަމާލް ބޫޔާންގެ ބަދަލުގައި ކުޅެން އެރީ، ނަބީބް ނެވާޖް ޖިބޯން.
އަނެއްކާ ވެސް ރާއްޖޭ ޓީމުން ހަމަލާއެއް. ބަންގާޅުގެ ޕެނަލްޓީ އޭރިޔާގެ ބޭރުން އަސައްކޮ ފޮނުވާލި ބޯޅަ ކުޅުންތެރިއެއްގެ ގައިގަ ޖެހިފައި ކޯނަރަކަށް.
ބަންގާޅު ޕެނަލްޓީ އޭރިޔާ ތެރެއަށް ސެންޓޭ ހުރަސްކޮށްލި ބޯޅަ އަސައްކޮ ބޮލުން ޖަހައި ގޯލަށް ފޮނުވާލި. އެހެންނަމަވެސް ގޯލް ކީޕަރު ބޯޅަ މަތަކުރީ.
ދެވަނަ ހާފްގެ ކުޅުން ފަށައިފި.
ސަރަހައްދުގެ ބޮޑު ބާރުކަމަށްވާ އިންޑިއާގެ ވެރިރަށް ނިއު ދިއްލީގައި 2011 ވަނަ އަހަރު ބޭއްވި ސާފް ޗެމްޕިއަންޝިޕް މުބާރާތުގައި ރާއްޖެއިން ވަނީ ބޮޑު ތަފާތަކުން، 1-3 ނަތީޖާއަކުން ބަނގްލަދޭޝް ބަލިކޮށްފައި.
ދަގަނޑޭ އާއްކޮއަށް ދިން ބޯޅަ ބަންގާޅު ޕެނަލްޓީ އޭރިޔާ ތެރޭން ގޯލަށް ފޮނުވާލުމުން އެޓީމުގެ ކުޅުންތެރިއެއްގެ އަތުގައި ބޯޅަ ޖެހުނީ.
ރާއްޖެއަށް ޕެނަލްޓީއެއް.
ބަންގާޅު ޓީމުގެ ޒާހިދު ހުސައިން ރާއްޖޭ ގެ އޭރިޔާތެރެއަށް ހުރަސްކޮށްލި ބޯޅަ ގޮސް ޖެހުނީ ގޯލް ގެ ހުރަސް ދަނީޑިގައި އަދި ބޯޅަ ވެއްޓުނު ވަގުތު އެޓީމުގެ ކުޅުންތެރީން ރާއްޖޭ ގޯލަށް ބޯޅަފޮނުވާލަން ކުރި މަސައްކަތް ކާމިޔާބެއް ނުވި.
ދަގަނޑޭ ފޮނުވާލި ބޯޅަ ގޯލް ކީޕަރު ސާހިދުލް އަލަމްގެ އަތަށް.
މެޗު ފަށަނީ ރާއްޖޭ ޓީމުން.
