Last Updated: 10 year 11 month ago
ރާއްޖެ އާއި ބޫޓާން ބައްދަލު ކުރާ މިއީ ހަތް ވަނަ ފަހަރު. އެއްވެސް ފަހަރަކު ބޫޓާނަށް ރާއްޖެ ބަލި ކުރެވިފައެއް ނުވޭ. އެންމެ ފަހުން ކުޅުނު ސާފު ޗެމްޕިއަންޝިޕްގައި ބޫޓާނާން ކޮޅަށް ރާއްޖެއިން ވަނީ 2-8 ލަނޑު ޖަހާފައި. ވޯލްޑްކަޕް ކޮލިފައިންގައި މިއަހަރު ބޫޓާނާ ބައްދަލު ކުރި މެޗުގެ ނަތީޖާއަކީ 3-4.
ލަނޑު ޖަހާނޭ ގިނަ ފުރުސަތުތަކެއް ލިބުނު މެޗުގައި 3-1 ލަނޑުން ބޫޓާން ބަލިކޮށް ސާފް ސުޒުކީ ކަޕްގެ ގްރޫޕް ސްޓޭޖްގައި ދިވެހި ގައުމީ ފުޓްބޯޅަ ޓީމް ފެށުން ރަނގަޅުކޮށްފި އެވެ.
މިއަދުގެ މެޗުގެ މެޗަށް ގައުމީ ކޯޗް ރިކީ ހާބަޓް، ނަގާފައިވާ ރާއްޖޭ ޓީމުގެ ފުރަތަމަ 11ގައި ކުޅުންތެރީން ހިމަނާފައި ވަނީ، ޒުވާން ކުޅުންތެރީންނާއި ތަޖްރިބާ ކާރު ކުޅުންތެރީން 50-50 ވާގޮތަށެވެ.
ފުރަތަމަ ހާފްގެ ކުޅުން ބޫޓާނުން ކިކްއޮފް ކުރިތާ މާކަ ގިނައިރުތަކެއް ނުވެ، ރާއްޖޭ ޓީމުގެ މުޙައްމަދު ހަމްޒާ (ހަމްޕު)އަށް ލަނޑު ޖަހާނޭ ރަނގަޅު ފުރުސަތެއް ލިބި، ވަނީ ބޭކާރުވެފައެވެ. ބޫޓާން ޕެނަލްޓީ އޭރިޔާ ތެރޭން ދަގަނޑޭ ވަރަށް ރީތިކޮށް ދިން ޕާހެއް، ހަމްޕުއަށް ގޯލްތެރެއަށް ފޮނުވާލެވޭ ގޮތެއް ނުވިއެވެ.
މެޗުގައި ރާއްޖޭ ޓީމަށް ބޫޓާންގެ ގޯލް ހުޅުވާލަދިނީ، މެޗުގެ 9 ވަނަ މިނިޓްގައި ޒުވާން ފޯވާޑް އަހްމަދު އިމާޒް (އާއްކޮ) އެވެ. ދަގޭ ވަރަށް ރީތިކޮށް އާއްކޮއަށް ދިން ބޯޅަ، ބޫޓާން އޭރިޔާތެރޭން ވަރަށް ރީތިކޮށް އާއްކޮ ވަނީ ގޯލްތެރެއަށް ފޮނުވާލައި މެޗުގައި ފުރަތަމަ ފަހަރަށް ރާއްޖެއަށް ލީޑް ހޯދައިދީފައެވެ.
ރާއްޖެ ލަނޑުޖެހިތާ 10 މިނިޓް ފަހުން ބޫޓާން ވަނީ، މެޗުގެ ނަތީޖާ ހަމަހަމަކޮށްފައެވެ. ރާއްޖޭގެ ޑިފެންސް ލައިނަަށް ހެދުނު ބައެއް ގޯސްތަކުގެ ފައިދާ ނަގައި، ބޫޓާން މެޗުގެ ނަތީޖާ ހަމަހަމަކުރީ، 19 ވަނަ މިނިޓްގައި އެޓީމުގެ ޝެރީން ޖޯޑީ ކާމިޔާބުކުރި ލަނޑުންނެވެ.
ބޫޓާންގެ އެ ލަނޑަށް ފަހުވެސް އެޓީމު ކުޅުންތެރީން ވަނީ ރާއްޖޭގެ ގޯލަށް ނުރައްކާ ކޮށްފައެވެ.
މިއަދުގެ މެޗުގައި ރާއްޖޭ ކުޅުންތެރީންގެ ފަރާތުން މޮޅު ކުޅުމެއް ފެނިގެން ގޮސްފައި ވާއިރު، ހަމްޕުއާއި ދަގޭގެ ކުޅުން ވަކީން ހާއްސަކޮށް ފާހަގަކޮށްލެވެއެވެ.
މެޗުގައި ރާއްޖޭ ޓީމަށް ދެވަނަ ފަހަރަށް ކުރި ހޯދައި ދިނީ، ފޯވާޑް އަސަދުﷲ އަބްދުﷲ (އަސައްކޮ) އެވެ. ބޫޓާން ޕެނަލްޓީ އޭރިޔާ ބޭރުން ރާއްޖެއަށް ލިބުނު ހިލޭ ޖެހުމެއް އާއްކޮ ވަރަށް ރީތިކޮށް ގޯލް ކުރިމައްޗަށް ހުރަސް ކޮށްލުމުން އޭރިޔާތެރޭގައި ހުރެ އަސައްކޮ އެ ބޯޅަ ގޯލް ތެރެއަށް ފޮނުވާލީ ފުންނާބުން ޖަހައެވެ.
ފުރަތަމަ ހާފުގެ ފަހު ވަގުތުކޮޅު ތެރޭގައި ބޫޓާންގެ ޑިފެންޑަރުން ކައިރިން ނައްޓާފައި ބޯޅަ ހިފައިގެން ދަގަނޑޭ އެޓީމުގެ ގޯލް އޭރިޔާތެރޭން އަސަދުﷲ އަށް ދިން ބޯޅަ އަސައްކޮ ފޮނުވާލުމުން އެޓީމުގެ ކުޅުންތެރިއެއްގެ ގައިގައި ޖެހިފައި ވަނީ ކޯނަރަކަށް ބޭރުވެފައެވެ. އަދި ފުރަތަމަ ހާފް ނިމުނީ 2-1 އިން ރާއްޖެ ކުރީގައި އޮވެގެންނެވެ.
ދެވަނަ ހާފްގެ ކުޅުން ފަށައިގެން 6 ވަނަ މިނިޓްގައި ރާއްޖެއަށް ނަތީޖާ ފުޅާކުރާނޭ ރަނގަޅު ފުރުސަތެއް ލިބުނެވެ. އެހެން ނަމަވެސް، ދަގަނޑޭ ބޫޓާން އޭރިޔާތެރެއަށް ބޯޅަ ހިފައިގެން ވަދެ، ގޯލަށް ފޮނުވާލި ބޯޅަ ކީޕަރުގެ އަތުގައި ޖެހިފައި ކޯނަރަކަށް ބޭރުވީ އެވެ.
އޭގެ ހަތަރު ވަރަކަށް މިނިޓް ފަހުން އަނެއްކާވެސް ލަނޑު ޖަހާނޭ ފުރުސަތެއް ރާއްޖެއަށް ލިބުނެވެ. ބޫޓާންގެ ކީޕަރު ބޯޅަ ހޯދަން ޕެނަލްޓީ އޭރިޔާ ބޭރަށް ނުކުތްވަގުތު ބޯޅަ ލިބުނީ، އަސައްކޮއަށެވެ. އެހެން ނަމަވެސް ހުސްކޮށް އޮތް ގޯލަށް ބޯޅަ ފޮނުވާލަން އަސައްކޮއަށް ލިބުނު ފުރުސަތުގެ ބޭނުން ހިފޭގޮތެއް ނުވިއެވެ.
މެޗުގެ 65 ވަނަ މިނިޓްގައި ދެވަނަ ފަހަރަށް ނަތީޖާ ހަމަހަމަކުރާނޭ ފުރުސަތެއް ބޫޓާނަށް ލިބުނެވެ. އެޓީމުގެ ކަރްމާ ޝެޑްރަޕް، ބޯޅަ ހިފައިގެން ރާއްޖޭގެ ދެ ޑިފެންޑަރުން ބީޓްކޮށްފައި އޭރިޔާތެރެއަށް ވަދެ ފޮނުވާލި ބޯޅަ ކީޕަރު އިމްރާން އަތުގައި ޖެހިފައި ބޭރަށް ނުކުތް ވަގުތު، އެޓީމުގެ އިތުރު ކުޅުންތެރިއަކު ގޯލަށް ބޯޅަ ފޮނުވާލެވޭތޯ މަސައްކަތްކުރި ނަމަވެސް ބޯޅަ ދިޔައީ ގޯލްގެ އަރިމަތީން ބޭރަށެވެ.
ރާއްޖޭގެ ތިންވަނަ ލަނޑު މެޗުގެ 66 ވަނަ މިނިޓްގައި ކާމިޔާބުކޮށްދިނީ ކެޕްޓަން ދަގަނޑޭއެވެ. ދަގޭ އެ ލަނޑު ކާމިޔާބުކުރީ، ބޫޓާން ޕެނަލްޓީ އޭރިޔާ ބޭރުން ބޯޅަ ހޯދައިގެން ވަރަށް ރީތިކޮށް އެޓީމުގެ ތިން ކުޅުންތެރީން ބީޓްކޮށްފައި، ޕެނަލްޓީއޭރިޔާގެ ބޭރުން ރޮނގު ކައިރީ ހުރެ ވަރަށް ރީތިކޮށް ގޯލްތެރެއަށް ބޯޅަ ފޮނުވާލައިގެންނެވެ.
މެޗުގެ 78 ވަނަ މިނިޓްގައި ރާއްޖޭ ޓީމުން ބަދަލެއް ގެނައެވެ. މިއަދުގެ މެޗުގައި ރާއްޖޭ ޓީމުގެ ފުރަތަމަ ލަނޑު ކާމިޔާބުކޮށްދިން އާއްކޮގެ ބަދަލުގައި ކުޅެން ނުކުތީ އަހްމަދު ނާޝިދު (ނާއްޓޭ) އެވެ. އަދި އޭގެ 10 ވަރަކަށް މިނިޓް ފަހުން ކޯޗް ރިކީ ހާބަޓް ވަނީ އިތުރު ބަދަލެއްވެސް ގެނެސްފައެވެ. އެގޮތުން މެޗުގެ ރާއްޖެއަށް ދެވަނަ ފަހަރަށް ލީޑް ނަގައިދިން އަސައްކޮގެ ބަދަލުގައި ކުޅެން އެރުވީ، ޒުވާން ފޯވާޑް އަންސާރު އިބްރާހީމެވެ.
މިއަދުގެ މެޗު ބަލާލުމަށް ގާތްގަނޑަކަށް 2000 ވަރަކަށް ދިވެހީން ޓްރިވެންޑްރަމް އިންޓަނޭޝަނަލް ސްޓޭޑިއަމަށް ވަދެފައި ވާއިރު، އޭގެތެރެއިން ގިނަ މީހުންނަށް، ހިލޭ ޓިކެޓް ފޯރުކޮށްދިނީ، ޓްރިވެންޑްރަމްގައި ހުންނަ ދިވެހިރާއްޖޭގެ ކޮންސިއުލޭޓްގެ ފަރާތުންނެވެ.
މި މުބާރާތުގައި ރާއްޖެ ކުޅޭ ދެވަނަ މެޗުގައި އަންނަ ހޮނިހިރު ދުވަހު ނުކުންނާނީ ބަނގުލަދޭޝްއާ ދެކޮޅަށެވެ. ގްރޫޕް ބީގައި މިއަދު ކުޅޭ ދެވަނަ މެޗުގައި ވާދަކުރާނީ މުބާރާތުގެ އެންމެ ފަހުގެ ޗެމްޕިއަން އަފްޣާނިސްތާނާއި ބަނގުލަދޭޝް އެވެ.
މެޗު ނިމިއްޖެ.
ބޫޓާން ޕެނަލްޓީ އޭރިޔާ ބޭރުން ބޯޅަ ހޯދައިގެން ވަރަށް ރީތިކޮށް އެޓީމުގެ ތިން ކުޅުންތެރީން ބީޓްކޮށްފައި، ޕެނަލްޓީއޭރިޔާ ތެރެއަށް ވަދެ ވަރަށް ރީތިކޮށް ގޯލްތެރެއަށް ފޮނުވާލައިގެން ދަގޭ ކާމިޔާބުކުރި ލަނޑެއް.
ރާާއްޖެ 3 ވަނަ ލަނޑު ޖަހައިފި. ލަނޑު ޖެހީ ކެޕްޓަން ދަގަނޑޭ.
ބޫޓާންގެ ކީޕަރު ބޯޅަ ހޯދާން ޕެނަލްޓީ އޭރިޔާ ބޭރަށް ނުކުތްވަގުތު ބޯޅަ ލިބުނީ، އަސައްކޮއަށް، އެހެން ނަމަވެސް ހުސްކޮށް އޮތް ގޯލަށް ބޯޅަ ފޮނުވާލެވޭގޮތެއް ނުވި. ބޫޓާން ކުޅުންތެރިއެއްގެ ފައިގައި ޖެހިފައި ބޯޅަ ދިޔައީ ބޭރަށް.
ބޫޓާންގެ ކަރްމާ ރާއްޖޭ ޕެނަލްޓީ އޭރިޔާ ބޭރުން ގޯލަށް އަމާޒުކޮށް ފޮނުވާލި ބޯޅަ ކީޕަރު އިންމަ ދިފާއުކޮށް ބޭރުކޮށްލީ.
ބޫޓާޏް ހާފްގެ މެދުތެރޭން ރާއްޖެއަށް ހިލޭ ޖެހުމެއް. ޖެހުން ކުރިއަށް ފޮނުވާލަނީ ބަކާ.
މި މުބާރާތުގައި ރާއްޖެއާ ބޫޓާންގެ އިތުރުން ދެން ގުރޫޕް ބީގައި ހިމެނެނީ އެންމެ ފަހުގެ ޗެމްޕިއަން އަފުޣާނިސްތާނާއި ބަނގުލަދޭޝް.
ބޫޓާންގެ ޑިފެންޑަރުން ކައިރިން ނައްޓާފައި ބޯޅަ ހިފައިގެން ދަގަނޑޭ އެޓީމުގެ ގޯލް އޭރިޔާތެރޭން އަސަދުﷲ އަށް ދިން ބޯޅަ އަސައްކޮ ފޮނުވާލުމުން އެޓީމުގެ ކުޅުންތެރިއެއްގެ ގައިގައި ޖެހިފައި ކޯނަރަކަށް ބޭރު.
ދިވެހި ސަޕޯޓަރުން ދަނީ މެދުކެނޑުމެއް ނެތި ސަޕޯޓުކުރަމުން. ގާތްގަނޑަކަށް 2000 އާ ގާތްކުރާ އަދަދަކަށް ސަޕޯޓަރުން ތިބޭނެ ކަމަށް ބެލެވެނީ.
ބޫޓާން ނަލްޓީ އޭރިޔާ ބޭރުން ރާއްޖެއަށް ލިބުނު ހިލޭ ޖެހުމެއް އާއްކޮ ވަރަށް ރީތިކޮށް ގޯލް ކުރިމައްޗަށް ހުރަސް ކޮށްލުމުން އޭރިޔާތެރޭގައި ހުރެއް އަސަދުﷲ ފުންނާބުން ޖަހައި ބޯޅަ ގޯލްތެރެއަށް ފޮނުވާލީ.
ބޫޓާންގެ ދެ ޑިފެންޑަރުން ކައިރިން ކަޓުވާލާފައި އެ ޓީމުގެ ޕެނަލްޓީ އޭރިޔާ ތެރޭން ދަގަނޑޭ ގޯލަށް ފޮނުވާލި ބާރު ޝޮޓް ކީޕަރު މަތަކޮށް ފޮނުވާލުމުން ލިބުނީ އާއްކޮއަށް. އެހެން ނަމަވެސް އާއްކޮށް ފޮނުވާލި ބޯޅަ ގޯލް ރޮނގުމަތީން އެޓީމު ކުޅުންތެރީން ދިފާއުކުރީ.
ރާއްޖެ ލަނޑު ޖަހައިފި. ލަނޑު ޖަހައި ދިނީ އާއްކޮ
ރާއްޖޭ ޓީމަށް ލަނޑު ޖަހާނޭ ވަރަށް ރަނގަޅު ފުރުސަތެއް. ބޫޓާން ޕެނަލްޓީ އޭރިޔާ ތެރޭން ދަގަނޑޭ ވަރަށް ރީތިކޮށް ދިން ޕާހެއް، ހަމްޕުއަށް ގޯލްތެރެއަށް ފޮނުވާލެވޭ ގޮތެއް ނުވި.
މިހާރު ކުރިއަށްދަނީ ރާއްޖޭގެ ގައުމީ ސަލާމް.
ޓްރިވެންޑްރަމްގައި ހުންނަ ދިވެހި ކޮންސިއުލޭޓްގެ ކޮންސުލް އަލީ އާދަމަށް ވިދާޅުވެފައި ވަނީ، ދިވެހީންނަށް ޓިކެޓް ހިލޭ ފޯރުކޮށްދިނުމަށް ވަރަށް ބޮޑު ސަމާލުކަމެއް ދީގެން ބުރަ މަސައްކަތެއް ކުރެއްވި ކަމަށް. އަދި މިއަދު، 1000 އަށް ވުރެ ގިނަ ޓިކެޓް އެކި ފަރާތްތަކުގެ އެހީއާ އެކު ހޯއްދެވުމަށް ފަހު، ކޮންސިއުލޭޓުން ދިވެހީންނަށް ފޯރުކޮށްދެމުން ދާކަމަށް.
