24 Dec 2015, 10:30
ބޫޓާން ފާހަގަ ކުރެވެނީ ސާފް ސަރަހައްދުގެ ފުޓްބޯޅައިގައި މާ އާރުލާ ޓީމެއް ގޮތުގައެއް ނޫނެވެ. ސާފް މުބާރާތްތަކުގައި އެޓީމު ވާދަ ކުރި ނަމަވެސް އެޓީމު ފާހަގަ ކުރެވެނީ އެހެން ޓީީމުތައް އެޓީމު ކޮޅަށް ގިނަ ލަނޑު ޖަހައި އެ ޓީމުތަކުގެ ގޯލް ފަރަގު ބޮޑުކުރަން އޮންނަ ޓީމެއްގެ ގޮތުގައެވެ.
ސާފް ސުޒުކީ ކަޕްގެ ގުރޫޕް ބީގެ ފުރަތަމަ މެޗްގައި ރާއްޖެ މިއަދު ބޫޓާނާ ދެކޮޅަށް ނިކުންނަ އިރު ރާއްޖެ ވެސް ފާހަގަ ކުރެވެނީ ސާފް ސަރަހައްދުގެ މުބާރާތްތަކުގައި ބޫޓާން ކޮޅަށް ގިނަ ލަނޑުޖަހާ ޓީމެއްގެ ގޮތުގައެވެ. މިހާތަނަށް ރާއްޖެ އިން ވަނީ ބޫޓާން ކޮޅަށް 25 ލަނޑު ޖަހައިފައެވެ.
ނަމަވެސް މިއަދު ރާއްޖެ އިން އެޓީމާ ދެކޮޅަށް ނުކުންނަ އިރު އެންމެ ބޮޑު ތަފާތަކަށް ވާނީ ކުރިން ސާފް މުބާރަތްތަކުގައި ރާއްޖެއިން އެޓީމާ ދެކޮޅަށް ނަތީޖާ ފަރަގު ބޮޑު ކުރި ނަމަވެސް، މިފަހަރު އެފަދަ ނަތިޖާއެއް ނެރުން އުނދަގޫ މެޗަކަށެވެ.
އޭގެ ހެއްކަކީ ވޯލްޑްކަޕް ކޮލިފައިންގައި ރާއްޖެއިން އެޓިމާ ދެކޮޅަށް ކުޅުނު މެޗްގައި އެޓީމުން ރާއްޖެއާ ދެކޮޅަށް ނަތީޖާގެ ފަރަގު ކުޑަ ކުރުމެވެ. ރާއްޖެ އިން ހަތަރު ލަނޑު ޖަހައިފައިވަނިކޮށް އެޓީމުން ވަނީ ފަހަތުން އަރައި ތިން ލަނޑު ޖަހައި ރާއްޖެއަށް ޕްރެޝަރާ ކުރިމަތި ކޮށްފައެވެ.
ރާއްޖެއަށް ބޫޓާން ޓަފްވާނީ ކީއްވެ؟
ސާފް ސުޒުކީ ކަޕަށް ތައްޔާރުވުމަށް އެންމެ ބުރަކޮށް މަސައްކަތް ކުރި ޓީމަކަށް ވެގެންދާނީ ބޫޓާނެވެ. އެ ޓީމުން ވަނީ މި މުބާރާތަށް ޚާއްސަކޮށް ތިން މަސް ދުވަހުގެ ޓްރޭނިން ޕްރޮގްރާމު ފުރިހަމަކޮށްފައެވެ.
ބޫޓާންގެ ކޯޗް ޕާމާ ޑޮޖީ ބުނީ އެ ޓީމަށް ހިތްވަރު ލިބެނީ މުބާރާތަށް ތައްޔާރުވުމަށް އެޓީމުން ހެދި ޓްރޭނިން ކޭމްޕްގެ ސަބަބުން ކަމަށެވެ.
އަދި އެ ޓީމުގެ އެންމެ ބޮޑު ތަފާތަކަށް ވަނީ ވެސް އެ ކޭމްޕްގައި ހެދި ތަމްރީންތަކެވެ. އަދި މީގެ އިތުރުން ވޯލްޑްކަޕް ކޮލިފައިންގައި އެޓީމު ކުޅުނު ވަރުގަދަ މެޗުތަކުގެ ސަބަބުން ވެސް ކުޅުންތެރިންނަށް އިތުރު ތަޖުރިބާތަކެއް ލިބިފައި ވުމަކީ ވެސް ޑޮޖީއަށް އޮތް ހިތްހަމަޖެހުމެކެވެ.
ކޮލިފައިންގައި އެޓީމު ވަނީ ވަރުގަދަ ހޮންކޮންގް ސިއްސުވާލައިފައެވެ. ހޮންކޮންގާ ދެކޮޅަށް އަމިއްލަ ދަނޑުގައި ކުޅުނު މެޗުގައި އެޓީމުން ވަނީ ހޮންކޮންގް ލަނޑެއް ޖެހިޔަ ނުދީ 90 މިނެޓް ފުރިހަމަކޮށްފައެވެ. އެ މެޗުގައި ހޮންކޮންގުން ލަނޑުޖެހީ މެޗްގެ އެންމެ ފަހު ސިކުންތުކޮޅު ތެރޭގައެވެ.
ހޮންކޮންގާ ދެކޮޅަށް އެމެޗްގައި ބޫޓާނުން ދެއްކި ހިތްވަރުގަދަ ކުޅުމުގެ ސަބަބުން އެގައުމުގެ ފުޓްބޯޅަ ފެޑެރޭޝަނުން ވަނީ އެޓީމުގައި ހިމެނޭ ކުޅުންތެރިންނަށް ބޯނަސް ފައިސާ ވެސް ދީފައެވެ. އެހެންވެ އެޓީމުގެ މި ފަހަރުގެ ސްޓްރެންތު އަޅައި ކިޔައިފި ނަމަ ރާއްޖެއަށް އެ މެޗު ފަސޭހައެއް ނުވާނެ އެވެ.
ނަމަވެސް ރާއްޖެ ވެސް ކަންބޮޑުވުމެއް ނެތް
މުބާރާތަށް ތައްޔާރުވުމަށް ރާއްޖެ އިން ވަނީ މެލޭޝިއާގައި ތަމްރީން ޕްރޮގުރާމު ފުރިހަމަކޮށްފައެވެ. މެލޭޝިއާގައި ކުޅުނު ޓްރޭނިން މެޗްތަކުގައި ކޯޗް ރިކީ ހާބަޓް ވަނީ ގިނަ އަދަދެއްގެ ޒުވާން ކުޅުންތެރިންނަށް ފުރުސަތު ދީފައެވެ.
ގައުމީ ކޯޗް ގަބޫލު ކުރާ ގޮތުގައި ރާއްޖޭގެ ފުރަތަމަ މެޗްގައި ބޫޓާނާ ދެކޮޅަށް ނަތީޖާ ނެރެވިއްޖެ ނަމަ ކުރިއަށް ހުރި މެޗުތަކުގައި ރާއްޖެއަށް އިތުރު ހިތްވަރެއް ލިބިގެންދާނެ އެވެ.
އަދި މި މެޗުން ގިނަ ޢަދަދެއްގެ ޒުވާން ކުޅުންތެރިންނަށް ފުރުސަތު ދިނުމަކީ ގާތް ކަމެކެވެ. އެހެންވެއްޖެ ނަމަ ޖެހިގެން އޮތް ވަރުގަދަ ދެމެޗާއި ކުރިމަތިލާ އިރު ޒުވާންކުޅުންތެރިން ވެސް ވަރުގަދަ މެޗްތަކަށް ފިޓްވުމަކީ ލިބޭ ހިތް ހަމަޖެހުމަކަށްވާނެ އެވެ.
ރާއްޖޭގެ ކޯޗް ރިކީ ހާބަޓްގެ ވިސްނުމުގައި އިދިކޮޅަށް ކޮންމެ ޓީމެއް ނިކުތްކަމުގައި ވީނަމަވެސް ރާއްޖެއިން އޮތީ އެޓީމާ ދެކޮޅަށް ކުޅެން ތައްޔާރަށެވެ.
ކޯޗްގެ ބަހަކީ "އޮކްޓޯބަރުގައި ކުޅެން އޮތީ ބޫޓާނާ އެއްކޮށް ކަމުގައި ވިޔަސް ޑިސެމްބަރުގައި ކުޅޭން އޮތީ ބްރަޒިލްއާ ދެކޮޅަށް ކަމުގައިވީ ނަމަވެސް ރާއްޖެ އިން އޮތީ ތައްޔާރަށް،" ކަމަށެވެ.
މީގެ އިތުރުން ދިވެހި ގައުމީ ފުޓްބޯޅަ ޓީމަކީ އަބަދުވެސް ސަޕޯޓަރުންގެ މަދަދާއެކު އިތުރު ހިތްވަރެއް ދައްކާ ޓީމަކަށް ވުމުން، ރާއްޖެއިން ނޫން އެހެން ތަނަކުން "ދިވެހިންގެ ސިޓީއެއް" ނަގާނަމަ އެއީ މި މުބާރާތް ބާއްވާ ޓްރިވެންޑްރަމް ކަމަށް ވުން އެއީވެސް ދިވެހި ޓީމަށް އޮތް ހިތްވަރެކެވެ.