23 Dec 2015, 09:27
ގާހިރާ (ޑިސެމްބަރު 23): މިސްރުގެ ރައްޔިތުން އެދިއްޖެނަމަ މިސްރުގެ ވެރިކަން ވަގުތުން ދޫކޮށްލައްވާނެ ކަމަށާއި ނަމަވެސް ގައުމު ހަލަބޮލިކުރުމަށް ޓަކައި މަގުތަކަށް ނުކުތުމުގެ ފުރުސަތު އިދިކޮޅު ފަރާތްތަކަށް ނުދޭނެ ކަމަށް މިސްރުގެ ރައީސް އަބްދުލްފައްތާޙް އައްސީސީ ވިދާޅުވެއްޖެ އެވެ.
ކީރިތި ރަސޫލާގެ އީދުމީލާދާ ގުޅިގެން މިސްރުގެ އަވްގާފާބެހޭ ވުޒާރާ އިން ބޭއްވި ދީނީ އިހްތިފާލެއްގައި ވާހަކަ ދައްކަވަމުން ސީސީ ވިދާޅުވީ އޭނާ ވެރިކަމުން ފޭބުމަށް ގޮވާލަނީ ސިޔާސީ ފަރާތްތައް ކަމަށާއި މިސްރުގެ އާންމު ރައްޔިތުން ނޫންކަމުގަ އެވެ. މިސްރުގެ އާންމުން އޭނާ ވެރިކަމުން ފޭބުމަށް އެދިއްޖެ ނަމަ އެންމެ ވަގުތުކޮޅަކު ވެސް ވެރިކަމުގައި ނުހުންނަވާނެ ކަމަށް ސީސީ ވިދާޅުވި އެވެ. ސީސީ ވެރިކަން ކުރައްވާ ގޮތުން އޭނާއަށް ވަނީ މިސްރުގެ އެތެރޭގައި ވަރަށްބޮޑު ފިއްތުންތަކެއް ކުރިމަތިވެފަ އެވެ.
ވެރިކަމުގައި ދެމިހުންނެވުމަށް ޓަކައި ސީސީ ވަނީ އެގައުމުގެ އެންމެ ބޮޑު ސިޔާސީ ޖަމާއަތްކަމަށްވާ އިޚްވާނުލްމުސްލިމޫން ޖަމާއަތް ޓެރަރިސްޓް ޖަމާއަތަކަށް ހައްދަވާފަ އެވެ. އަދި ކުރީގެ ރައީސް މުހައްމަދު މުރްސީއާއި އިޚްވާން ޖަމާއަތުގެ އެތައްް ސަތޭކަ ލީޑަރުން ޖަލުގައި ހައްޔަރުކޮށް އޭގެތެރެއިން ގިނަ އަދަދެއްގެ ލީޑަރުންނަށް މިސްރުގެ ކޯޓުތަކުން އެއްފަހަރަށް ވުރެ ގިނަފަހަރު މަރުގެ ހުކުމް އިއްވާފައިވާއިރު ވެސް ރައްޔިތުން މަގުތަކަށް ނުކުމެ މުޒާހަރާ ކުރާވަރުން ސީސީގެ ވެރިކަމަށްވަނީ ބޮޑެތި މައްސަލަތަކެއް ކުރިމަތިވެފަ އެވެ. މީގެ އިތުރުން ސީސީގެ ވެރިކަމުގައި މިސްރުގެ އިގްތިސާދު ރަނގަނޅު ކުރުމަށް މިހާތަނަށް ކުރި މަސައްކަތްތަކުން އިގްތިސާދީ ކުރިއެރުމެއް ލިބިފައިނުވާ އިރު ހަމަނުޖެހުންތަކާ ގުޅިގެން މިސްރުގެ ޓޫރިޒަމަށް ވެސް ވަނީ ވަރަށް ބޮޑަށް އަސަރުކޮށްފަ އެވެ.
އަދި ހުސްނީ މުބާރަކްގެ ވެރިކަމާއި ޑރ. މުރްސީގެ ވެރިކަމުގެ ދުވަސްތަކަށްވުރެ ވެސް މިސްރުގެ އިގްތިސާދީ ޙާލަތު މިހާރު ގޯސްކަމަށް ރިޕޯޓްތައް ބުނެ އެވެ. ސީސީ އަކީ ޑރ. މުރްސީގެ ވެރިކަން އަސްކަރީ އިންގިލާބަކުން ވައްޓާލައިގެން ވެރިކަމަށް ވަޑައިގެން ހުންނެވި ބޭފުޅެކެވެ. ނަމަވެސް މިދިޔަ އަހަރު އޭނާވަނީ ދެފުށް ނުފެންނަ ގޮތަކަށް ބޭއްވި އިންތިޚާބެއްގައި އެއްވެސް ސިޔާސީ ބޭފުޅަކާ ވާދަނުކުރައްވައި ވެރިކަމަށް އިންތިޚާބުވެ ވަޑައިގެންފަ އެވެ. ސީސީ ވެރިކަމަށް ވަޑައިގަތުމަށްޓަކައި ކުރެއްވި ކަންތައްތަކުގެ ސަބަބުން މިސްރުގެ އެތައް ހާސްބަޔަކު މަރުވެ މިސްރުގެ އާންމުންގެ އެތައް ހާސްބަޔަކު ޖަލަށްލާފައިވާ އިރު މިއިން އެއްވެސް ބަލައި ތަހްގީގް ކުރުމަށް ބައިނަލްއަގްވާމީ މުޖްތަމައުގެ އެއްވެސް ފިއްތުމެއް އޭނާގެ ސަރުކާރަށް އައިސް ފައެއްނުވެ އެވެ.
އަދި މީގެބަދަލުގައި އެމެރިކާ އާއި އިނގިރޭސިވިލާތްފަދަ ޑިމޮކްރަސީގެ ނަމުގައި އަޑުއުފުލާ ފަރާތްތައް ވެސް ދަނީ ސީސީ ހިންގަވާފައިވާ ކަމަށް ތުހުމަތު ކުރެވޭ ޖަރީމާތަކަށް ލޯމަރާލައި އޭނާގެ ވެރިކަމުގެ ނިޒާމަށް އެއްބާރުލުން ދެމުންނެވެ. މިގޮތުން އިނގިރޭސި ބޮޑުވަޒީރު ޑޭވިޑް ކެމެރޮންގެ ދައުވަތަކަށް ސީސީ ދާދިފަހުންވަނީ އިނގިރޭސިވިލާތަށްވެސް ޒިޔާރަތް ކުރައްވާފަ އެވެ. (އަލްޖަޒީރާ)