21 Dec 2015, 13:03
ޝެންޒެން (ޑިސެމްބަރ 21): ޗައިނާގެ ޝެންޒެން ސިޓީގައި އިއްޔެ ހިނގި ބިންގަނޑު ކަނޑައިގެން ދިޔުމުގެ ހާދިސާއެއްގައި 30 ވަރަކަށް އިމާރާތް ވެއްޔާއި ކޮންސްޓްރަކްޝަން ކުނީގެ ދަށުވެ، 91 މީހަކު ހޯދާ ނުފެނިފައިވާ ކަމަށް އެގައުމުގެ މީޑިއާތަކުން ބުނެފި އެވެ.
ޗައިނާގެ މިނިސްޓްރީ އޮފް ލޭންޑް އެންޑް ރިސޯސަސްގެ ރަސްމީ ނޫހުގައިވާ ގޮތުން އެ ހާދިސާ ހިނގާފައި ވަނީ ކޮންސްޓްރަކްޝަން ސައިޓްތަކުން ކޮނެގެން ނަގާފައިވާ ވެލި ފުނިޖަހާފައި ހުރި ގޮތުންނެވެ. އެކުނި މިހާރު ވަނީ 25 އޭކަރަށް ފެތުރިފައި އެވެ.
ބިންގަނޑުކަނޑައިގެން ދިޔުމުގެ ސަބަބުން ވެއްޔާއި ކުނި ވަނީ 25 އޭކަރަށް ފެތުރިފައި -- ފޮޓޯ: ރޮއިޓާސް
ސަލާމަތީ ފަރާތްތަކާ ހަވާލާދީ ޗައިނާގެ ސީސީޓީވީ އިން ބުނީ ބިންގަނޑު ކަނޑައިގެން ދިޔުމުގެ ސަބަބުން ކުނީގެ ދަށުގައި ތާށިވެފައިވާ މީހުންގެ ތެރޭގައި ހިމެނެނީ 59 ފިރިހެނުންނާއި 32 އަންހެނުން ކަމަށެވެ.
ކުނީގެ ދަށުގައިވާ ތާށިވެފައިވާ މީހުން ސަލާމަތްކުރުމުގެ މަސައްކަތުގައި 11 ފަޔާފައިޓިން ޓީމާއި، ހަތަރު ޑްރޯނާއި، މީހުން ހޯދުމަށް ތަމްރީނުކޮށްފައިވާ 30 ކުއްތާ ހަރަކާތްތެރިވަމުންދާ ކަމަށް ފުލުހުން ބުނެ އެވެ. އަދި އެ ސަރަހައްދުގައި ރެސްކިއު ކޮމާންޑް ސެންޓަރަކާއި، އަނިޔާ ލިބިފައިވާ މީހުންނަށް ފަރުވާދޭ ތިން ޝެލްޓާ ހަދާފައިވާ ކަމަށްވެސް ފުލުހުން ބުންޏެވެ.
ކޮރަޕްޝަންގެ ސަބަބުން ޗައިނާގެ ގިނަ އިމާރާތްތައް ބިނާކުރުމުގައި ސަލާމަތީ ހާލަތްތަކަށް އިހުމާލުވުމަކީ އާއްމުކަމެކެވެ. އެހެންކަމުން އުމްރާނީ ގޮތުން ތަރައްގީ ކުރަމުންދާ ސަރަހައްދުތަކުގައި ބިންގަނޑު ކަޑައިގެން ދިޔުން ފަދަ ހާދިސާތައް ހިނގުމަކީ އާއްމުކަމެކެވެ. (ބީބީސީ)