21 Dec 2015, 12:32
ދައުލަތަށް ގިނަ ދުވަހު ޚިދުމަތް ކުރެއްވި ބޭފުޅެއްކަމުގައިވާ ކޮލި އަލީ އުމަރު މަނިކަށް ހާއްސަކޮށްގެން ތައުޒިޔާގެ ދަފްތަރެއް ހުޅުވަން ނިންމައިފި އެވެ.
އަލީ އުމަރު މަނިކު އަވަހާރަވީ ސިންގަޕޫރުގެ މައުންޓް އެލިޒަބަތު ހޮސްޕިޓަލްގެ އައިސީޔޫގައި ފަރުވާ ދެމުންދަނިކޮށް މިދިޔަ ހޮނިހިރު ދުވަހު އެވެ. އެމަނިކުފާނު އަވަހާރަވީ އުމުރުފުޅުން 77 އަހަރުގަ އެވެ.
ފޮރިން މިނިސްޓްރީ އިން ނެރުނު ބަޔާނެއްގައި ބުނެފައި ވަނީ އަލިމަނިކަށް ހާއްސަ ތައުޒިޔާގެ ދަފްތަރު ތިންތަނެއްގައި ބެހެއްޓުމަށް ހަމަޖެހިފައިވާ ކަމަށެވެ. އެގޮތުން މިިސްޓްރީ އޮފް ފޮރިން އެފެއާޒް އާއި ސްރީލަންކާގައި ހުންނަ ދިވެހި ހައިކޮމިޝަނުގެ އިތުރުން ސިންގަޕޫރުގައި ހުންނަ ދިވެހި ހައިކޮމިޝަނުގައި ތައުޒިޔާގެ ދަފްތަރު ހުޅުވުމަށް ހަމަޖެހިފައިވާ ކަމަށް ބަޔާނުގައި ބުނެފައިވެ އެވެ.
ތައުޒިޔާގެ ދަފްތަރުގައި ލިޔުމުގެ ފުރުސަތު ތިންތަނުގައި ވެސް އެކި ދުވަސް މަތިން ލިބޭނެ ކަމަށް ފޮރިން މިނިސްޓްރީއިން ބުންޏެވެ.
ދަފްތަރު ހުޅުވިފައި ހުންނަ ދުވަސްތައް
- މިނިސްޓްރީ އޮފް ފޮރިން އެފެއާޒްގައި - މިމަހު 22، 24 އަދި 27 ހެނދުނު ނުވައަކުން ހަވީރު ފަހަކަށް
- ސްރީލަންކާގައި ހުންނަ ދިވެހި ހައިކޮމިޝަނުގައި - މިމަހު 22، 23 އަދި 28ގައި ހެނދުނު 10:30 އިން ހަތަރަކަށް
- ސިންގަޕޫރުގައި ހުންނަ ދިވެހި ހައިކޮމިޝަނުގައި - މިމަހު 22، 23 އަދި 24 ވަނަ ދުވަހު ހެނދުނު 10:30 އިން 12 އަށް އަދި މެންދުރު ދެއަކުން ހަތަރަކަށް
އަލީ އުމަރު މަނިކަކީ ކުރީގެ ރައީސް އިބްރާހީމް ނާސިރުގެ ވެރިކަމުގައި ރާއްޖޭގެ ނައިބު ރައީސްކަން ވެސް ކުރައްވާފައިވާ ބޭފުޅެކެވެ. ހަމައެހެންމެ ކުރީގެ ރައީސް މައުމޫން އަބްދުލް ގައްޔޫމްގެ ވެރިކަމުގައި ވެސް އޭނާ ވަނީ ދައުލަތަށް ޚިދުމަތް ކުރައްވައިފަ އެވެ.
އަލީ އުމަރު މަނިކު އަވަހާރަވި ހަބަރު ލިބިވަޑައިގަތުމާ ގުޅިގެން، އެމަނިކުފާނުގެ ދަރިކަލުން ޑޮކްޓަރު މުހައްމަދު އަލީއަށް ރައީސް ޔާމީން ވަނީ ތައުޒިޔާ ވިދާޅުވެފަ އެވެ. އަދި އަލި މަނިކު އަވަހާރަވި ވާހަކަފުޅު އެއްސެވީ ވަރަށް ފުން ހިތާމަޔާ އެކުގައި ކަމަށް ރައީސް ވިދާޅުވި އެވެ. އަލި މަނިކަކީ ދިވެހި ދައުލަތަށާއި، ދިވެހި ސަރުކާރަށާއި ރައްޔިތުންނަށް ވަރަށް އިހުލާސްތެރި ހިދުމަތްތަކެއް ކޮށްދެއްވި އަދި ރާއްޖެ މިއަދު ދެކެމުންދާ ތަރައްގީގެ މުހިއްމު ހިއްސަދާރެއްކަން ރައީސް ޔާމީން ފާހަގަ ކުރެއްވި އެވެ.