18 Dec 2015, 11:16
ލުއިސް ސުއަރޭޒްގެ ހެޓްރިކާއެކު، ފީފާ ކްލަބް ވޯލްޑް ކަޕްގައި ޗައިނާގެ ގުއަންޒޯ އެވަގްރާންޑޭ އަތުން 3-0 އިން މޮޅުވެ، ބާސެލޯނާ މުބާރާތުގެ ފައިނަލުން ޖާގަ ހޯދައިފި އެވެ.
ގިނަ ވަގުތު ބޯޅަ ހިފަހައްޓައި ގެން ކުޅުނު ބާސާއަށް އެޓީމުގެ ފުރަތަމަ ގޯލް މެޗުގެ 39 ވަނަ މިނެޓްގައި ކާމިޔާބުކޮށްދިނީ ލުއިސް ސުއަރޭޒްއެވެ. އަދި ދެވަނަ ހާފްގެ ކުރީކޮޅު އިނިއެސްޓާ ދިން ރީތި ޕާހަކުން، ސުއަރޭޒް ވަނީ ބާސާގެ ދެވަނަ ގޯލް ކާމިޔާބުކޮށްދީފައެވެ. މެޗުގެ 67 ވަނަ މިނެޓްގައި ބާސާއަށް ލިބުނު ޕެނަލްޓީއަކުން، ސުއަރޭޒް ވަނީ އެޓީމުގެ ތިންވަނަ ގޯލް ކާމިޔާބުކޮށްދީ، އޭނާގެ ހެޓްރިކް ފުރިހަމަކޮށްފައެވެ.
މި މުބާރާތުގެ ފައިނަލްގައި ބާސާއާ ދެކޮޅަށް އާދިއްތަ ދުވަހު ނުކުންނާނީ ދެކުނު އެމެރިކާގެ ޗެމްޕިއަން އާޖެންޓީނާގެ ރިވަ ޕްލޭޓެވެ.
ބްރެޒިލްގެ ގައުމީ ޓީމުގެ ކުރީގެ ކޯޗު ލުއިސް ފިލީޕޭ ސްކޮލާރީގެ އިރުޝާދުގެ ދަށުން ކުޅޭ ގުއަންޒޯއާ ދެކޮޅަށް ބާސާގެ މުހިންމު ދެ ކުޅުންތެރިން ކަމަށްވާ ލިއޮނެލް މެސީ އާއި ނޭމާ ވެސް ނުކުޅެއެވެ. އަނިޔާގައި ހުރި މި ދެ ކުޅުންތެރިންނަށް ވެސް ފައިނަލް މެޗްގައި ކުޅެވޭނެ އަދި ބުނަށް ނޭންގޭ ކަމަށް ބާސާގެ ކޯޗް އެންރިކޭ ވަނީ ބުނެފައެވެ.
"އަހަރެންނަކަށް ނޭނގެ އެ ދެ ކުޅުންތެރިން(މެސީ، ނޭމާ) ފައިނަލް މެޗްގައި ކުޅެވޭނެ ކަމެއް. އެންމެ މުހިންމި ކަމަކީ އަހަރެމެންގެ އިބަހުރި އެ މީހުންގެ ޑިފެންސް ފޫއަޅުވާލެވޭނެ ވަރުގެ މޮޅު ކުޅުންތެރިން،" އެންރިކާ ބުންޏެވެ.
އޭނާ ބުނީ މި މުބާރާތް ދެކެނީ ވަރަށް ސީރިއަސް މެޗެއްގެ ގޮތުގައި ކަމަށާއި އެއްވެސް މެޗެއް ފަސޭހަކޮށް ނުލާނެ ކަމަށެވެ.
ބާސާއިން މީގެކުރިން ވަނީ މި މުބާރާތް ދެ ފަހަރެއްގެ މަތިން ކާމިޔާބުކޮށްފައެވެ. މިފަހަރު ބާސާއިން މި މުބާރާތް ކާމިޔާބުކޮށްފިނަމަ، އެޓީމު ވެގެންދާނީ މި މުބާރާތުގެ ތަށި އެންމެ ގިނަ ފަހަރު ހޯދި ޓީމަށެވެ.
ބާސާ ވަނީ ފީފާ ކްލަބް ވޯލްޑް ކަޕް 2009 އަދި 2011 ވަނަ އަހަރު ކާމިޔާބުކޮށްފަ އެވެ.