16 Dec 2015, 19:42
އިއާދަކުރަނިވި ހަކަތައަށް ބޭނުންވާ ސާމާނުތައް ހޯދުމަށާއި އެފަދަ ޕްރޮޖެކްޓްތައް ހިންގުމަށް ހާއްސަކޮށް ބޭންކް އޮފް މޯލްޑިވްސް (ބީއެމްއެލް) އިން 500 މިލިއަން ރުފިޔާގެ ފަންޑެއް ގާއިމްކޮށްފި އެވެ.
ކުންފުނިތަކަށް އަދި އާންމުންނަށް ވެސް ހުޅުވާލައިގެން "ބީއެމްއެލް ގްރީން ފަންޑް" ގެ ނަމުގައި ގާއިމްކުރި އެ ފަންޑުގެ ދަށުން އިއާދަކުރަނިވި ހަކަތައަށް ބޭނުންވާ ސާމާނުތައް ހޯދުމަށް ކުންފުނިތަކާއި އާންމުންނަށް އެހީވެދޭނެ އެވެ.
ބީއެމްއެލްގެ ސީއީއޯ އެންޑްރޫ ހީލީ ވިދާޅުވީ އެފަދަ ފަންޑެއް ގާއިމްކުރުމުގެ ބޭނުމަކީ ރާއްޖެއަކީ ތިމާވެށި ރައްކާތެރިކުރުމަށް އިސްނަގައިގެން ބޮޑެތި މަސައްކަތްތަކެއް ކުރަމުން އަންނަ ގައުމަކަށްވާ އިރު، ރާއްޖެއިން ކަރަންޓަށް ކުރާ ހަރަދު ކުޑަކޮށް "ރިނިއުއެބަލް އެނާޖީ" އަށް އަހުލުވެރިވެފައިވާ ގައުމަކަށް ހެދުން ކަމަށެވެ.
އެ ފަންޑުގެ އެޕްލިކޭޝަން ޕްރޮސެސިން ފަދަ ކަންތައްތަކާ ގުޅޭ ކަންކަމާއި ފަންޑާ ގުޅޭ އެހެނިހެން މައުލޫމާތުތައް އަންނަ މަހު އާންމުކުރާނެ ކަމަށް އެންޑްރޫ ވިދާޅުވި އެވެ.
އެންވަޔަރަންމަންޓް މިނިސްޓަރު ޠާރިގް އިބްރާހިމް ވިދާޅުވީ، އެ ލޯން ސްކީމްގެ ދަށުން ކުންފުނިތަކާއި އާންމުންނަށް އެހީ ލިބިގެންދާ އިރު ކަރަންޓް ހަރަދުވާ ވަރު ކުޑަކުރުމަށް އެފަދަ ފަރާތްތަކުން ގިނަ މަސައްކަތްތަކެއް ކުރާނެ ކަމަށެވެ.
ދާދިފަހުން ޕެރިހުގައި ދުނިޔޭގެ ފިނިހޫނުމިން ކުޑަކުރުމަށް ކަންތައްތަކެއް ކުރުމަށް އެއްބަސްވެފައިވާ އިރު މިނިސްޓަރު ވިދާޅުވީ، އެ އެއްބަސްވުމަށް އަމަލު ކުރަން ފެށިތާ ކުޑަ ދުވަސްކޮޅެއް ވެފައިވާ އިރު، މިފަދަ ފަންޑެއް ރާއްޖޭގެ މައި ބޭންކަކުން ހުޅުވާލުމަކީ ތިމާވެއްޓަށް ރާއްޖެއިން ދޭ އިސްކަން ހާމަކޮށްދޭ ކަމެއް ކަމަށެވެ.
މިނިސްޓަރު ވިދާޅުވީ ފަންޑުގެ ބޭނުން ހިފައިގެން "ލޯކާބަން ގައުމަކަށް" ރާއްޖެ ހެދުމުގައި އެންމެންގެ އެއްބާރުލުން ބޭނުންވާ ކަމަށެވެ.