15 Dec 2015, 15:25
ވޮޝިންޓަން (ޑިސެމްބަރު 15) : އިރާގާއި ސޫރިޔާގެ ބޮޑުބައަކަށް ވެރިވެގަނެގެން އުޅޭ އައިއެސް ޖަމާއަތް ބަލިކޮށް ނުލައި ދެން އެމެރިކާ ނޯންނާނެކަމަށް ރައީސް ބަރަކް އޮބާމާ ވިދާޅުވެއްޖެ އެވެ.
އެމެރިކާގެ ދިފާޢީ ވުޒާރާ، ޕެންޓަގަންގައި ބޭއްވި ނޫސްވެރިންގެ ބައްދަލުވުމެއްގައި އޮބާމާ ވިދާޅުވީ "ޓައިޑަލް ވޭވް ދޭއް"ގެ ނަމުގައި އެމެރިކާ މިހާރު ދޭން ފަށާފައިވާ ވައިގެ ގަދަފަދަ ހަމަލާތަކުގެ ސަބަބުން އައިއެސްއަށް ބޮޑެތި ގެއްލުންތަކެއް ލިބި އެޖަމާއަތުގެ ގިނައަދަދެއްގެ ކޮމާންޑަރުންނާއި ލީޑަރުން މަރާލެވިފައިވާ ކަމުގަ އެވެ. މީގެތެރޭގައި އައިއެސް އިން ހިފައި ހައްޔަރުކުރާ އަސީރުންނާއި ރަހީނުންނާއި ނޫސްވެރިންގެ ކަރުބުރިކޮށް އެމީހުން ކަތިލުމުގައި ހަރަކާތްތެރިވާ ޖައްލާދު މުހައްމަދު އިމްވާޒީ ނުވަތަ ޖިހާދީ ޖޯން މަރާލެވިފައިވާކަން އޮބާމާ ފާހަގަ ކުރެއްވި އެވެ. އޮބާމާ ވިދާޅުވި ގޮތުގައި މިހާރު އެމެރިކާގެ އަމާޒަކީ އައިއެސްގެ ލީޑަރުންނެވެ. މިގޮތުން ކުރިޔަށްއޮތް ތަނުގައި އައިއެސްގެގިނަ ލީޑަރުންގެ ދުވަސް ދުއްވާލާނެ ކަމުގެ އިންޒާރު އޮބާމާ ދެއްވި އެވެ.
މިދިޔަ ހަފްތާގެ ފަހުކޮޅުން ފެށިގެން ސޫރިޔާގައިވާ އައިއެސްގެ އަމާޒުތަކަށް އެމެރިކާ ދޭ ޙަމަލާތައް ވަރުގަދަކޮށް އަދި ހަމަލާތައް ދޭ މިންވަރު ކުރިޔާއަޅާބަލާއިރު އިތުރުކޮށްފައިވީ ނަމަވެސް އެމެރިކާގެ ޙަމަލާތަކުގައި ގިނައިން މަރުވަނީ ސޫރިޔާގެ އާންމުން ކަމަށް ޚަބަރުތައް ބުނެ އެވެ.
އޮބާމާ ވިދާޅުވީ އައިއެސްގެ ކޮންޓްރޯލްގެ ދަށުގައި އޮތް ސަރަހައްދުތަކުގެ 40 އިންސައްތަ ފާއިތުވި ހަތަރުވަރަކަށް ހަފްތާތެރޭގައި އެޖަމާއަތުގެ އަތްދަށުން ގޮސްފައިވާ ކަމަށާއި ފާއިތުވ ދެތިން މަސްތެރޭގައި އިރާގާއި ސޫރިޔާގެ އިތުރު ސަރަހައްދެއް އައިސްއެސް އަށް ހިފިފައި ނުވާ ކަމުގަ އެވެ. މިއީ އައިއެސް އާ ދެކޮޅަށް އެންމެ ފަހުން އެމެރިކާ ގެންގުޅެންފެށި ސްޓްރެޓެޖީ ކާމިޔާބުވަމުންދާކަމުގެ ހެއްކެތް ކަމަށްވެސް އޮބާމާ ވިދާޅުވި އެވެ. (ރޮއިޓާސް)