15 Dec 2015, 10:59
ހަމަހަމަ އުސޫލަކުން އެއްގަމު ދަތުރުފަތުރު ހަމަޖެއްސުމަށް، އައްޑޫ ސިޓީގެ ޓެކްސީ ތަކުގައި މީޓަރު ހަރު ކުރުމަށް އައްޑޫ ސިޓީ ކައުންސިލުން ނިންމައިފިއެވެ.
އައްޑޫ ސިޓީ ކައުންސިލްގެ މެންބަރު އަބްދުﷲ ތައްޔިބު މިއަދު ސަން އަށް ވިދާޅުވީ، އައްޑޫގައި ދުއްވާ ޓެކްސީތަކުގައި މީޓަރު ހަރު ކުރުމަށް ނިންމީ ރައްޔިތުންނާއި ޓެކްސީ ޑްރައިވަރުންގެ ވެސް އެދުމުގެ މަތިން، އެކަމަށް ހައްލެއް ގެނައުމަށް ކުރެވުނު މަޝްވަރާތަކަށް ފަހުގައި ކަމަށެވެ.
"ޓެކްސީ ތަކުގައި މީޓަރު ހަރުކުރުމަށް ޓެކްސީ ސެންޓަރު ތަކާ އަޅުގަނޑުމެންނާ ވާހަކަދެކެވެމުން އަންނަތާ އަހަރެއް ވެއްޖެ. އެއީ އައްޑޫގައި ވަރަށް އުނދަގޫ ވޭ ހަމަހަމަގޮތެއްގައި މިކަން ކުރެވެން ނެތް ކަމަށް ޓެކްސީ ޑްރައިވަރުންވެސް އަދި އާންމުންވެސް އެބަ ބުނޭ،" ތައްޔިބު ވިދާޅުވިއެވެ.
އޭނާ ވިދާޅުވީ އައްޑޫގައި ޓެކްސީ ކުރެވޭނެ އަގުތަކެއް ކަނޑައަޅާފައިވީ ނަމަވެސް ބައެއް ފަރާތްތަކުން އެއަށް އަމަލު ނުކުރާ ކަމަށެވެ. އަދި އައްޑޫ އަކީ ބިމުގެ ގޮތުން ބޮޑު ސިޓީއަކަށް ވެފައި، ފަޅުރަށްތަކާއި އެއްކޮށް ގުޅިފައި ވުމުގެ ސަބަބުން އެންމެ ހަމަހަމަ އުސޫލަކުން ޓެކްސީ ދަތުރުތައް ނުކުރެވޭ ކަމުގެ ޝަކުވާ ލިބޭ ކަންވެސް ތައްޔިބު ފާހަގަ ކުރެއްވިއެވެ.
"މިިކަމުގައި ހައްލަކަށް އޮތީ ޓެކްސީ މީޓަރު ހަރުކޮށްގެންކަން. ޓެކްސީ ސެންޓަރު ތަކުންވެސް ޓެކްސީއަށް އަރާ ފަރާތްތަކުންވެސް ގަބޫލު ކުރޭ،" ތައްޔިބު ވިދާޅުވިއެވެ.
އައްޑޫގައި މިހާރު 120 ވަރަކަށް ޓެކްސީ ދުއްވާ އިރު، ހުރިހާ ޓެކްސީ ތަކެއްގައި މީޓަރު ހަރުކުރުމަށް ބޮޑު ހޭދައެއް ކުރަން ޖެހޭނެކަން ތައްޔިބު ވަނީ ވިދާޅުވެފަ އެވެ. އެގޮތުން ހުރިހާ ޓެކްސީތަކެއްގައި މީޓަރު ހަރުކުރުމަށް ގާތްގަނޑަކަށް ފަސް ލައްކައެއްހާ ރުފިޔާ ހަރަދު ވާނެ ކަމަށް އޭނާ ވިދާޅުވިއެވެ.
ޓެކްސީ ސެންޓަރު ތަކަކީ އެވަރުގެ ހޭދައެއް ކުރެވޭހާ ނަފާ ލިބޭ ބަޔަކަށް ނުވާތީ، ޚިދުމަތް ފަށައިގަތުމަށް މީޓަރު ގަނެދިނުމަށް ހަމަޖެހިފައި ވަނީ ކައުންސިލުން ކަމަށް ތައްޔިބު ވިދާޅުވިއެވެ.
"އެހެންވީމާ އަޅުގަނޑުމެން މި ބަލަނީ 2016 ވަނަ އަހަރުގެ ބަޖެޓުގައި ހިމަނައިގެން މީޓަރު ހަރުކޮށްދިނުމަށް. އަޅުގަނޑުމެން ލޯނެއްގެ ގޮތުގައި ޓެކްސީ ސެންޓަރުތަކަށް މީޓަރު މި ގަނެެދެނީ." އޭނާ ވިދާޅުވިއެވެ.
ނަމަވެސް ލޯނު ދައްކަން ދޭނެ މުއްދަތު އަދި ކަނޑައަޅާފައެއް ނުވެއެވެ.
ޓެކްސީ މީޓަރު ހަރުކުރުމުން ހަމަހަމަ އުސޫލަކުން ޓެކްސީ ދަތުރުތައް ކުރެވޭނެ ކަމަށާއި ދެ ފަރާތަށްވެސް ދަތުރަށް ހަރަދުވާ ވަރު ފެންނާނެ ކަމަށް ތައްޔިބު ވިދާޅުވިއެވެ. އޭނާ ވިދާޅުވީ 2016 ވަނަ އަހަރު ޓެކްސީ މީޓަރުތައް ގަނެދެވޭނެ ކަމަށެވެ.