11 Dec 2015, 15:01
ގިނަ ބައެއްގެ މަގުބޫލުކަން ހޯދާފައިވާ އެޗްބީއޯގެ "ދަ ލެފްޓްއޯވާސް" ތިން ވަނަ އަދި ފަހު ސީޒަން އަށް އެ ނެޓްވޯކް އިން ރިނިއު ކޮށްފިއެވެ.
ދަ ލެފްޓްއޯވާސްއަކީ "މޫވްމެންޓް" އެއް ފެށި ސީރީޒް އެއް ކަމަށް އެ ބެލި ފަރާތެއް ދެކޮޅެއް ނުހަދާނެއެވެ. ގިނަ ބައެއްގެ މަގުބޫލުކަމުގެ އިތުރުން އެ ސީރީޒް ވަނީ ވަފާތެރި ފޭން ބޭސް އެއް ވެސް އުފައްދާފައެވެ.
އެގޮތުން އެ ސީރީޒްގެ ސީޒަން ދޭއް ނިމުމާއެކު ބެލުންތެރިން ވަނީ އޭގެ އާ ސީޒަނަށް ރިނިއު ކުރުމަށް ބުނެ ސީރީޒްގައި އުޅޭ މީހުން ހެދުން އަޅާ ގޮތަށް ހެދުން އަޅައިގެން އެޗްބީއޯ ކުރިމައްޗަށް އެއްވެފައެވެ.
ސީރީޒްގެ ސީޒަން ދޭއް ނިމިފައި ވަނީ މިދިޔަ އާދިއްތަ ދުވަހު އެވެ. ޖުމްލަ ތިން ސީޒަނަށްފަހު ދަ ލެފްޓްއޯވާސް ނިންމާލުމަށް ހަމަޖައްސާާފައި ވަނީ ބިނާ ކުރަނިވި ހިޔާލުތަކުގެ ސަބަބުން ކަމަށް އެޗްބީއޯ އިން ވަނީ ބުނެފަ އެވެ. ނަމަވެސް އެޗްބީއޯ އިން އެ ބުނުމެއް އިތުރަށް ތަފްސީލު ކޮށްފައެއް ނުވެއެވެ.
ލެފްޓްއޯވާސް އަކީ "ޑްރާމާ" އާއި "ސުޕަނެޗުރަލް" އަދި "ފެންޓެސީ"ގެ މާއްދާތައް ހެޔޮވަރު ވަރަކަށް ބޭނުންކޮށްފައިވާ ސީރީޒް އެކެވެ.
އެ ޝޯގެ ފުރަތަމަ ސީޒަން އަށް އެހާ ބޮޑު މަގުބޫލުކަމެއް ލިބިފައެއް ނުވެއެވެ. ނަމަވެސް ސީޒަން ދޭއް ފެށުމާއެކު ގިނަ މަޝްހޫރު ފަންނާނުންތަކެއް ވަނީ އެ ޝޯ ބަލަން ފަށާފައެވެ. އެއާއެކު އެ ޝޯ ވަނީ ޕޮޕް ކަލްޗަރުގައި ގިނަ ބައެއްގެ މަގުބޫލުކަން ހޯދާފައެވެ.