10 Dec 2015, 19:48
މައްކާ (ޑިސެމްބަރ 10): މަސްޖިދުލް ހަރަމްގައި ކުއްލި ހާލަތުގައި ބޭނުން ކުރާނެ ދޮރު ވަރަށް އަވަސް މުއްދަތެއްގައި ބަހައްޓާނެ ކަމަށް ސައުދި އަރަބިއާގެ ޖެނެރަލް ޕްރެޒިޑެންސީ އޮފް ދަ ޓޫ ހޮލީ މޮސްކްސްއާ ހަވާލާދީ މައްކާ ޑެއިލީއިން ރިޕޯޓުކޮށްފި އެވެ.
މައްކާ ޑެއިލީގެ ރިޕޯޓުގައިވާ ގޮތުން އެ ޕްރޮޖެކްޓް ދިރާސާ ކުރުމަށާއި ކުއްލި ހާލަތުގައި ބޭނުން ކުރާނެ ދޮރު ބަހައްޓާނެ ތަން ހަމަޖެއްސުމަށް ޕްރެޒިޑެންސީ އިން ވަނީ ޚާއްސަ ކޮމިޓީއެއް އެކުލަވާލައިފަ އެވެ. އެ މަސައްކަތާ ބެހޭ ތަފާތު މާހިރުން ހިމަނާފައިވާ އެކޮމިޓީގެ ފުރަތަމަ ބައްދަލުވުން މިއަންނަ ހަފްތާތަކުގެ ތެރޭގައި ބާއްވާނެ ކަމަށް ބެލެވެ އެވެ.
ޕްރެޒިޑެންސީ އިން މައުލޫމާތު ދިން ފަރާތުން ބުނާ ގޮތުގައި އެ ބައްދަލުވުމުގައި ކުއްލި ހާލަތުގައި ބޭނުން ކުރުމަށް ބަހައްޓާނެ ދޮރުގެ އަދަދާއި މަސްޖިދުލްހަރަމްގައި އެ ދޮރުތައް ބަހައްޓާނެ ސަރަހައްދުތަކާ ބެހޭ ގޮތުން ޕްރެޒިޑެންސީގެ އިސްފަރާތްތަކާ ކޮމިޓީން މަޝްވަރާ ކުރާނެ އެވެ. އަދި އެބައްދަލުވުމުގައި ކުއްލި ހާލަތުގައި ބޭނުން ކުރާ ދޮރު ފާހަގަ ކުރާނެ ގޮތެއް ހެދުމާއި ބެހޭ ގޮތުން ވެސް ވާހަކާ ދައްކާނެ ކަމަށްވެ އެވެ.
މަސްޖިދުލްހަރަމްގައި ކުއްލި ހާލަތައް ހާއްސަ ދޮރު ބެހެއްޓުމުން އަޅުކަންކުރަން ތިބޭ މީހުން ކުއްލި ހާލަތެއްގައި އަވަހަށް ބޭރަށް ނެރުމަށާއި، ކަށުނަމާދު ކުރުމަށް ސަންދޯއް ވެއްދުމަށާއި، ހުކުރު ދުވަހާއި އީދު ދުވަހު މީހުން ތޮއްޖެހުން މަދުކުރުމަށް ފަސޭހަ ވާނެ ކަމަށް މައުލޫމާތު ދިން ފަރާތުން ބުންޏެވެ.
ބުދަ ދުވަހު ޕްރެޒިޑެންސީ އޮފް ދަ ޓޫ ހޮލީ މޮސްކްސްއިން ވަނީ ކައުބާގެ ތިރީ ބައިގައި ޖަހާފައި ހުންނަ މާބުލް އާއި ހަޖަރުލް އަސްވަދުގެ ވަށައިގެންވާ ފާރު އާ ކުރާނެ ކަމަށް އިއުލާން ކޮށްފަ އެވެ. އެ ދެތަން އާ ކުރަން ނިންމާފައި ވަނީ ކައުބާގެ ތިރީގައި ޖަހާފައި ހުންނަ މާބުލްގައި ދަބަރުޖަހާ، ރީނދޫވެ، ދޮވުމުންވެސް ސާފުނުވާތީ ކަމަށް ޕްރެޒިޑެންސީގެ ޗީފް، ޝޭހު އަބްދުއްރަހްމާން އަލްސުދައިސް ވިދާޅުވި އެވެ.
އެ މަސައްކަތްތަކުގެ ސަބަބުން އަޅުކަންކުރުމަށް އެއްވެސް ބުރުލެއް ނާރާނެ ކަމަށް މަސައްކަތް ކުރާ ފަރާތްތަކުން ބުނެ އެވެ. (ސައުދީ ގެޒެޓް)