09 Dec 2015, 19:43
އެމެރިކާ ޒުވާނުންގެ އާބާދީގެ 36 ޕަސެންޓް މީހުން އަބަދުވެސް ތިބެނީ އިންޓަނެޓްގައި ނުވަތަ ސޯޝަލް މީޑިއާތަކުގައި އޮންލައިންކޮށް ކަމަށް ސާވޭއަކުން ދައްކައިފި އެވެ.
އެމެރިކާގެ "ތިންކް ޓޭންކް" ނުވަތަ ސާވޭ ފަދަ މަސައްކަތް ކުރާ ކުންފުންޏެއް ކަމަށްވާ "ޕިއު ރިސާޗް ސެންޓަރު" އިން ވަނީ 18 އަހަރާއި 29 އަހަރާ ދެމެދުގެ 20،001 ޒުވާނުންގެ މައުލޫމާތު އެއްކޮށް ސާވޭއެއް ކޮށްފައެވެ.
ޒުވާނުންގެ އާބާދީގެ 36 ޕަސެންޓު މީހުން އަބަދުވެސް އޮންލައިން ކަމަށް ބުނާއިރު 21 ފަސެންޓް މީހުންނަކީ ގިނަ ވަގުތު އޮންލައިންވާ ފަރާތްތައް ކަމަށް ސާވޭ އިން އެނގެއެވެ.
ސާވޭއިން އެނގުނު ގޮތުގައި 10 ޕަސެންޓް މީހުން ބުނެފައިވަނީ ކޮންމެ ދުވަހަކު އެއްފަހަރު އޮންލައިންވާ ކަމަށެވެ. އަދި 13 ޕަސެންޓު މީހުން ބުނެފައިވަނީ ހަފްތާއެއްގެ ތެރޭގައި "މަދު މަދުން" އޮންލައިންވާ ކަމަށެވެ. އެހެން ނަމަވެސް ސީދާ ވަކި އަދަދެއް އެއިން މީހަކަށް ބުނަން ނޭނގޭ ކަމަށްވެސް ސާވޭއިން ހާމަވެއެވެ.
ޒުވާނުންގެ ތެރެއިން ސާވޭ ހެދި ފަރާތްތަކުގެ 20 ޕަސެންޓު މީހުން ބުނެފައިވަނީ ކޮންމެ ދުވަހަކު އެއްފަހަރަށްވުރެ ގިނަ ފަހަރު އޮންލައިން ވާ ކަމަށެވެ.
ތަފާސް ހިސާބުތަކުން ދައްކާ އަދަދުތަކަކީ ހައިރާން ކުރާ އަދަދުތަކެއް ނޫނެވެ. ސަބަބަކީ އެމެރިކާގެ ޒުވާނުންގެ އާބާދީގެ 75 ޕަސެންޓު މީހުންނަކީ ސްމާޓްފޯން ގެންގުޅޭ މީހުންނަށް ވާތީއެވެ.