08 Dec 2015, 14:37
ބަޖެޓް ނެތް ކަމަށް ބުނެ މަޑުޖައްސާލަން މީގެ ކުރިން އަންގާފައިވާ ދައުލަތުން ދައުވާ ކުރާ ޖިނާއީ މައްސަލަތައް ކޯޓުތަކުގައި އަލުން ހިންގުމަށް ޕީޖީ އާއިޝަތު ބިސާމް އެދިވަޑައިގެންފި އެވެ.
ދައުލަތުން ދައުވާކުރާ ޖިނާއީ މައްސަލަތައް މަޑުޖައްސާލަން އަންގާފައި ވަނީ ކުރީގެ ޕީޖީ މުހުތާޒު މުހިސިން އެވެ. އޭރުގެ ޕީޖީ އެގޮތަށް އަންގައި ސަބަބެއް ކަމަށް ވިދާޅުވެފައި ވަނީ މައްސަލަތައް ކޯޓުތަކުގައި ހިންގުމަށް ބޭނުންވާ ބަޖެޓް ނެތުމާގުޅިގެން ކަމަށެވެ.
މައްސަލަތައް ތާވަލުކުރުން މެދުކަނޑާލެވިފައި އޮތީ ކަނޑުމަގުންނާއި ވައިގެމަގުން ދަތުރުކުރުމުގެ ހަރަދުގެ ގޮތުގައި ޕްރޮސިކިއުޓާ ޖެނެރަލްގެ އޮފީހުގެ 2015 ވަނަ އަހަރުގެ ބަޖެޓަށް ލިބުނު ފައިސާ ހުސްވެފައި ވާތީ، ޕްރޮސިކިއުޓާ ޖެނެރަލްގެ އޮފީހުގެ ފަރާތުން މައްސަލަތަކުގައި ކޯޓުތަކަށް ދަތުރުކުރެއްވެން ނެތް ތަކަމަށް އޭރުގެ ޕީޖީ ވިދާޅުވުމުން ކަމަށް ޑިޕާޓްމެންޓް އޮފް ޖުޑިޝަލް އެޑްމިނިސްޓްރޭޝަނުން ވަނީ ވިދާޅުވެފަ އެވެ.
ޕީޖީ އާއިޝަތު ބިޝާމް ވިދާޅުވީ ކޯޓުތަކުގައި ނުނިމި ހުރި ޖިނާއީ މައްސަލަތައް ކުރިއަށް ގެންދިއުމުގައި ޕްރޮސިކިއުޓާ ޖެނެރަލްގެ އޮފީހަށް އެއްވެސް ހުރަހެއް ނެތް ކަމަށެވެ. އަދި މައްސަލަތައް ކޯޓުތަކުން ތާވަލުކުރުމުން، ޕްރޮސިކިއުޓަރުން އެ މައްސަލަތަކުގައި ކޯޓުތަކަށް ހާޒިރުވަމުން ގެންދަވާނެ ކަމަށް ޕީޖީ ބިޝާމް ވަނީ ވިދާޅުވެފަ އެވެ.
"ކޯޓުތަކުގައި ނުނިމި، ހުރި ދައުލަތުން ދަޢުވާކުރާ ޖިނާއީ މައްސަލަތައް ކުރިއަށް ގެންދިއުމުގައި ކުރިމަތިވެފައިވާ ދަތިކަން ޙައްލުވެ، މައްސަލަތައް ކުރިއަށް ގެންދިއުމަށް ފަހިވެފައިވާތީ، އެ މައްސަލަތައް ތާވަލުކޮށް ކޯޓުތަކުގައި ކުރިއަށް ގެންދެވުމަށް ޑިޕާޓްމަންޓުން މިހާރު ވާނީ ކޯޓުތަކަށް، " ޑީޖޭއޭގެ ބަޔާނެއްގައި ބުނެފައިވެ އެވެ.
ކޯޓުތަކުގައި ނުނިމި ގިނަ ދުވަސްވެފައި ހުރި މައްސަލަތައް ވީހާ ވެސް އަވަހަކަށް ނިންމުމަށް ސުޕްރީމް ކޯޓުން ވަނީ ކޯޓުތަކަށް އަންގައިފަ އެވެ.