06 Dec 2015, 12:10
ސްޕެނިޝް ލީގުގައި ތާވަލުގެ އެންމެ ކުރީގައި އޮތް ތިން ޓީމުގެ ތެރެއިން ރެއާލް މެޑްރިޑާއި އެތްލެޓިކޯ މެޑްރިޑް ކުޅުނު މެޗްތައް ކާމިޔާބު ކުރިއިރު އެއްވަނާގައި ބާސެލޯނާ ކުޅުނު މެޗް އެއްވަރު ވެއްޖެއެވެ.
ސްޕެނިޝް ލީގުގައި ރޭ ގެޓަގޭ އަތުން 4-1 އިން ރެއާލް މެޑްރިޑް މޮޅުވެ އަދި ގްރަނަޑާ އަތުން 2-0 އިން އެތުލެޓިކޯ މެޑްރިޑް މޮޅުވެ، ވެލެންސިއާއާ 1-1 އިން ބާސެލޯނާ އެއްވަރުމުން ތާވަލުގެ ކުރީގައި ބާސެލޯނާ ނަގާފައިވާ ލީޑު ހަނިވެއްޖެ އެވެ.
ބާސެލޯނާއާއި ވެލްންސިއާ ރޭ ކުޅުނު މެޗްގައި މެސީ އަތުން ބޯޅަ ހޯދުމަށް ވެލެންސިއާގެ ޑެނިލޯ މަސަތްކަތް ކުރަނީ --- ފޮޓޯ:އޭޕީ
މި ނަތީޖާއާއެކު ލީގުގެ އެއްވަނައިގައި، 34 ޕޮއިންޓާއެކީ އަދިވެސް އޮތީ ބާސާއެވެ. ދެވަނައިގައި 32 ޕޮއިންޓާއެކީ އެތްލެޓިކޯ މެޑްރިޑް އޮތްއިރު، ތިންވަނައިގައި 30 ޕޮއިންޓާއެކީ އޮތީ ރެއާލް މެޑްރިޑެވެ.
ރެއާލް މެޑްރިޑް ރޭ މޮޅުވީ، އަމިއްލަ ދަނޑުގައި ގެތާފޭއާ ބައްދަލުކޮށް 1-4 ގެ ނަތީޖާއިންނެވެ. ރެއާލްގެ ފަރާތުން މޮޅު ކުޅުމެއް މި މެޗުގައި ފެނިގެންދިޔައިރު، އެޓީމުގެ ފުރަތަމަ ގޯލް މެޗުގެ ހަތަރުވަނަ މިނެޓްގައި ކާމިޔާބުކޮށްދިނީ، ކަރީމް ބެންޒެމާއެވެ. އަދި މެޗުގެ 16 ވަނަ މިނެޓްގައި ބެންޒެމާ ވަނީ ރެއާލްގެ ދެވަނަ ގޯލް ކާމިޔާބުކޮށްދީފައެވެ.
ރެއާލްގެ ތިންވަނަ ގޯލް މެޗުގެ 35 ވަނަ މިނެޓްގައި ގެރެތް ބޭލް ކާމިޔާބުކޮށްދިންއިރު، އެޓީމުގެ ހަތަރުވަނަ ގޯލް އޭގެ ތިން މިނެޓްފަހުން ކާމިޔާބުކޮށްދިނީ، ކްރިސްޓިއާނޯ ރޮނާލްޑޯއެވެ.
އެތުލެޓިކޯ މެޑްރިޑާއި ގްރަނަޑާ ބައްދަލުކުރި މެޗްގައި އެތްލެޓިކޯ ގެ އެންޓޮއިން ގްރިޒްމަން ލަނޑު ޖެހުމަށް ފަހު އުފާ ފާޅު ކުރަނީ --- ފޮޓޯ:އޭޕީ
ފުރަތަމަ ހާފް ރެއާލްއިން ހަތަރު ގޯލުގެ ލީޑަކާއެކީ ނިންމާލިއިރު، ދެވަނަ ހާފްގައި ވެސް އެޓީމަށް ގޯލްޖަހާނެ ފުރުސަތުތަކެއް ލިބިގެންދިޔަ އެވެ. ގެތާފޭގެ ހަމައެކަނި ގޯލް މެޗުގެ 70 ވަނަ މިނެޓްގައި ކާމިޔާބުކޮށްދިނީ، ޑެލްގާޑޯ އެވެ.
ރޭގެ މެޗުގެ ކުރިން ލީގްގައި ބާސާ ކުޅުނު ހަތަރު މެޗް ވެސް ކާމިޔާބް ކުރިނަމަވެސް އެ ޓީމް ރޭ ވަނީ ވެލެންސިއާއާ ދެކޮޅަށް ކުޅުނު މެޗް އެއްވަރުވެފައެވެ. އެ ޓީމަށް 59 ވަނަ މިނެޓުގައި ލީޑު ނަގައިދިނީ ލުއިސް ސުއަރޭޒް އެވެ. ވެލެންސިއާއަށް އެއްވަރުކޮށްދިނީ 86 ވަނަ މިނެޓުގައި ސަންޓި މިނާ އެވެ.
ގްރަނަޑާ އަތުން ރަށުން ބޭރުގައި އެތުލެޓިކޯ މޮޅުވީ ކެޕްޓަން ޑިއޭގޯ ގޮޑިން އާއި އެންޓޮއިން ގްރިޒްމަން ޖެހި ލަނޑުތަކުންނެވެ.