06 Dec 2015, 10:23
އިނގިރޭސި ޕްރިމިއާ ލީގުގެ ރެލިގޭޝަން ޒޯނުގައި އޮތް ބޯންމައުތު އަތުން ޗެމްޕިއަން ޗެލްސީ 1-0 ގެ ނަތީޖާ އަކުން ބަލިވެ، އެ ޓީމަށް އިތުރު މައްސަލަތަކެއް ކުރިމަތި ވެއްޖެ އެވެ.
ޗެލްސީގެ އަމިއްލަ ދަނޑު ސްޓެންފޮޑް ބްރިޖުގައި ކުޅުނު މެޗުގެ ފުރަތަމަ ހާފްގައި ލަނޑު ޖަހަން އެންމެ ރަނގަޅު ފުރުސަތު ލިބުނީ ޗެލްސީގެ ޕެޑްރޯ އަށެވެ. އެހެން ނަމަވެސް އޭނާ ފޮނުވާލި ހަމަލާ ބޯންމައުތްގެ ކީޕަރު ބޮރުކް ވަނީ ހުޝިއާރުކަމާ އެކީ ދިފާއުކޮށްފަ އެވެ.
މި މެޗުގެ ފުރަތަމަ ހާފް ނިމުނީ ދެ ޓީމުގެ ފަރާތުން ވެސް ފެނިގެންދިޔަ ދާދި ހަމަހަމަ ކުޅުމާއެކު 0-0 ގެ ނަތީޖާއިން ދެ ޓީމު އެއްވަރު ވެގެންނެވެ.
ޗެލްސީއާއި ބޯންމައުތު ބައްދަލުކުރި މެޗްގައި ޗެލްސީގެ ޕެޑްރޯ ބޯޅަ ޖަހަނީ --- ފޮޓޯ: އޭޕީ
އެ މެޗްގައި ފެނިގެން ދިޔަ ހަމަ އެކަނި ގޯލް 82 ވަނަ މިނިޓުގައި ގްލެން މުރޭ ބޮލުން ޖެހައި ޗެލްސީގެ ގޯލް ހުޅުވާލަދިން އިރު ބޯންމައުތު މޮޅުވުމުން އެ ޓީމު ވަނީ ތާވަލުގެ 17 ވަނަ އަށް ކުރިއަށް ޖެހިލައިފަ އެވެ. ޗެލްސީގެ އެ ބައްޔާއި ގުޅިގެން ކޯޗު ހޯސޭ މޮރީނިއޯ އަށް ވަނީ އިތުރު ޕްރެޝަރާ ކުރިމަތިލާން ޖެހިފަ އެވެ.
ޗެލްސީގެ މި ނާކާމިޔާބީއާ އެކު އެ ޓީމު އޮތީ 15 ޕޮއިންޓާ އެކު ތާވަލުގެ 14 ވަނައިގަ އެވެ. ލީގުގެ ހަތަރު ވަނައިގައި މި ވަގުތު އޮތް މެންޗެސްޓާ ޔުނައިޓެޑާއި ޗެލްސީއާ ދެމެދު 14 ޕޮއިންޓުގެ ފަރަގެއް ހުރި އިރު އެ ޓީމް ޗެމްޕިއަންސް ލީގްގެ ޖާގަ އެއް ހޯދުމަށް ކުރުން ޖެހޭ މަސަތްކަތް މި ވަނީ އިތުރުވެފަ އެވެ.
ޗެލްސީ އަށް ރޭ ނާކާމިޔާބީއާ ކުރިމަތިލާން ޖެހިފައި މި ވަނީ އެ ޓީމު މަޑުމަޑުން ފޯމަކަށް އެޅެމުން އަންނަނިކޮށެވެ. ލީގުގައި ޗެލްސީ ކުޅުނު 15 މެޗުގެ ތެރޭން އެ ޓީމު ވަނީ އަށް މެޗުން ބަލިވެފަ އެވެ. އަދި ޗެލްސީ މި ވަގުތު އޮތީ ރެލިގޭޝަން ޒޯނަށް ވުރެ ތިން ޕޮއިންޓް ކުރީގަ އެވެ.
މެޗަށް ފަހު ވާހަކަ ދައްކަމުން ޗެލްސީގެ ކޯޗް މޮރީނިއޯ ބުނީ އިދިކޮޅު ޓީމުން ކުޅުނީ ވަރަށް ޑިފެންސިވް ގޭމެއް ކަމަށާއި އެ މީހުން މަސައްކަތް ކުރީ ބައިކޮޅަށް ލަނޑެއް ނުވަދެވޭތޯ ކަމަށެވެ.
ޗެލްސީއާއި ބޯންމައުތު ބައްދަލުކުރި މެޗްގެ ތެރެއިން --- ފޮޓޯ: އޭޕީ
"ފުރަތަމަ ހާފުގައި ޗެލްސީ ކުޅުން ފެނިގެން ދިޔައީ ތަންކޮޅެއް ދައްކޮށް. އެކަމަކު ދެ ވަނަ ހާފުގައި ހުރިހާ ކަމެއް ބަދަލުކޮށް ޗެލްސީ ވަރުގަދަ އަށް ކުޅެން ފަށައި ހަމަލާތައް އުފެއްދި. އަދި ރެފްރީ އަށް ނުފެނުނު ނަމަވެސް ސާފު ޕެނަލްޓީއެއް ވެސް ލިބުނު،" މޮރީނިއޯ ބުންޏެވެ.
ޗެމްޕިއަންސް ލީގުގައި އަންނަ ބުދަ ދުވަހުގެ ރޭ ޕޯޓޯއާ ދެކޮޅަށެވެ. އަދި ލީގުގައި އަންނަ ހަފުތާގެ ހޯމަ ދުވަހުގެ ރޭ ޗެލްސީ ކުޅޭނީ 32 ޕޮއިންޓާ އެކު ތާވަލުގެ އެއް ވަނައިގައި އޮތް ލެސްޓާ ސިޓީއާ ދެކޮޅަށެވެ.