05 Dec 2015, 10:49
ބްލޮކްބަސްޓާ ފިލްމް ސީރީޒް، ސްޓާ ވޯޒްގެ ބައެއް މަންޒަރުތައް ރާއްޖޭގައި ނަގަމުން އަންނަ ހަބަރު ވެގެން ދިޔައީ އެތައް ދިވެހިންނަކަށް އުފާވެރިކަން ގެނެސްދިން ހަބަރަކަށެވެ. މީގެ ކުރިން ރާއްޖޭގެ ހިތްގައިމު މަންޒަރުތައް ދައްކުވައިދިން ބޮލީވުޑްގެ ފިލްމުތަކެެއް ވަނީ ފެނިގެން ގޮސްފަ އެވެ. އޭގެ ތެރޭގައި މެއިނެ ޕިޔާރް ކިޔުން ކިޔާ، ކައިޓްސް، ފައިޓް ކްލަބް - މެމްބަރސް އޮންލީ ފަދަ ފިލްމުތައް ހިމެނެ އެވެ.
ނަމަވެސް ރާއްޖޭގައި ހޮލީވުޑްގެ ފިލްމެއް ޝޫޓް ކުރާ މިއި ފުރަތަމަ ފަހަރެވެ. ދިވެހިންގެ މަގުބޫލުކަން ވެސް ހޯދާފައިވާ ސްޓާ ވޯޒްގެ ޝޫޓިން ކުރިއަށް ދަނީ ލ. އަތޮޅުގެ ދެ ރަށެއްގަ އެވެ. ޑިސެމްބަރު އެކަކުން އަންނަ ހޯމަ ދުވަހުގެ ނިޔަލަށް ލ. އަތޮޅުގައި މި ފިލްމުގެ މަންޒަރުތައް ނަގަމުން ދާނެ އެވެ.
ސްޓާ ވޯޒް އިން ރާއްޖެ ފެނިގެން ދާނެކަމުގެ ހިތްހަމަޖެހުމުގައި ތިއްބައި، އިތުރު އުފާވެރިކަމެއް ލިބިގެން ދިޔައީ ފިލްމުގެ މަސައްކަތުގައި 200 ދިވެހިން ބައިވެރިވާކަން އެނގުމުންނެވެ. އެހާ ހިސާބުން ދެން އުފެދުނު ސުވާލަކީ، މި ޝަރަފު ލިބިގެންދާނީ ދިވެހިންގެ ތެރެއިން ކޮން ބަޔަކަށްބާ އެވެ. އަދި ދިވެހިން ހަރަކާތްތެރިވާނީ ކެމެރާގެ ކުރިމަތީގައިތޯ ނުވަތަ ފުރަގަހުގައިތޯ ވެސް މިއީ އުފެދުުނު ސުވާލެކެވެ.
އެ ސުވާލުގެ ޖަވާބު މިހާރު މިވަނީ ވަރަށް ބޮޑަށް ކަށަވަރުވެފަ އެވެ. ދިވެހިން ކެމެރާގެ ފުރަގަހުގައި ހަރަކާތްތެރިވާނެ އެވެ. އަދި ކެމެރާގެ ކުރިމަތިން ވެސް ދިވެހިން ފެނިގެންދާނެ އެވެ. ނަމަވެސް ހޮލީވުޑްގެ ފިލްމަކުން ފެނިލުމުގެ ޝަރަފު ހޯދީ ދިވެހި ފިލްމް އިންޑަސްޓްރީގައި ނަން ހިނގާ މަޝްހޫރު ތަރިންނެއް ނޫނެވެ. ދިވެހި ސިފައިންނެވެ.
މި ފިލްމުގެ މަންޒަރުތަކުގައި ގާތްގަނޑަކަށް ދިވެހި 25 ސިފައިން ހަރަކާތްތެރިވާ އިރު، ދިވެހި ސިފައިން ފެނިގެންދާނީ ހަނގުރާމައިގެ ތެރެއިންނެވެ. މި ފިލްމުން ދިވެހި ސިފައިންގެ ހަނގުރާމައިގެ އުކުޅުތަކާއި ހުނަރު ފެނިގެންދާނެ ކަމަށް އުންމީދު ކުރެވެ އެވެ.
ނަމަވެސް މި ޝަރަފު ހޯދި ސިފައިންގެ މޫނު ފިލްމުން ނުފެނުމަކީ އެކަށީގެންވާ ކަމެކެވެ. ސަބަބަކީ ފިލްމުގައި ހަރަކާތްތެރިވާ ސިފައިން ތިބޭނީ މާސްކް އަޅައި މޫނު ނިވާކޮށްގެން ކަމަށްވާތީ އެވެ.
އިތުބާރު ހުރި ގޮތަކަށް މައުލޫމާތު ލިބިފައިވީ ނަމަވެސް، ދިވެހި ސިފައިން މި ފިލްމުން ފެނިގެން ދާނެކަން ފިލްމް އުފައްދާ ފަރާތުން ވެސް އަދި އެމްއެންޑީއެފް އިންވެސް ކަށަވަރުކޮށްދީފައެއް ނުވެ އެވެ. ނަމަވެސް ސްޓާ ވޯޒް ކުރޫއާ ގުޅިގެން ދިވެހި ޕްރޮޑަކްޝަން ކުންފުންޏެއް ކަމުގައިވާ ބްލޫ އެންޑް ވައިޓް އިން އަންނަނީ މަސައްކަތް ކުރަމުންނެވެ. މިއީ ވެސް ދިވެހިންނަށް ލިބޭ ކުރިއެރުމެއްކަން ޔަޤީނެވެ.
މީގެ އިތުރުން ރާއްޖޭގައި ނަގަނީ ކޮން ފިލްމެއްގެ މަންޒަރުތަކެއް ކަންވެސް ރަސްމީކޮށް ހާމަކޮށްފައެއް ނުވެ އެވެ. ނަމަވެސް ކަށަވަރުވެފައިވާ ގޮތުން ލ. އަތޮޅުގައި ޝޫޓް ކުރަމުން އަންނަނީ ސްޓާ ވޯޒްގެ ސްޕިން އޮފް ފިލްމު ސީރީޒް، ސްޓާ ވޯޒް އެންތޮލޮޖީގެ ފުރަތަމަ ބައިގެ މަންޒަރުތަކެކެވެ.
ފިލްމުގެ މަންޒަރުތަކުގައި ބޭނުން ކުރުމަށް މިދިޔަ ހަފްތާގައި ވަނީ ހެލިކޮޕްޓަރެއް ވެސް ރާއްޖެ ގެނެސްފަ އެވެ. އަދި މީގެ އިތުރުން ހޮލީވުޑްގެ ތަރި ފެލިސިޓީ ޖޯންސް ވެސް ވަނީ މިދިޔަ އަންގާރަ ދުވަހު ރާއްޖެ އައިސްފަ އެވެ.
ގަރެތު އެޑްވާޑްސް ޑައިރެކްޓް ކުރާ މި ފިލްމު ރިލީޒް ކުރުމަށް ހަމަޖެހިފައި ވަނީ އަންނަ އަހަރުގެ ޑިސެމްބަރު މަހުގެ 16 ވަނަ ދުވަހު އެވެ.
ދިވެހިންގެ ބައިވެރިވުމާ އެކު ރިލީޒް ކުރާ މިފިލްމުގެ ސަބަބުން ދިވެހި ރާއްޖޭގެ ފަތުރުވެރިކަމަށް ކުރިއެރުން ލިބުމުގެ އިތުރުން، ހޮލީވުޑާއި ބޮލީވުޑްގެ ފިލްމް އުފައްދާ ފަރާތްތަކުން ރާއްޖޭގައި ޝޫޓް ކުރަން ބޭނުންވުމަކީ ހުރިހާ ދިވެހިންނަށް ވެސް ލިބިގެންދާނެ ކުރިއެރުމެއްކަން ޔަގީނެވެ.