04 Dec 2015, 16:17
އައްޑޫ ސިޓީގައި ސަރުކާރުން ހިންގާ ފަތުރުވެރިކަމުގެ އެންމެ ބޮޑު މަޝްރޫއުކަމުގައިވާ "އިސްމެހެލަހެރަ ފަތުރުވެރިކަމުގެ މަޝްރޫއު"ގެ އަމަލީ މަސައްކަތް އަންނަ މަހުގެ ތެރޭގައި ފަށައިގަނެވޭތޯ މަސައްކަތް ކުރަމުން އަންނަ ކަމަށް ޓޫރިޒަމް މިނިސްޓަރު މޫސާ ޒަމީރު ވިދާޅުވެއްޖެ އެވެ.
އައްޑޫ ސިޓީގައި ހުންނަވައިގެން ސަން އަށް މިއަދު ދެއްވި އިންޓަވިއުއެއްގައި ޓޫރިޒަމް މިނިސްޓަރު ވިދާޅުވީ އެ ޕްރޮޖެކްޓުގެ އަމަލީ މަސައްކަތް ފަށަން ހަމަޖެހިފައި ވަނީ ކުޑަ ބަދަލުތަކަކާ އެކު ކަމަށެވެ.
ޒަމީރު ވިދާޅުވީ އިސްމެހެލަ ހެރަ ފަތުރުވެރިކަމުގެ މަޝްރޫއު ކުރިއަށްގެންދަން ރާއްޖެއިން ބޭރުގެ ދެކުންފުންޏަކުން ޝައުގުވެރިކަންފާޅުކޮށްފައިވާ ކަމަށެވެ. އަދި އޭގެތެރެއިން އެއްކުންފުނީގެ ބޭފުޅުން މިވަގުތު ތިއްބެވީ އެމަނިކުފާނާ އެކު އައްޑޫ ސިޓީގައި ކަމަށް ވެސް ޓޫރިޒަމް މިނިސްޓަރު ވިދާޅުވި އެވެ.
"އިސްމެހެލަހެރަ ފަތުރުވެރިކަމުގެ ޕްރޮޖެކްޓަށް އެބައުޅޭ ރާއްޖެއިން ބޭރުގެ ދެ ފަރާތަކުން ޝައުގުވެރިކަން ފާޅުކޮށްފަ. އޭގެއިން އެއްފަރާތުން ބޭފުޅުން ވަޑައިގެން އެބަތިއްބެވި. އިރާދަކުރެއްވިއްޔާ ފެށޭ ހަފްތާގެ ތެރޭގައި ނެގޯސިއޭޝަންތައް ނިންމާލާފަ ކޮންޓްރެކްޓުގައި ސޮއިކުރެވޭތޯ މިބަލަނީ،" ޒަމީރު ވިދާޅުވި އެވެ.
އެ ޕްރޮޖެކްޓު ހަވާލުކުރާނެ ކުންފުންޏެއް ނިންމާފައިނުވާތީ އެކަމަށް ޝައުގުވެރިކަންފާޅުކޮށްފައި ވަނީ ރާއްޖެއިން ބޭރުގެ ކޮންބައެއްކަން އަދި ހާމަކުރެވެން ނެތް ކަމަށް ވެސް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ އިސްމެހެލަ ހެރަ ތަރައްގީ ކުރަން މިހާތަނަށް ނިންމާފައި ވަނީ 600 އެނދުގެ ރިސޯޓެއްގެ ގޮތުގައި ކަމަށެވެ. ނަމަވެސް އެނދުގެ ޖާގަ އެއަށްވުރެ އިތުރުކުރެވޭނެ ގޮތްތަކާ ބެހޭގޮތުން އިންވެސްޓްކުރަން ޝައުގުވެރިކަންފާޅުކޮށް މިހާރު ރާއްޖެ އައިސްގެން އުޅޭ ކުންފުނީގެ ބޭފުޅުންނާ އެކު މަޝްވަރާ ކުރައްވަމުން ގެންދަވާ ކަމަށް ޒަމީރު ވިދާޅުވި އެވެ.
އިސްމެހެލަ ހެރެ ޕްރޮޖެކްޓް އިފްތިތާހު ކުރުމަށް ބޭއްވި ހަފްލާގައި ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު ޝާހިދު ވާހަކަފުޅުދައްކަވަނީ ---- ފޮޓޯ: ރައީސް އޮފީސް
އިސްމެހެލަ ހެރަ ޕްރޮޖެކްޓު އިފްތިތާހުކޮށްފައި ވަނީ މިދިޔަ އޭޕްރީލް މަހުގެ 28 ވަނަ ދުވަހުގެ ރޭ ހޮޓެލްޖެންގައި ބޭއްވި ރަސްމިއްޔާތެއްގައި ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމެވެ.