03 Dec 2015, 17:19
އެއްގަމު ދަތުރުފަތުރުގެ ޤާނޫނާ ޚިލާފަށް މަގުތަކުގައި ޕާކުކޮށްފައި ހުންނަ އުޅަނދު ޓޯކޮށްގެން ގެނައުމަށްފަހު 24 ގަޑިއިރު ތެރޭގައި އެ އުޅަނދެއްގެ މަޢުލޫމާތު ފުލުހުންގެވެބްސައިޓުގައިޢާއްމު ކުރާ ގޮތަށް ނިންމައިފި އެވެ.
ފުލުހުން ބުނީ ޓޯކް ކުރާ އުޅަނދުގެ މައުލޫމާތު ވެބްސައިޓުގައ އާންމު ކުރާނީ އުޅަނދުގެ ވަނަވަރު އެނގޭ ގޮތަށެވެ. ޓޯކުކުރާ އުޅަނދުގެ މައުލޫމާތު ފެންނާނެ ގޮތަށް ވެބްސައިޓު ފަރުވާމާކޮށް އަންނަ ހަފްތާއިން ފެށިގެން އެ ނިންމުމަށް އަމަލު ކުރާނެ ކަމަށް ފުލުހުން ބުންޏެވެ.
މިއީީ އެއްގަމު ދަތުރު ފަތުރުގެ ޤާނޫނުގެ ދަށުން، ޓޯކޮށްގެން ގެންނަ އެއްގަމު އުޅަނދުގެ މަޢުލޫމާތު ޓޯކުރާތާ ލަސްވެގެން 24 ގަޑިއިރު ތެރޭގައި ޢާއްމުކޮށް ފެންނަން ހުންނާނެ ގޮތަށް ހަދަންޖެހޭނެ ކަމަށް ބަޔާންކޮށްފައި އޮތުމުގެ ސަބަބުން ނިންމި ނިންމުމެއް ކަމަށް ފުލުހުން ބުނެއެވެ.
އެގޮތަށް ހަމަޖެއްސީ އެކިއެކި މައްސަލަތަކާ ގުޅިގެން ޓޯކޮށްގެން ގެންނަ އެއްގަމު އުޅަނދުގެ މަޢުލޫމާތު ޢާއްމު ރައްޔިތުންނަށް ފަސޭހައިން ދާޢިމީ ގޮތެއްގައި ފެންނަން ހުންނާނެ އިންތިޒާމެއް ހަމަޖެއްސުމުގެ ގޮތުން ކަމަށް ވެސް ފުލުހުން ބުނެއެވެ.
ގަވާއިދާ ޚިލާފަށް ޕާކުކުރާ އެއްގަމު އުޅަނދާއި ޕާކުކުރަން ކަނޑައަޅާފައިވާ ތަނެއްގައި މެދުކެނޑުމެއް ނެތި ހަތް ދުވަހަށްވުރެ އިތުރަށް ޕާކުކޮށްފައި ހުންނަ އުޅަނދު ވެސް އެއްގަމު ދަތުރުފަތުރުގެ ގާނޫނުގެ ދަށުން، މޯލްޑިވްސް ޕޮލިސް ސާވިސްއިން ނަގައިގެން ގެންދާނެއެވެ.
ނަގައިގެން ގެންދާ އުޅަނދުގެ މަޢުލޫމާތު ފުލުހުންގެ ވެބްސައިޓްގައި އާއްމުކުރާ ތާރީޚުން ފެށިގެން 60 ދުވަހުގެ މުއްދަތުގެ ތެރޭގައި އުޅަނދުގެ ވެރިފަރާތުން ޙަވާލުނުވެ ހުންނަ އުޅަނދާ ދޭތެރޭ އެއްގަމު ދަތުރުފަތުރުގެ ގާނޫނުގައި ބަޔާންކޮށްފައިވާ ގޮތުގެ މަތިން ޢަމަލު ކުރާނެ ކަމަށް ފުލުހުން ބުނެއެވެ.