02 Dec 2015, 17:40
މިޔަންމާ (ޑިސެމްބަރު 2): މިޔަންމާގެ ވެރިކަން ބަދަލުކުރުމާ ބެހޭގޮތުން މަޝްވަރާކުރެއްވުމަށް ނެޝަނަލް ލީގު ފޯ ޑިމޮކްރަސީ (އެންއެލްޑީ)ގެ ލީޑަރު އަންގް ސަން ސޫޗީ އެގައުމުގެ ރައީސް ތެއިން ސެއިންއާ ބައްދަލު ކުރައްވައިފި އެވެ.
މިޔަންމާގެ ރައީސްގެ އިތުރުން އެގައުމުގެ އަސްކަރިއްޔާގެ އިސް ޖެނެރަލް މިން އަންގް ލައިން އާވެސް ސޫޗީ މިއަދު ބައްދަލު ކުރެއްވި އެވެ.
އަންގް ސަން ސޫޗީއާ ބައްދަލު ކުރެއްވުމަށްފަހު އެ ދެ ފަރާތުން ވެސް ވަނީ މިހާރު އޮތް އަސްކަރީ ވެރިކަން ސުލްހަވެރި ކަމާ އެއްކޮށް ބަދަލު ކުރުމަށް އެއްބަސްވެފަ އެވެ.
ނަމަވެސް، މިޔަންމާގެ ގާނޫނު އަސާސީގައިވާ ގޮތުން ގައުމުގެ އިސް ވެރިއަކަށް ހުންނަ ބޭފުޅެއްގެ ދަރިންނަކީ ބޭރު ގައުމަކަށް ނިސްބަތްވާ ބޭފުޅުން ކަމުގައި ވެގެން ނުވާނެ އެވެ. ސޫޗީގެ ދެ ދަރިންކަލުންނަކީ އިނގިރޭސިވިލާތަށް ނިސްބަތްވާ ދެ ބޭފުޅުން ކަމުން މިޔަންމާގެ ރައީސަކަށް ސޫޗީ ވުމަކީ އެގައުމުގެ ގާނޫނު އަސާސީގެ ދަށުން މަނާކަމެކެވެ.
ރައީސް ތެއިން ސެއިންގެ ތަރުޖަމާނު ވިދާޅުވި ގޮތުގައި ރައީސާއި ސޫޗީގެ ބައްދަލުކުރެއްވުމުގައި ސޫޗީ އަށް ރައީސަށް ވެވޭ ގޮތަށް ގާނޫނު އަސާސީ ބަދަލު ކުރުމާ ބެހޭ ގޮތުން ނުވަތަ ދެން ވެރިކަމަށް އަންނާނެ ރައީސްއާ ބެހޭ ގޮތުންވެސް އެދެބޭފުޅުން ވާހަކަފުޅު ދައްކަވާފައި ނުވެ އެވެ.
މިދިޔަ މަހު ބޭއްވި އެގައުމުގެ މަޖިލިސް އިންތިޚާބު ކާމިޔާބުކުރި އެންއެލްޑީގެ ސަރުކާރު ވެރިކަމަށް އަންނާނީ މިހާރު އޮތް މަޖިލިސް ސެޝަން އަންނަ ޖެނުއަރީ މަހު ނިމުމުންނެވެ. އަދި ގައުމުގެ ރައީސަކު އިންތިޚާބު ކުރާނީ މިޔަންމާގެ ރައްޔިތުންގެ މަޖިލީހުންނެވެ.
މިދިޔަ މަހުގެ އަށް ވަނަ ދުވަހު ބޭއްވި މަޖިލިސް އިންތިހާބު ދުނިޔެއިން ސިފަކޮށްފައި ވަނީ ފާއިތުވި 25 އަހަރު ތެރޭގައި މިޔަންމާގައި ބޭއްވި އެންމެ ދެފުށް ފެންނަ އިންތިޚާބުގެ ގޮތުގައި އެވެ. ނަމަވެސް އެ އިންތިޚާބުގައި މިޔަންމާގެ ރޮހިންޔާ މުސްލިމުން ވަނީ ވޯޓު ލުމުގެ ހައްގުން މަހުރޫމު ކޮށްފަ އެވެ.
މައުލޫމާތު: ބީބީސީ