01 Dec 2015, 13:00
އިއްޔެ ފެށި ކޮޕް21 ސަމިޓުގައި އިންޑިއާގެ ބޮޑު ވަޒީރު ނަރެންދުރަ މޯދީ އާއި ފްރާންސުގެ ރައީސް ފްރަންސުވާ އޮލާންޑޭ 122 ގައުމަކަށް އަމާޒުކޮށް އިފްތިތާހު ކުރެއްވި އިންޓަނޭޝަނަލް ސޯލާ އެލައަންސުގެ (އައިއެސްއޭ) ފުރަތަމަ ބައިވެރިއަކަށް ރާއްޖެ ވެއްޖެ އެވެ.
އައިއެސްއޭ ތައާރަފް ކޮށްދެއްވަމުން ނަރެންދުރަ މޯދީ ވިދާޅުވީ އަދުގެ ދުނިޔޭގައި ތެލަށް ބަރޯސާވެފައި އޮންނަ މިންވަރު މަދުކުރަން ޖެހިފައިވާ ކަމަށެވެ. އެ އެލައަންސުގައި ބައިވެރިވާ ގައުމުތަކުގައި އިރުގެ ހަކަތަ ބޭނުން ކުރާ މިންވަރު އިތުރު ކުރުމަށް ވަނީ ހުށަހަޅައިފައެވެ.
ސޯލާ އެލައަންސުގައި ރާއްޖޭގެ ފަރާތުން ސޮއި ކުރައްވާފައި ވަނީ ރާއްޖޭގެ އެންވަޔަރަންމަންޓް މިނިސްޓްރީގެ ސްޓޭޓް މިނިސްޓަރު އަބްދުﷲ މަޖީދު އެވެ.
އިންޑިއާ އިން ވަނީ އެ މަޝްރޫއު ފެއްޓުމަށް 30 މިލިއަން ޑޮލަރު ދިނުމަށް ވައުދު ވެފަ އެވެ. އަދި މަޝްރޫއު ފެށުމަށް ހަމަޖެހިފައި ވަނީ އިންޑިއާގެ ސިޓީއެއްގައި އެވެ.
މޫސުމަށް އަންނަ ބަދަލުތަކާ ބެހޭގޮތުން ބާއްވާ ކޮޕް21 ސަމިޓުގައި ވާހަކަ ދައްކަވަމުން މޯދީ ވަނީ ތިމާވެށި ރައްކާތެރި ކުރުމާއި، ސާފު ހަކަތަ އުފެއްދުމުގައި މުއްސަނދި ގައުމުތަކުން ތަރައްގީ ވަމުން އަންނަ ގައުމުތަކަށް އެހީ ވުމުގެ މުހިންމުކަން ފާހަގަ ކުރައްވާފަ އެވެ.
"މިއަދު ފެނިގެން ދަނީ ސާފު ހަކަތައިގެ އިތުރުން، އަނދިރީގައި ދިރިއުޅެމުންދާ ގެތަކާއި އަވަށްތަކުގެ ރައްޔިތުންނަށް އާ އުއްމީދުތަކަކަށް އިރުއަރާތަން،" މޯދީ ވިދާޅުވި އެވެ.
ފްރާންސުގެ ޕެރިހުގައި އިއްޔެ ފެށި ކޮޕް21 ސަމިޓް ނިމޭނީ އަންނަ މަހު ވަނަ ދުވަހުއެވެ.