01 Dec 2015, 12:57
ހަކަތަ އަދި އިގްތިސާދީ ދާއިރާއިން އަންހެނުން ބާރުވެރި ކުރެވޭނެ ގޮތްތަކާ ބެހޭ ގޮތުން މަޝްވަރާކުރުމުގެ ބައްދަލުވުމެއް ސާކްގެ ގައުމުތަކުގެ މެދުގައި މިއަދު ފެށިއްޖެ އެވެ.
ދެ ދުވަހުގެ މުއްދަތަށް މޫކައި ހޮޓަލުގައި ކުރިއަށް ގެންދިއުމަށް ހަމަޖެހިފައިވާ މަޝްވަރާ ބައްދަލު ވުމާ ގުޅޭ ގޮތުން މީޑިއާއަށް މައުލޫމާތު ދެއްވަމުން އެންވަޔަރަންމަންޓް މިނިސްޓްރީގެ ސްޓޭޓް މިނިސްޓަރު އަބްދުލް މަތީން ވިދާޅުވީ، އިގްތިޞާދީ ގޮތުން އަންހެނުން ކުރާ މަސައްކަތްތަކުގައި ހަކަތަ ބޭނުން ކުރެވޭނެ ގޮތްތަކާއި އަދި އެދާއިރާގައި އަންހެނުން ބާރުވެރި ކުރެވޭނެ ގޮތްތަކާ ގުޅޭގޮތުން މަޝްވަރާ ކުރެވޭނެ ކަމަށެވެ.
"ހަކަތައިގެ ދާއިރާއިން އަންހެނުން ބާރުވެރި ކުރާނީ ކިހިނެއްތޯ، އަދި އަންހެނުނަށް ހަކަތަ ބޭނުން ވޭތޯ އަދި އަންހެނުންނަށް މި ފޯރުކޮށްދެވެނީ ހަކަތައިގެ ގޮތުން ރަނގަޅު އެއްޗެއްތޯ ސާފު އެއްޗެއްތޯ؟ އެވާހަކަތައް ބޮޑަށް މި ދެކެވެނީ،" ސްޓޭޓް މިނިސްޓަރު ވިދާޅުވި އެވެ.
ސަރަހައްދީ ގައުމުތަކުގެ ހަކަތައިގެ ދާއިރާގައި މަސައްކަތް ކުރައްވާ ބައެއް ފަރާތްތަކުން ބައިވެރިވާ އެ ބައްދަލުވުމުގައި، ޕޮލިސީ ތަކަށް ބަދަލު ގެންނަން ޖެހޭ ނަމަ އެ ބަދަލު ތަކާ ގުޅޭގޮތުން ވެސް މަޝްވަރާ ކުރެވޭނެ އެވެ.
އަދި ގަވާއިދެއް އެކުލަވައިލަން ޖެހިއްޖެ ނަމަ އެ ގަވާއިދުތަކާއި ގުޅޭގޮތުންވެސް މަޝްވަރާ ކުރެވޭނެއެވެ.
މިއަދު ފެށުނު މަޝްވަރާ ބައްދަލުވުމުގައި މިނިސްޓްރީ އޮފް އެންވަޔަރަންމަންޓުގެ އިތުރުން ފެނަކަ، ސްޓެލްކޯ ފަދަ ކުންފުނިތަކުން ވެސް ބައިވެރި ވެއެވެ.