26 Nov 2015, 19:07
ރައްޔިތުން މަޖިލީހުގެ މިއަހަރުގެ ތިން ވަނަ ދައުރުގެ ޖަލްސާތައް މިއަދު ނިންމާލުމަށްފަހު ދެ މަސް ދުވަހުގެ ޗުއްޓީއަކަށް މަޖިލިސް ހިނގައްޖެ އެވެ.
މަޖިލީހުގެ މެމްބަރުން މިއަދު ޗުއްޓީއަށް ދިޔައީ ރައްޔިތުންގެ މަޖިލީހުން މިއަދު ހަތަރު ބިލެއް ފާސްކުރުމަށްފަހު އެވެ. އެ ބިލްތައް ފާސްކުރުމަށްޓަކައި ބިލުތަކުގެ ބަހުސް މަރުހަލާ ނިންމުމަށް މިރޭ ހަތެއް ޖަހަން މަޖިލިސް ކުރިއަށް ގެންދިޔަ އެވެ. މަޖިލިސް މިއަދު ފަށާފައި ވަނީ މެންދުރުފަހު އެކެއް ޖެހިއިރު އެވެ.
ތިން ވަނަ ދައުރު ނިންމުމަށްފަހު މަޖިލިސް ޗުއްޓީއަށް ކުރިން ދަނީ ޑިސެމްބަރު މަސް ނިމުމުންނެވެ. ނަމަވެސް މަޖިލީހުގެ ގަވާއިދު އިސްލާހު ކުރުމަށްފަހު، އަހަރު ނިމުމުގެ އެއް މަސް ކުރިން މަޖިލިސް ޗުއްޓީއަށް ދިއުމަށް ވަނީ ނިންމާފަ އެވެ.
އެ ގޮތުން ރައްޔިތުން މަޖިލީހުގެ ގަވާއިދުގެ 16 ވަނަ މާއްދާގައި މީގެ ކުރިން ބުނެފައި ވަނީ ރައްޔިތުން މަޖިލީހުގައި އޮންނާނީ ތިން ދައުރެއް ކަމަށެވެ. އެގޮތުން ފުރަތަމަ ދައުރު ހިނގާނީ މާޗު މަހުގެ ފުރަތަމަ ދުވަހުން ފެށިގެން އޭޕްރީލް މަހުގެ ނިޔަލަށް ކަމަށެވެ. އަދި ދެވަނަ ދައުރު ޖޫން މަހުން ފެށިގެން އޯގަސްޓު މަހުގެ ނިޔަލަށް ކުރިއަށްދާއިރު ތިން ވަނަ ދައުރު ހިނގާނީ އޮކްޓޯބަރު މަހުގެ ފުރަތަމަ ދުވަހުން ފެށިގެން ޑިސެމްބަރު މަހުގެ ނިޔަލަށް ކަމަށް ގަވާއިދުގައި ބުނެފައިވެ އެވެ.
ނަމަވެސް އިސްލާހު ކޮށްފައިވާ މަޖިލިސް ގަވާއިދުގެ 16 ވަނަ މާއްދާގައި ބުނެފައި ވަނީ މަޖިލީހުގެ ފުރަތަމަ ދައުރު ހިނގާނީ ފެބްރުއަރީ މަހުން ފެށިގެން އޭޕްރީލް މަހުގެ ނިޔަލަށް ކަމަށެވެ. ދެވަނަ ދައުރު ޖޫން މަހުގެ ފުރަތަމަ ދުވަހުން ފެށިގެން އޯގަސްޓު މަހުގެ ނިޔަލަށް ކުރިއަށްދާއިރު ތިންވަނަ ދައުރު އަދި އެންމެ ފަހު ދައުރު ހިނގާނީ އޮކްޓޯބަރު މަހުން ފެށިގެން ނޮވެމްބަރު މަހުގެ ނިޔަލަށް ކަމަށް ގަވާއިދުގައި ބުނެފައިވެ އެވެ.
މަޖިލީހުގެ ޖަލްސާއެއް މިއަދު ވެސް ކުރިއަށް ގެންގޮސްފައިވާއިރު މިއީ އާއްމު ގޮތެއްގައި މަޖިލީހުގެ ޖަލްސާ އޮންނަ ދުވަހެއް ނޫނެވެ. މަޖިލީހުގެ ގަވާއިދުގައި ބުނެފައި ވަނީ މަޖިލީހުގެ ޖަލްސާތައް އޮންނާނީ ކޮންމެ ހަފްތާއަކު ހޯމަ ދުވަހުން ފެށިގެން ބުދަ ދުވަހަށް ކަމަށެވެ.
މަޖިލިސް މިއަހަރަށް ނިންމުމުގެ ގޮތުން ކޮމެޓީތަކުގެ މަސައްކަތްތައް ހަލުވިކޮށް ކޮމެތީ މަރުހަލާގައި ހުރި މަސައްކަތްތައް ވެސް ނިންމުމަށް މަޖިލީހުގެ ރައީސް ވަނީ މެމްބަރުންގެ ކިބައިން އެދިވަޑައިގެންފަ އެވެ. އެގޮތުން ކޮމެޓީ މަރުހަލާތަކުގައި ހުރި ގިނަ މަސައްކަތްތައް ވަނީ ނިންމާފަ އެވެ.