25 Nov 2015, 21:01
ދެހާސްއަށާރަ ވަނަ އަހަރު ނިމެންވާއިރަށް ހުޅުމާލެއަކީ ޔޫތު ސިޓީއެއްގެ ގޮތުގައި ފެނިގެން ދިޔުމަކީ ސަރުކާރުގެ އަމާޒު ކަމަށް އިކޮނޮމިކް އެންޑް ޔޫތް ކައުންސިލްގެ ކޯ ޗެއާ އަދި ފިޝަރީސް މިނިސްޓަރު ޑރ. މުހައްމަދު ޝައިނީ ވިދާޅުވެއްޖެ އެވެ.
ހުޅުމާލޭ ދެ ވަނަ ފިޔަވަހީގެ މަސައްކަތް ކުރިއަށް ދާ ގޮތް ބައްލަވާލެއްވުމަށް ކުރެއްވި ދަތުރުފުޅެއްގައި ނޫސްވެރިންނަށް މައުލޫމާތު ދެއްވަމުން ޝައިނީ ވިދާޅުވީ އަންނަ އަހަރު ތެރޭގައި ޔޫތު ސިޓީގައި އިމާރާތް ކުރާ ކީ އިންފްރާސްޓްރަކްޗަރުގެ މަސައްކަތް ފެށިގެންދާނެ ކަމަށެވެ.
"ޔޫތު ސިޓީގައި އިމާރާތް ކުރާ ކީ އިންފްރާސްޓްރަކްޗަރުގެ މަސައްކަތް ވަރަށް އަވަހަށް ފަށާނެ. އެގޮތުން އެ ކަމުގެ އެއްބަސްވުމުގައި ވަރަށް އަވަހަށް ސޮއި ކުރެވިގެން ދާނެ،" ޝައިނީ ވިދާޅުވި އެވެ.
ހުޅުމާލެ އާއި އަލަށް ހިއްކި ބިމާ ގުޅާލުމުގެ މަސައްކަތް ވަރަަށް އަވަހަށް ފެށިގެންދާނެ ކަމަށް މިނިސްޓަރު ވިދާޅުވި އެވެ.
އެގޮތުން އެ މަސައްކަތް ފެށުމަށް ބޭނުންވާ ފައިސާ މިހާރު ހަމަޖެހިފައިވާ ކަމަށް ޝައިނީ ވިދާޅުވި އެވެ. އޭގެ އިތުރުން ހައުސިން ޕްރޮޖެކްޓްތަކަށް ބެނުންވާ ފައިސާ ހަމަޖެހިފައިވާ ކަމަށް ވެސް އޭނާ ވިދާޅުވި އެވެ.
ހުޅުމާލޭ ދެ ވަނަ ފިޔަވަހީގެ މަޝްރޫއަށް ސައުދީ އަރަބިއާއިން ވަނީ 80 މިލިއަންޑޮލަރުގެ ލޯނެއް ދީފަ އެވެ. އަދި ސްޓޭޓް ބޭންކް އޮފް އިންޑިއާ (އެސްބީއައި) އިން ވަނީ 50 މިލިއަން ޑޮލަރުގެ ލޯނެއް ހައުސިން ޕްރޮޖެކްޓްތައް ކުރިއަށް ގެންދިޔުމަށް ދީފަ އެވެ.