25 Nov 2015, 18:41
ލައިބީރިއާ އިން އެބޯލާ ވައިރަސް ނައްތާލެވިފައިވާ ކަމަށް އދ. އިން އިއުލާން ކުރިތާ ދެ މަސް ފަހުން، އަނެއްކާވެސް އެ ވައިރަސް ޖެހިގެން އެ ގައުމުގައި މީހަކު މަރުވެއްޖެ އެވެ.
އެގޮތުން މި ފަހަރު އެބޯލާ ވައިރަސް ޖެހިގެން ލައިބީރިއާގައި މަރުވެފައި ވަނީ އުމުރުން 15 އަހަރުގެ ފިރިހެން ކުއްޖެކެވެ.
ލައިބީރިއާގެ ޗީފް މެޑިކަލް އޮފިސަރު ވިދާޅުވީ މަރުވި ކުއްޖާއަށް އެބޯލާ ޖެހިފައިވާ ކަން އެނގުނީ މިދިޔަ ހަފްތާގައި ކަމަށާއި އޭނާގެ ބޭބެ އާއި ބައްޕައަށް ވެސް އެ ވައިރަސް ޖެހިފައިވާ ކަމަށެވެ.
އެ ދެ މީހުންނަށް މިހާރު ފަރުވާ ދެމުން އަންނަ އިރު، މަރުވި ކުއްޖާ އާއި ވޭތުވެދިޔަ ދުވަސްކޮޅު އެކި ގޮތް ގޮތުން ދިމާވެފައި ތިބި 153 މީހުންނަށް ވެސް އެ ބަލި ޖެހިފައިވޭތޯ މޮނިޓާ ކުރަމުން އަންނަ ކަމަށް އޮފިޝަލް ވިދާޅުވިއެވެ.
ލައިބީރިއާގައި އެބޯލާ އަނެއްކާ ވެސް ފެތުރެން މެދުވެރިވި ސަބަބު މިހާރު ތަހުގީގު ކުރަމުން އަންނަ އިރު، އެ ގައުމުން ވަނީ އެކަމުގައި އދ. ގެ އެހީތެރިކަމަށް ވެސް އެދިފައެވެ.
އެބޯލާ ޖެހިގެން އެ ގައުމުގައި މިހާތަނަށް 4،800 މީހުން މަރުވެފައިވާ އިރު، އދ އިން އެގައުމުގައި އެބޯލާ ނައްތާލެވިފައިވާ ކަމަށް އެންމެ ފަހުން އިއުލާން ކުރީ ސެޕްޓެމްބަރު ތިން ވަނަ ދުވަހުއެވެ.