23 Nov 2015, 15:38
އައިޖީއެމްއެޗަށް ވިހެއުމަށް ފަހު ދަރިފުޅު ދޫކޮށް މަންމަ ފިލުމުން އެ ކުއްޖާ މަންމައާ ހަވާލުނުކޮށް ދައުލަތުގެ ބެލުމުގެ ދަށަށް ނެގުމަށް ނިންމައިފި އެވެ.
އާންމު އުސޫލެއްގެ ދަށުން އެގޮތަށް މަންމަ ފިލުމުން ވެސް އެ މަންމަ ހޯދައި އޭނާ އަކީ ކުއްޖާ ބެލުމުގެ ގާބިލްކަން ހުރި ފަރާތެއްތޯ ބެލުމަށް ފަހު ގާބިލްކަން ހުރެއްޖެ ނަމަ ކުއްޖާ ހަވާލު ކުރެ އެވެ. ނުވަތަ އެކުއްޖާގެ މަންމަ ނުވަތަ ބައްޕަ ފަރާތު އާއިލާ މީހަކާއި ކުއްޖާ ހަވާލު ކުރެ އެވެ.
ކުޑަކުދިންގެ ހިޔާގެ ސީއީއޯ ޒީނާޒް އަދުނާން "ސަން"އަށް މިއަދު ވިދާޅުވީ ވިދާޅުވީ އެ ތުއްތު ކުއްޖާ މަންމައާ ހަވާލު ނުކުރުމަށް ވަނީ ނިންމާފައި ކަމަށާއި އެ ކުއްޖާ މިހާރު ވަނީ ދައުލަތުގެ ބެލުމުގެ ދަށަށް ނަގާފައި ކަމަށެވެ.
"އެޕޭރެންޓް ކުއްޖަކު ހަވާލު ނުކުރެވޭ ކަހަލަ ކޮންޑިޝަންއެއްގައި ފެންނަނީ، އެހެންވީމަ ދައުލަތައް ނަގާފައި މިހާރު އެހެރީ." ޒީނާޒް ވިދާޅުވި އެވެ.
އެ ކުއްޖާ އަދި ވެސް އޮތީ އައިޖީއެމްއެޗްގައި ކަމަށާއި އެ ކުއްޖާ ހޮސްޕިޓަލުން ދޫކޮށްލުމުން ގެންދާނީ ކުޑަކުދިންގެ ހިޔާއަށް ކަމަށް ޒީނާޒް ވިދާޅުވި އެވެ.
ސަން އަށް އެނގިފައިވާ ގޮތުގައި، މީގެ 10 ދުވަސް ކުރިން އައިޖީއެމްއެޗްގައި ވިހެއި އެ އަންހެން މީހާ "ޑިސްޗާޖް"ކުރުމުން އޭނާ ވަނީ، ދަރިފުޅު ހޮސްޕިޓަލަށް ދޫކޮށްލުމަށް ފަހު ގޮސްފަ އެވެ. އަދި އެއަށް ފަހު ހޮސްޕިޓަލަށް އެނބުރި އައި ނަމަވެސް އަނެއްކާ ވެސް އެމީހާ ވަނީ، ދަރިފުޅު ހޮސްޕިޓަލަށް ދޫކޮށްލާފައި ގޮސްފަ އެވެ.