17 Nov 2015, 14:47
ސަރުކާރު ދަމަހައްޓަން ކުރަން ޖެހުނު ކޮންމެ ކަމެއް ގާނޫނީ އިމުގެ ތެރެއިން ކުރާނެ ކަމަށާއި ސަރުކާރު ދަމަހައްޓަން ފަސްޖެހުމެއް ނެތި ދެމިހުންނާނެ ކަމުގެ ޔަގީން އަރުވާ ކަމަށް ސަރުކާރު ކޯލިޝަންގައި ހިމެނޭ އެމްޑީއޭގެ ލީޑަރު އަހުމަދު ސިޔާމް މުހައްމަދު ވިދާޅުވެއްޖެ އެވެ.
ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމްގެ ސަރުކާރަށް ދެ އަހަރު ފުރުމުގެ މުނާޞަބަތުގައި ސިޔާމް މިއަދު ނެރުނު ބަޔާނުގައި ވިދާޅުވީ ރައްޔިތުންގެ ލާބަޔާއި މަންފާއަށް ރައީސުލްޖުމްހޫރިއްޔާ ކުރައްވަމުން ގެންދަވާ މަސައްކަތްޕުޅަށް އެމްޑީއޭ ފުރިހަމަ އެއްބާރުލުމާއި ތާއީދު ލިބޭނެ ކަމަށެވެ.
ރައްޔިތުންނަށް ބޭނުންވާ އަސާސީ ޚިދުމަތްތައް ފޯރުކޮށްދިނުމަށް ރައީސް ޔާމިން ކުރައްވާ މަސައްކަތްޕުޅުތަކާއި އެމަނިކުފާނުގެ ސަރުކާރުން ހޯއްދަވާފައިވާ ކާމިޔާބީތައް އެމްޑީއޭއިން ފާހަގަ ކުރާ ކަމަށް އެ ބަޔާނުގައި ބުނެފައިވެ އެވެ.
ސިޔާމް ވިދާޅުވީ ބަލާލި ކޮންމެ ދިމާލަކުން ތަރައްޤީ އާއި ތަމައްދުންގެ އުފާވެރި މަންޒަރުތައް ފެނިގެންދާ ކަމަށެވެ.
"މި ލޮބުވެތި ޤައުމުގެ ތަރައްޤީ އާއި، ޢިއްޒަތްތެރި ދިވެހި ރައްޔިތުންގެ ކުރިއެރުމަށްޓަކައި ރައީސް ޢަބްދުﷲ ޔާމީން އަބްދުލް ޤައްޔޫމު ރެއާއި ދުވާލު ކެނޑިނޭޅި ކުރައްވާފައިވާ އަދި ކޮށްދެއްވަމުން ގެންދަވާ ނުހަނު ބުރަ އިޚްލާޞްތެރި މަަސައްކަތްޕުޅުތައް ފާހަގަކޮށް މި ޕާޓީގެ އެންމެހަ މެމްބަރުންގެ ނަންފުޅުގައި އެމަނިކުފާނަށް ހިޔަ ހާސް ފަށުން ޝުކުރު ދަންނަވަމެވެ،" އެ ބަޔާނުގައި ވެއެވެ.
އެމްޑީއޭ އާއި ޕީޕީއެމް ކޯލިޝަނުގެ ސަރުކާރަށް ދެ އަހަރު ފުރޭތީ ސިޔާމް ވަނީ، އި ރައީސް ޔާމީނަށާއި، ސަރުކާރު އަދި އެމްޑިއޭގެ ހުރިހާ މެމްބަރުންނަށް ތަހުނިޔާ ދަންނަވާފަވެ އެވެ.